دەرتتى ءسابيدى دەلفين ەمدەيدى

الماتىدا دەلفيندەردى بالالاردىڭ تسەرەبرالدى تىرىسقاق اۋرۋىن ەمدەۋگە پايدالانا باستادى. نەبارى 10 سەانستان تۇراتىن ەم-دوم باعدارلاماسىن قازىردىڭ وزىندە 50 بالاعا قولدانىپ كورگەن دارىگەرلەر بۇل ەمنىڭ جاقسى ناتيجە كورسەتكەندىگىن ايتۋدا. عىلىمي جەتەكشىلەر مەن دارىگەرلەر ۇسىنعان 25 مينۋتتىق ەمدىك باعدارلاما 2 بولىمنەن – «جاعالاۋداعى جۇزدەسۋ» مەن «سۋداعى سەرۋەننەن» تۇرادى. ەم جۇرگىزۋ ءىسىن باقىلاۋشى مامانداردىڭ ايتۋىنشا, سىرقات بالا­لاردىڭ 90 پايىزى سۋ جانۋارىمەن كەزدەسكەننەن كەيىن جاعدايلارى وڭالىپ, سويلەۋگە تالپىنىپ, ءتۇرلى قيمىل­دار جاساعىسى كەلىپ, ومىرگە دەگەن قۇلشىنىسى ارتقان. – دەلفيندەر – بالا پسيحولوگياسىنا ەرەكشە اسەر ەتە الاتىن سۇتقورەكتىلەر. بىرىنشىدەن, ولاردىڭ ءتۇرى ۇنەمى ك ۇلىپ تۇراتىن جاندى ەلەستەتسە, ەكىنشىدەن, ادام بويىنداعى پسيحولوگيالىق اۋىرتپالىقتى الىپ تاستايتىنداي قاسيەتكە يە. كوبىنە ءبىز بۇيىرعان تاپسىرمادان گورى ءوز بەتىنشە باسقا دا قيمىل-ارەكەتتەرگە بارادى. ءبىر جاقسىسى, ءىس-ارەكەتتەرى بالالارعا كوپ اسەر ەتەدى. وسىعان قاراعاندا, سۋ جانۋارىن دۇرىس باۋلىسا, ادام جانى مەن ءتانىن ەمدەۋدىڭ جاڭاشا ءتاسىلى پايدا بولۋعا ءتيىس, – دەدى الماتى دەلفيناتەراپيا ءبولىمىنىڭ جەتەكشىسى الەكسەي پوليششۋك. نيكول, كاتيا جانە يۋمي اتتى 3 دەلفين سۋدا دا, جاعادا دا سىرقات بالالاردىڭ كوڭىلىن اۋلاپ, ءوز ويىنىن كورسەتەدى. سيپاۋعا, ۇستاپ كورۋگە جانە بىرگە جۇزۋگە تىرىسقان بالالار ءبىر ءسات وزدەرىنىڭ دەرتىن ۇمىتىپ, ومىرگە دەگەن قۇلشىنىسى ارتادى. دارىگەرلەردىڭ ايتۋىنشا, ولاردان شىعاتىن ۋلترا دىبىس ادام اعزاسىنا ەرەكشە اسەر ەتىپ, ءالسىز دەنەنىڭ يممۋنيتەتىن كوتەرۋگە جانە پسيحيكالىق قالىبىن جاقسارتۋعا زور ىقپال جاسايدى. قانات ەسكەندىر, «ەگەمەن قازاقستان» الماتى