قولعا ۇيرەنگەن قونجىق

وسكەمەننىڭ سەمەيگە قاراي شىعاتىن كۇرەجولىنىڭ بويىندا گەراسيموۆكا دەگەن اۋىل بار. تولەگەن توقتاروۆ اۋىلدىق وكرۋگىنە ەنەتىن وسى اۋىلدىڭ تۇرعىنى راۆشان زۇلفيەۆ وسىدان ءۇش اپتا بۇرىن ايۋدىڭ قون­جىعىن تاۋىپ العان بولاتىن. ول وپىتنوە پولە ەلدى مەكەنىنىڭ اۋما­عىندا سوڭىنان ىلەسىپ كەلە جاتقان بوگدە ادامداردىڭ كولىكتەرىمەن الدە­بىر اڭدى قۋالاپ, «قىزىققا» باتىپ, ءوزارا داۋرىعىسىپ جۇرگەندىكتەرىن باي­قايدى. باجايلاپ قاراسا, كولىكپەن قاق­پايلاعانى قونجىق ەكەن. اناسىنا نە بولعانى بەلگىسىز. قونجىق – جالعىز. «ەگەر كىشكەنتاي مايماقتىڭ اناسى قاسىندا بولسا, بۇل «باتىرلار» نە ىستەر ەدى؟» دەگەن وي بيلەگەن راۆشان تەز ارادا بەيباستاق ارەكەتكە توقتاۋ ايتىپ, قونجىقتى اراشالاپ ۇيىنە الىپ كەلەدى. كەلىنشەگى دالانىڭ قورعانسىز قالعان حايۋانىنا قارسى بولمايدى. ال سەگىز جاسار ۇلى جانىبەكتىڭ قۋانىشىندا شەك جوق ەدى. ءسۇپ-سۇيكىمدى مايماقپەن ىلەزدە دوستاسقان بالا ينتەرنەتتەن ايۋدىڭ بالاسىن باعىپ-قاعۋ جولدارىن ىزدەيدى. راۆشان اۋىل يمامى ەكەن. مىنە, سودان بەرى يمامنىڭ ءۇيى اۋىلداعى ەڭ تانىمال شاڭىراققا اينالدى. العاشقىدا اۋىلداستارى اعىلسا, قازىر ىرگەدەگى وبلىس ورتالىعىنان دا قونجىقتى قىزىقتاۋشىلاردىڭ اياعى باسىلار ەمەس. قاراقۇمىق, بالىق, ءسۇت, بۇقتىرىلعان بيداي بەرىپ اسىراعان كىشكەنتاي ايۋدىڭ سالماعى العاش كەل­گەندە 7,5 كيلو تارتسا, قا­زىر 18 كيلوعا جەتتى. قون­جىق­تىڭ تامسانىپ جەيتىن ءتاتتىسى – بال. – باستاپقىدا ۇياڭ بولعانىمەن, ۇيرەنىسە كەلە اسىر سالىپ وينايتىن بولدى. ءىشىن قاسۋ ءۇشىن الاقانىن جايىپ جىبەرىپ, شالقاسىنان جاتا قالعاندى جاقسى كورەدى. كىشىگىرىم ۇياداعى ورنىنا كەشكىلىك تاماعىنا تويىپ العان سوڭ جاتادى دا تاڭ اتقانشا ۇيقىنى سوعادى, – دەيدى راۆشان زۇلفيەۆ. بالا جانىبەكپەن بىرگە كۇن­دەلىكتى وزەنگە بارىپ شومىلاتىن قونجىق تابيعات اياسىندا دا ادامن­ىڭ قاسىنان ەكى ەلى قالمايدى ەكەن. ادامعا ۇيرەنگەن قونجىقتىڭ ءوس­كەن كەزىندە تابيعي ورتادا الدە­كىمگە جەم بولۋى ىقتيمال ەكەنىن ايتقان زۇلفيەۆتەر ونى حايۋاناتتار باعىنا تاپسىرماق نيەتتە. تابيعات قورعاۋ پروكۋراتۋراسى قىز­مەتكەرلەرىنىڭ كەڭەسى بويىنشا, راۆشان قونجىقتى شەمونايحا اۋدا­نىنىڭ كامىشينسكوە اۋىلىن­داعى حايۋاناتتار باعىنا وتكىزبەك. – قونجىققا ابدەن باۋىر باسىپ قالىپپىز. كوڭىلىمىز قيمايدى. اسىرەسە, بالامنىڭ جىبەرگىسى جوق. وتباسىمىزدىڭ ءبىر مۇشەسىنە اينالعان قونجىعىمىز ءۇشىن ەندى حايۋاناتتار باعىنا تۇراقتى بارىپ, جاعدايىن ءبىلىپ تۇراتىن بولامىز, دەيدى ول. دۋمان اناش, «ەگەمەن قازاقستان» شىعىس قازاقستان وبلىسى, ۇلان اۋدانى