تاتتىمبەتتى تۇركيا قۇرمەتتەيدى

وتكەن اپتادا انكارانىڭ كەچي­­ورەن اۋدانىنداعى ءسۇيىنباي سايا­باعىنا اقيىق اقىننىڭ ءمۇسىنى ورنا­تىلعانىن حابارلاعان ەدىك. ەندى, مىنە, تۇركيانىڭ استاناسى – انكارا قالاسىندا قازاق­تىڭ كۇيشى-كوم­پوزيتورى, دومبىراشى, شەرتپە كۇي ورىنداۋشىلىق مەكتەبىنىڭ نەگى­زىن قالاۋشىلاردىڭ ءبىرى, حالىق كۇي ونەرىنىڭ كلاسسيگى ءتات­تىمبەت قازان­عاپ ۇلى اتىنداعى ساياباق اشىلدى. ساياباققا داۋلەسكەر كۇيشىنىڭ اتى حالىقارالىق تۇركسوي ۇيى­­مىنىڭ ۇيىمداستىرۋىمەن, قا­زاقستاننىڭ تۇركياداعى ەلشىلى­گىنىڭ قولداۋىمەن جانە قاراعاندى وبلىسىنىڭ اكىمدىگىنىڭ اتسا­لىسۋى­مەن بەرىلدى. بۇل دەمالىس ورنى انكارا قالاسىنىڭ ورتا­لى­عىنداعى ەتيمەسگۋت اۋدا­نىن­دا و­رنالاسقان. ساياباقتىڭ اشىلۋ سالتاناتىنا قازاقستاننىڭ تۇركياداعى توتەنشە جانە وكىلەتتى ەلشىسى جانسەيىت تۇيمەباەۆ, حالىقارالىق تۇركسوي ۇيىمىنىڭ باس حاتشىسى دۇيسەن قاسەيىنوۆ, انكارا قالاسى ەتيمەسگۋت مۋنيتسيپاليتەتىنىڭ مەرى ءانۋار دەميرەل, اقىن سەرىك اقسۇڭقار ۇلى, تاتتىمبەتتىڭ تىكەلەي ۇرپاعى ءمۇسلىم جاقپاروۆ پەن تۇرىك زيالىلارى قاتىستى. شارادا الدىمەن تاتتىمبەت اتىن­داعى اكادەميالىق ۇلت اسپاپتار وركەسترىنىڭ ورىنداۋىندا كۇيشى-كومپوزيتوردىڭ «سارىجايلاۋ», «سىلقىلداق» كۇيلەرى تارتۋ ەتىلدى. ودان كەيىن قازاقستاننىڭ ءتۇر­كيا­داعى توتەنشە جانە وكىلەتتى ەلشىسى جانسەيىت تۇيمەباەۆ ءسوز سويلەپ, قازاق كۇيشىسىنىڭ اتىنداعى ساياباقتىڭ اشىلۋى ەكى ەلدىڭ ارا­سىنداعى مادەني جانە دوستىق قارىم-قاتىناستىڭ جىل وتكەن سايىن دامىپ, نىعايىپ كەلە جاتقانىن كورسەتەتىنىن, قازىرگى كەزدە ءتۇبى ءبىر تۇركى ەلدەرىن جاقىنداستىراتىن, ەكى ەلدىڭ رۋحاني بايلىعىن ارتتىراتىن جۇمىستاردىڭ قولعا الىنىپ جاتقانىن ايتتى. –تۇرىك ەلىندە قازاقتىڭ تاريحى مەن مادەنيەتى جاقسى ناسيحاتتالىپ كەلەدى. وسى جەردە 2011 جىلى حالىق ءارتىسى, كۇيشى-كومپوزيتور دينا نۇرپەيىسوۆانىڭ 150 جىلدىعىنا بايلانىستى ساياباق اشىلعان بولاتىن. بىلتىر كەچيورەن اۋدانىندا ءسۇيىنباي ارون ۇلىنىڭ 200 جىلدىعىنا وراي ساياباق اشىلدى. سوندىقتان, تۇرىك جەرىندە حالقىمىزدىڭ مادەنيەتىنىڭ دامۋىنا زور ۇلەس قوسقان تۇلعالارعا قۇرمەت كورسەتىلىپ جاتقانى ءبىز ءۇشىن زور قۋانىش, ۇلكەن ابىروي. وسىنداي ماڭىزدى شارالار تۇركى حالىقتارىنىڭ اراسىن جاقىن­داستىرا تۇسەدى, – دەدى ول. اتالعان شارادا تۇركسوي ۇيىمىنىڭ باس حاتشىسى دۇيسەن قاسەيىنوۆ تە تۇركى ەلدە­رىنىڭ ىنتىماقتاستىعىنىڭ ماڭىز­دى­لىعىن اتاپ ءوتتى. ول حالىق كۇي ونەرىنىڭ كلاسسيگى ءتاتتىم­بەت قازانعاپ ۇلىنا ارنالعان ساياباقتىڭ قالانىڭ ءدال ورتالى­عىندا ورنالاسقانىن, وسىنىڭ ءوزى تۇركى حالقىنىڭ قازاق ەلىنە دەگەن ىستىق ىقىلاسىن بىلدىرەتىنىن ايتتى. سونىمەن بىرگە, ول تۇركسوي ۇيىمى بىلتىرعى جىلدى حاكاس داستانشىسى سەمەن كادىشەۆقا, تۇرىك جازۋشىسى حالدۋن تانەرگە ارناعانىن, ال بيىل اتاقتى ويشىل ءجۇسىپ بالاساعۇنيگە قۇرمەت كورسەتىلىپ, حالىقارالىق كونفەرەنتسيالار ۇيىمداستىرۋدى قولعا الىپ جات­قانىن جەتكىزدى. البينا ءاشىم, «ەگەمەن قازاقستان» – انكارادان