جۇمىلا كوتەرگەن جۇك جەڭىل

«اپات ايتىپ كەلمەيدى» دەگەن ءسوزدىڭ راستىعىنا كۇنى كەشە وتىرارلىقتاردىڭ كوزى تاعى ءبىر مارتە جەتتى. ماۋسىم ايىنىڭ 14-ءى كۇنى اۋىزاشار مەزگىلىندە سىركىرەپ باستالعان جاڭبىردان كوپشىلىك اسا سەكەم الا قويعان جوق. اپتا بويى تىنىس تارىلتقان اپتاپ ىستىقتان مەزى بولعان ادامدار سالقىن سامال, جىلى جاڭبىردان جاندارى جادىراپ, جايدارى كۇيدە اڭگىمەلەسىپ وتىرعان-دى. وسى ساتتە اسپاندى تورلاعان قويۋ قارا بۇلتقا قارسى باتىستان قاتتى جەل كوتەرىلگەن. جاي باستالعان جەلدىڭ سوڭى الاپات داۋىلعا ۇلاسىپ, بۇلتقا بۇلتتىڭ «سوقتىعىسۋىنان» شاقپاق ويناپ, نايزاعاي ۇرىپ, اينالا توڭىرەك ازان-قازان كۇيگە ءتۇستى. داستارقانىن جيناپ ۇلگەرمەگەن جۇرتشىلىق ۇيلەرىنە قاشىپ كىرىپ, ەسىك-تەرەزەنى قىمتاپ, ءالىپتىڭ ارتىن باعۋعا كوشتى. اينالانى الامان تاسىرعا اينال­دىر­عان تابيعاتتىڭ دۇلەي كۇشى حالىقتىڭ ۇرەيىن ۇشىردى. ساعاتقا جۋىق سوققان داۋىل­دان سوڭ, قاتتى جاۋعان نوسەر شاتىرلار­دى تەسىپ, سوڭىنان شيفەر, پروف­نوستيل جابىندىلارىن قاعاز قۇرلى كورمەي, وتىز-قىرىق مەتر جەرگە دەيىن ۇشىرىپ اكەتتى. قاتتى جەل مەن جاۋىننىڭ اسەرىنەن ەلەكتر جەلىلەرى بىرىنە-ءبىرى ايقاسىپ, قىسقا تۇيىقتالۋدىڭ كەسىرىنەن اۋدان جارىقسىز قالدى. ەرتەڭىنە ءمالىم بول­عان­داي, كوپتەگەن ەلەكتر باعانالارى دۇلەي كۇشكە توتەپ بەرە الماي قۇلاپ جاتتى. ءشاۋىلدىر اۋىلىن قاق جارىپ وتەتىن جىبەك جولى داڭعىلى بويىندا ورنالاسقان كوپقاباتتى ۇيلەر مەن م.شويمانوۆ, شىتتى اۋىلدارىنداعى مەكتەپتەر جانە الەۋمەتتىك نىسانداردان بولەك كوپتەگەن تۇرعىن-ۇيلەر اپات سالدارىنان قاتتى زارداپ شەكتى. وسىنداي قيىن ساتتە وتىرار اۋدان­دىق ءماسليحاتىنىڭ دەپۋتاتتارى كو­مەككە مۇقتاج اۋىل تۇرعىندارىنا العاش­قىلاردىڭ ءبىرى بولىپ قولۇشىن سوزۋدا. حالىق قالاۋلىلارى زيان كەلگەن 55 ۇيگە شيفەر جەتكىزىپ, ارنايى جاساق دايىنداپ, ولارعا كۇندەلىكتى اقىسىن وزدەرى تولەپ, شاتىرلارىن بۇتىندەپ بەردى. سونداي-اق, جىبەك جولى بويىنداعى №15, 17, 20, 29 ۇيلەرگە دە وسىنداي ءجون­دەۋ جۇمىستارى جۇرگىزىلدى. دەر كەزىندە جەتكەن كومەككە اۋىل تۇرعىندارىنىڭ ريزا­شىلىعى شەكسىز. سونداي-اق, اۋدان كاسىپكەرلەرى دە قاراپ قالماي, جەر-جەر­دە مۇمكىندىگىنشە كومەك جۇمىستارىن جۇرگىزۋدە. اپات سالدارىن جويۋ ءۇشىن كەشە, بۇگىن اۋدان كاسىپكەرلەرىنىڭ كومەگىمەن قايتا قالپىنا كەلتىرۋ جۇمىستارى قارقىندى ءجۇرىپ جاتىر. اۋدان اكىمى ە.ايتاحانوۆ باس بولىپ, ارنايى شتاب قۇرىلعان. تا­بيعي اپاتتىڭ زاردابىن جويۋ ءۇشىن وتى­رار­لىقتار ۋاقىتپەن ساناسپاي جۇمىس ىستەۋ­دە. ءيا, جۇمىلا كوتەرگەن جۇك جەڭىل دەمەك­شى, تابيعات اكەلگەن شىعىننىڭ ورنىن كوپشىلىك بولىپ قانا تولتىرا الامىز. وسىلايشا, وتىرارلىقتار مەملەكەت تارا­پىنان بەرىلەتىن كومەكتى كۇتپەي-اق قالپىنا كەلتىرۋ جۇمىستارىن باستاپ تا كەتتى. الماس اقىلبەك, جۋرناليست