ۇلىبريتانيا ەۋرووداقتا قالا ما؟
ەرتەڭ ۇلىبريتانيادا ەلدىڭ ەۋروپالىق وداقتا قالاتىنىن, نە قالمايتىنىن ايقىندايتىن بۇكىلحالىقتىق رەفەرەندۋم وتكىزىلۋى ءتيىس. العاشىندا قۇرىلىمنان كەتكىسى كەلەتىن حالىق سانى كوپ سەكىلدى كورىنگەنىمەن, كەيىنگى كەزدەرى بۇل ۇدەرىس كەرى سيپات الا باستاعانداي.
سوڭعى ساۋالداما ۇلىبريتانيالىقتاردىڭ 53 پايىزى ەلدىڭ ەۋروپالىق وداقتا قالعانىن قالايتىنىن كورسەتىپ بەرگەن. قارسىلار, سايكەسىنشە, 46 پايىز. وسى وڭ ۇدەرىس لوندوننىڭ قارجى بيرجاسىندا فۋنت ستەرلينگتىڭ باعامىن دوللارعا قاراعاندا 2 پايىزعا كۇشەيتكەن. وسىعان سايكەس, ەۋرونىڭ قۇنى دا 2 پۋنكتكە كوتەرىلگەن. سونىمەن, ۇلىبريتانيالىقتاردى تاريحي تاڭداۋ كۇتىپ تۇر. قىسقاسى, ەۋروپاداعى ۇلكەن ەلدەگى احۋال كوپشىلىكتىڭ قالاۋىنا بايلانىستى قازىرگى كۇيىندە قالادى نەمەسە كۇرت وزگەرىسكە ۇشىراۋى ىقتيمال.
بالليستيكالىق زىمىران ۇشىرماقشى
سولتۇستىك كورەيا ەلدىڭ شىعىس جاعالاۋلارىنان «مۋسۋدان» دەپ اتالاتىن ورتا قاشىقتىقتاعى بالليستيكالىق زىمىران ۇشىرۋعا دايىندالىپ جاتىر. بۇل تۋرالى كەشە وڭتۇستىك كورەيا ۇكىمەتىندەگى دەرەك كوزىنە سىلتەمە جاساي وتىرىپ, «يونحاپ» اقپارات اگەنتتىگى حابارلادى.
«دايىندىق جۇرگىزىلىپ جاتقانى انىقتالعاننان كەيىن ءبىز جاعدايدى مۇقيات باقىلاۋعا الاتىن بولامىز. ۇشىرىلىمعا «مۋسۋدان» ۇلگىسىندەگى زىمىران دايىندالىپ جاتىر دەپ سانايمىز», دەيدى اگەنتتىككە كىم ەكەنىن ايتۋدان باس تارتقان دەرەك كوزى. ۇشىرىلىمعا دايىندىق جۇرگىزىلىپ جاتقانى تۋرالى اقپاراتتى جاپونيالىق دەرەك كوزدەرى دە قۋاتتاعان. ولاردىڭ مالىمەتتەرىنە قاراعاندا, ۇشىرىلىم الداعى سەنبى, 25 ماۋسىمدا جۇزەگە اسىرىلۋى مۇمكىن. ويتكەنى, كورەي تۇبەگىندەگى 1950-1953 جىلدار ارالىعىنداعى سوعىس سول كۇنى باستالعان بولاتىن.
رەسەيگە قارسى سانكتسيا ۇزارتىلادى
ەۋرووداق تاراپىنان رەسەيگە قارسى سانكتسيالاردى ۇزارتۋ 
ماسەلەسى شەشىلىپ قويعان, بىراق جارتى جىل بەدەرىندە سانكتسيالىق رەجىم بوساڭسىتىلۋى ىقتيمال. بۇل تۋرالى «Euronews»-گە سۇحباتىندا ەۋروكوميسسيانىڭ باسشىسى جان-كلود يۋنكەر مالىمدەگەن.
يۋنكەر مىرزا سانكت-پەتەربۋرگتە وتكەن بيزنەس-فورۋمدا ەۋرووداقتىڭ رەسەيگە قارسى سانكتسيالاردى بىرتە-بىرتە جەڭىلدەتۋىنە مۇمكىندىگى بار ەكەنىن كولدەنەڭ تارتقان ەدى. بۇگىندە باسقاشا پىكىر ءبىلدىرىپ وتىر. ال رەجىمنىڭ بوساڭسىتىلۋى مينسك ۋاعدالاستىقتارىنىڭ ورىندالۋىنداعى پروگرەسكە تىكەلەي بايلانىستى بولماق ەكەن. «ءدال قازىر ءبىزدىڭ سانكتسيالاردى ۇزارتاتىنىمىز ايداي انىق. الايدا, كەلەسى 6 اي ىشىندە مونيتورينگ جالعاستىرىلادى. ءارى قارايعى شەشىم دە سوعان بايلانىستى بولادى», دەيدى ەۋروكوميسسيا توراعاسى.
قىسقا قايىرعاندا:
- رەسەيدىڭ اۋە جانە زىمىران شابۋىلدارىنان قورعانىس اسكەرلەرى جاقىن قاشىقتىقتاعى زىمىرانعا قارسى قورعانىس جۇيەسىن سىناقتان وتكىزدى. بۇل تۋرالى كەشە رەسەي قورعانىس مينيسترلىگىنىڭ ءباسپاسوز قىزمەتىنە سىلتەمە جاساي وتىرىپ, «نوۆوستي» اقپارات اگەنتتىگى حابارلادى.
- ەكسەتەر ۋنيۆەرسيتەتى استروفيزيكتەرىنىڭ حالىقارالىق توبى بەلگىلى ەكزوپلانەتالاردىڭ ىشىندەگى ەڭ جاسى دەپ سانالاتىن, ك2-33b دەپ ايدار تاعىلعان پلانەتانى بايقاپ قالعان. ول جەردەن 500 جارىق جىلىنا تەڭ قاشىقتىقتا ورىن تەپكەن كورىنەدى. بۇل جاڭالىق «Nature» جۋرنالىندا جاريالانىپتى.
- رەسەي ليبەرال-دەموكراتيالىق پارتياسىنىڭ سەركەسى ۆلاديمير جيرينوۆسكي ەگەر رەسەيلىك جەڭىل اتلەتتەر ريو-دە-جانەيرودا وتەتىن وليمپيا ويىندارىنا بارۋ قۇقىنان ايىرىلسا, وندا ەۋروپادا وڭىرلىك وليمپيا ويىندارىن ۇيىمداستىرۋدى ۇسىندى. بۇل تۋرالى كەشە تاسس حابارلادى.
- امەريكالىق 6 جاسار قىز ەسكەك ەسۋ سلالومىنان وليمپيادا چەمپيونى دجو ياكوبيدىڭ التىن مەدالىن تاۋىپ العان. مەدالدى اتلانتادا سپورتشىنىڭ اۆتوكولىگىنەن بەلگىسىز بىرەۋلەر ۇرلاپ كەتكەن كورىنەدى. ال ماراپاتتى قىز بالا وتباسىمەن ورماندا سەرۋەندە جۇرگەن كەزىندە تاۋىپ السا كەرەك. ءسويتىپ, ول تروفەيدى يەسىنە ينتەرنەت ارقىلى قايتارىپ بەرىپتى.
ىقتيمال لاڭكەس-جانكەشتى ۇستالدى
بەلگيانىڭ استاناسى بريۋسسەل قالاسىندا تەراكت دايىنداۋمەن اينالىستى دەگەن كۇدىكپەن ءبىر ادام تۇتقىندالعان. ءسويتىپ, قالا ورتالىعىندا جارىلىس بولۋى مۇمكىن دەگەن قاۋىپپەن دابىل قاعىلدى. بۇل تۋرالى كەشە DH.be حابارلادى.
پوليتسيا بەلگيا استاناسىنىڭ ورتالىعىنداعى ءىرى ساۋدا كەشەندەرىنىڭ ءبىرىن قورشاپ تاستادى. ال كۇدىكتىدەن جانكەشتىنىڭ بەلبەۋى تابىلعان. بىراق بەلبەۋدىڭ ىشىندە جارىلعىش زاتتىڭ بولعانى نەمەسە بولماعانى ازىرشە بەلگىسىز. وقيعاعا وراي ۇلتتىق قاۋىپسىزدىك كەڭەسى جەدەل ءماجىلىس وتكىزگەن. ۇستىمىزدەگى جىلعى ناۋرىز ايىنىڭ سوڭىندا بريۋسسەلدە جاسالعان لاڭكەستىكتەن كەيىن بەلگيادا تۇراقتى نەگىزدە كونترتەرروريستىك وپەراتسيالار وتكىزىلىپ تۇرادى. سول كەزدەن بەرى 12 كۇدىكتى قاماۋعا الىنىپتى.
التى جىلدان سوڭ تاعىلعان ايىپ
ۆارشاۆانىڭ وكرۋگتىك سوتى گەنەرال پاۆەل بەلاۆنىيدى 2010 جىلى پرەزيدەنت لەح كاچينسكيدىڭ سمولەنسكىگە ساپارىن دۇرىس ۇيىمداستىرماعانى ءۇشىن 1,5 جىلعا شارتتى تۇردە باس بوستاندىعىنان ايىردى. بۇل اقپاراتتى دا «نوۆوستي» اگەنتتىگى تاراتتى.
سول كەزدە بەلاۆنىي پولشا ۇكىمەتى كۇزەت بيۋروسى باستىعىنىڭ ورىنباسارى ەكەن. وعان جوعارى لاۋازىمدى تۇلعالاردىڭ رەسەيگە ساپارىن ۇيىمداستىرۋدا ءوز مىندەتىن ءتيىستى دەڭگەيدە ورىندامادى دەگەن ايىپ تاعىلىپتى. گەنەرال ءوزىنىڭ كىناسىن مويىنداماسا كەرەك. بورتىندا پرەزيدەنتتەن باسقا كوپتەگەن جوعارى لاۋازىمدى ادامدار بولعان تۋ-154م ۇشاعى 2010 جىلدىڭ 10 ساۋىرىندە سمولەنسك تۇبىندە اپاتقا ۇشىراعانى بەلگىلى. اپات سالدارىنان ۇشاقتاعى جولاۋشىلاردى قوسا ەسەپتەگەندە 88 ادام قازا تاپقان بولاتىن.
ينتەرنەت ماتەريالدارى نەگىزىندە ازىرلەندى
