الاساپىران ءسات ەندى باستالادى

بۇرناعى كۇنى فۋتبولدان فرانتسيادا ءوتىپ جاتقان ەۋروپا دوپ دوداسى تاعى ءبىر توپتىڭ ويىندارىن تياناقتاپ بەردى. بۇل جولى ۆ توبىنداعى ەكى ويىننىڭ بىرىندە ءىرى ەسەپ تىركەلسە, ەكىنشىسى تەڭ اياقتالدى. تۋلۋزادا ۇتىلعان رەسەي قۇراماسى ەندى ەلىنە قايتاتىن بولسا, ۇتقان ۋەلس توپتىڭ كوشىن باستادى. ال سەنت-ەتەندە قاتار وتكەن ماتچتا انگليا مەن سلوۆاكيا ءبىر-بىرلەرىنىڭ قاقپالارىنىڭ قۇلپىن اشا المادى. بىراق رەسەيلىكتەردىڭ ۇتىلىپ قالۋلارىنا بايلانىستى سلوۆاكتار دا كەلەسى كەزەڭگە ءوتتى. ناتيجەسىندە ۋەلس – 6, انگليا – 6, سلوۆاكيا – 4, رەسەي 1 ۇپايمەن تۋرنير كەستەسىنىڭ قورىتىندىسىن ءتۇزدى. رەسەيلىكتەر بۇل كەزدەسۋگە كارە­ليانىڭ سياموزەرو كولىندە سۋعا باتىپ كەتكەن بالالاردىڭ قازاسىن ازا تۇتاتىن قارا شۇبەرەك بايلاپ شىقپاقشى بولىپ ەدى, وعان چەمپيونات قوجايىندارى رۇقسات بەرە قويعان جوق. ال ويىننىڭ باسى ولار ءۇشىن ەرەكشە قاۋىپ ۇيالاتاتىنداي ەشتەڭە بايقاتپادى. كوماندا ءبىرىنشى بولىپ شابۋىلعا شىقتى. ءبىرىنشى بولىپ قارسى قاقپاعا دوپ ۇردى. الاڭدا دا ەركىن قيمىلداپ جۇرگەندەي كورىنگەن. بىراق مۇنىڭ ءبارى الدامشى كو­رىنىس ەكەن. قۇرامانىڭ قورعانىس شەبىنىڭ شەتەنى تىم بوس بولىپ شىقتى. ول ۋەلس جاساعى العاش قاۋىرت شابۋىلعا شىققان كەزدە-اق سەتىنەپ سالا بەردى. 11-مينۋتتا دجو اللەن ءوز الاڭى بەتتەن ۇستاي العان دوبىن ورتالىق قورعاۋشىلار ايماعىنىڭ ۇستىمەن العا قاراي زىرلاتتى. ونى بىردەن قاعىپ الىپ, قاقپاعا قاراي ۇمتىلعان اارون رەمسي سول زاماتتا-اق يگور اكين­فەەۆپەن بەتپە-بەت كەلدى. سول جەكپە-جەكتە سالقىنقاندىلىق تا­نىتقان ۆالليلىك فورۆارد دوپتى قاقپاشىنىڭ ۇستىنەن اسىرىپ تاستاي سالدى. بۇدان كەيىن رەسەي قۇراماسى ەسەپتى تەڭەستىرۋ ءۇشىن العا ۇم­تىلدى. الايدا, ونىڭ ويىنىندا اسا قاتتى تەگەۋرىن دە, قاقپانى قاقىراتىپ وتەتىن تۋرا سوققى دا بولعان جوق. ەسەسىنە قارسىلاستارىنىڭ وقتا-تەكتە قۇيعىتىپ العى شەپتەن شى­عا سالاتىن شاپقىنشىلىقتارى قا­تەردى كوبىرەك ءتوندىرىپ تۇردى. وسىلايشا ءبىرىنشى تايمنىڭ ورتاسىندا جاسالعان كەزەكتى قارسى شابۋىل كەزىندە ۋەلس كومانداسى تاعى ءبىر گول سالىپ كەتتى. سول دۇرلىگىستە ەڭ الدىنان تابىلعان نيل تەيلور الدىمەن گولكيپەرگە تۋرا سوققى جاسادى, سوسىن ودان قايتقان دوپتى بوس قاقپاعا اتىپ جىبەردى. ال 67-مينۋتتا رەمسي رەسەيلىكتەردىڭ ايىپ الاڭىنا كىرىپ, اشىق تۇرعان گارەت بەيلدى العا شىعاردى. داربازا الدىنا جالعىز كەلگەن ول اكينفەەۆتى الداپ ءتۇسىردى. ەسەپ – 3:0. البەتتە, ماتچ الدىندا رە­سەيلىكتەردىڭ ۇتىلىپ قالۋ ىق­تيمالدىلىعىن ەشكىم ەستەن شى­عارعان جوق, بىراق ءدال مىناداي ەسەپتىڭ تىركەلەتىنىن سەزگەندەر تىم از شىعار. مۇنى ماتچتان كەيىن جۋرناليستەرمەن كەزدەسكەن لەونيد سلۋتسكي دە اڭعارتتى. ول, سونىمەن بىرگە, رەسەي قۇراماسىنىڭ ەۋروپا چەمپيوناتىنداعى ءساتسىز ويىندارى ءۇشىن بارلىق جاۋاپكەرشىلىكتى ءوز موينىنا الۋعا دايىن ەكەنىن اتاپ كورسەتتى. ەندىگى جەردە ورنىنا جاڭا ادامنىڭ كەلۋى كەرەك ەكەنىن دە ونىڭ ءوزى ءبىلدىردى. بۇعان قاراعاندا, انگليا مەن سلوۆاكيا قۇرامالارى اراسىنداعى ويىن ءبىرشاما جايباراقات ءوتتى. اعىلشىنداردىڭ باپكەرى روي حودجسون مۇنىڭ الدىندا ۋەلس كومانداسىنا قارسى كەزدەسۋگە شىققان ستارتتىق قۇرامنان 6 ويىنشىنى الماستىردى. ونىڭ ارىپتەسى يان كوزاك بولسا, «جەڭىمپاز قۇرامىن وزگەرتپەيدى» دەگەن ەسكى قاعيدامەن بۇرىنعى قالىپتى ۇستانىپتى. كەزدەسۋدىڭ ءبىرىنشى تايمىندا, ءسوز جوق, دجەيمي ۆاردي مەن ادام لاللانا كوبىرەك كوزگە ءتۇستى. اۋەلى «لەستەردىڭ» فورۆاردى ناتانيەل كلاين اۋەلەتىپ بەرگەن دوپتى قاقپا باعانى جاققا ءدال بەرە الماي قالدى. سودان سوڭ قاتار تۇرعان مارتين شكرتەلدى ارتقا تاستاپ, قاتتى سوققان دوبىن ماتۋش كوزاچيكتىڭ قولىنا تۋرا بەرىپ قويدى. وسى ارالىقتا لاللانا كوماندالاسىنان قالا قويمادى. «ليۆەرپۋلدىڭ» جارتىلاي قورعاۋشىسى العاشقى 45 مينۋتتىقتا ەسەپ اشۋ ءۇشىن ەڭ قولايلى ءساتتى جىبەرىپ الدى. ول وڭ قاپتالدان ءدال جانىنا اۋەلەتىپ بەرىلگەن دوپتى قاقپاعا قاراي قاتتى ۇرعاندا, ونى كەرەمەت شەبەرلىكپەن قۇلاپ قايتارعان كوزاچيك قاقپاسىن امان ساقتاپ قالدى. سلوۆاكتار شابۋىلداعى كرەا­تيۆتى جاساۋعا كەلگەندە, كوپ كى­بىرتىكتەي بەردى. ولار تەك ەكىنشى تايمدا عانا جويقىن جورىقتارعا شىعا باستادى. سول شابۋىلداردىڭ بىرىندە كريس سموللينگتىڭ ءوز قاقپاشىسىنا ءساتسىز تاستاعان دوبىن روبەرت ماك ادەمى پايدالانىپ كەتە جازدادى. كەلەسى ەپيزودتا قاقپاشى دجو حارت سلوۆاكتار ۇرعان دوپتى سەرپىپ تاستادى. وسىنىڭ سوڭىن الا كلايننىڭ جاقىن جەردەن قاتتى سوققان دوبى جولىنا كوزاچيك توسقاۋىل بولىپ جاتا قالدى. تاعى ەكى مينۋتتان سوڭ شكرتەل قاقپاعا كىرىپ بارا جاتقان دوپتى قايتارىپ ۇلگەردى. ال الاڭعا ۋەين رۋني شىق­قاننان كەيىن ويىن تىزگىنى تۇگەل اعىلشىندار قولدارىنا كوشتى. ولار ماتچتىڭ سوڭىنا قاراي ءبىر­نەشە رەت جەڭىس دوبىن سوعىپ كەتە جازدادى. بىراق ماقساتتارىنا جەتە المادى. وسىنىڭ سالدارىنان توپتا ەكىنشى بولىپ قالدى. كەشە تۇندە ۋكراينا – پولشا, سولتۇستىك يرلانديا – گەرمانيا, چەحيا – تۇركيا, حورۆاتيا – يسپا­نيا اراسىنداعى ويىندارمەن ەكى توپتىڭ كوماندالارى كەزدەسۋلەرىن اياقتادى. بۇگىن قالعان ەكى توپتىڭ ويىندارى ءوز مارەسىنە جەتەدى. سەرىك ءپىرنازار, «ەگەمەن قازاقستان»