*
19 ماۋسىم – مەديتسينا قىزمەتكەرى كۇنى
ەلوردانىڭ ەمحانالارىندا ناقتى سالانىڭ ماماندارىنا (ۋزكي سپەتسياليست) قارالۋدىڭ قانشالىقتى قيىن ەكەنىن قالا تۇرعىندارى جاقسى بىلەدى. بۇل كۇردەلى ماسەلەدەن بالالار ەمحانالارى دا سىرت قالعان جوق. وسىنداي جاعدايدا №2 قالالىق بالالار اۋرۋحاناسىنا قاراستى ەمحانادا 29 ءتۇرلى مەديتسينا سالاسىنىڭ ماماندارى قابىلداۋ جاسايدى ەكەن. ءبىر ەمحانادا وتىزعا تارتا سالا ماماندارى بالالار دەنساۋلىعىنا اراشا تۇرادى! تاماشا مۇمكىندىك!
«جاقسىنى كورمەك ءۇشىن» دەمەكشى, اتباسىن اتالمىش ەمدەۋ ورتالىعىنا بۇرىپ, وزىق ءتاجىريبەمەن تانىسۋعا اسىقتىق. ءبىزدى №2 قالالىق بالالار اۋرۋحاناسى پەدياتريا ءبولىمىنىڭ جەتەكشىسى, جوعارى ساناتتاعى دارىگەر گۇلنار ابلياەۆا قارسى الدى. بۇكىل سانالى عۇمىرىن بالالار دەنساۋلىعىنىڭ كۇزەتىنە ارناپ كەلە جاتقان گۇلنار رۇستەمقىزىنىڭ ساليقالى ەڭبەك جولى دا ونەگە تۇتۋعا تۇرارلىق ەكەن. ول – بۇگىنگى استانا مەديتسينالىق ۋنيۆەرسيتەتىندە 1979 جىلى العاش رەت اشىلعان پەدياتريا فاكۋلتەتىنىڭ تۇڭعىش تۇلەكتەرىنىڭ ءبىرى. 1989 جىلى ەلورداداعى №1 قالالىق بالالار اۋرۋحاناسىندا دارىگەر بولىپ قىزمەت كورسەتە باستاعاننان بەرگى ۋاقىتتا بارلىق ءبىلىمى مەن تاجىريبەسىن كىشكەنتاي استانالىقتاردىڭ مىقتى دەنساۋلىعى جولىنا سارپ ەتىپ كەلەدى.
– 350 توسەكتىك اۋرۋحانا جانە ءبىر اۋىسىمدا 250 بۇلدىرشىندەردى قابىلدايتىن ەمحانادان قۇرالعان ءبىزدىڭ مەديتسينالىق كەشەن بۇگىنگى حالىقارالىق مەديتسينالىق ستاندارتتارعا تولىق جاۋاپ بەرەدى, – دەپ باستادى اڭگىمەسىن №2 قالالىق بالالار اۋرۋحاناسى پەدياتريا ءبولىمىنىڭ باسشىسى. – ءبىزدىڭ ورتالىقتا نەگىزىنەن مەديتسينانىڭ ەڭ كۇردەلى دە جاۋاپتى سالاسى – مەديتسينالىق حيرۋرگياعا باسىمدىق بەرىلگەن. №2 بالالار اۋرۋحاناسى ەلورداداعى ۋرگەنتتىك ورتالىق بولىپ سانالادى. ياعني, قالامىزداعى بالالارعا قاتىستى بارلىق مەديتسينالىق جەدەل كومەك وسى ورتالىق ارقىلى كورسەتىلەدى. اۋرۋحانا مەن ەمحانا مەديتسينا سالاسى جەتىستىكتەرىنىڭ ەڭ وزىق ۇلگىلەرىمەن جابدىقتالعان. تەكسەرىستەن وتەتىن بۇلدىرشىندەردىڭ دەنساۋلىق ءدارەجەسىن ءدال انىقتايتىن ءساۋلەلى دياگنوستيكالىق رەنتگەن, ۋلترادىبىستىق قوندىرعىلار, بىردەن 64 سپيرالدىك كورىنىس جاسايتىن كومپيۋتەرلىك-توموگراف, يادرولىق ماگنيتتىك رەزونانستى توموگراف ءبىزدىڭ مەديتسينالىق كەشەننىڭ شىن ماقتانىشى بولىپ تابىلادى.
جوعارىدا ايتىپ وتكەنىمىزدەي, №2 بالالار اۋرۋحاناسىنىڭ ەمحانا بولىمىندە مەديتسينا سالاسىنىڭ ناقتى 29 ءتۇرىنىڭ ماماندارى قىزمەت كورسەتەدى. اتاپ ايتقاندا, ەپيلەپتولوگ, رەۆماتولوگ, نەۆروپوتولوگ, كارديولوگ, گەماتولوگ, گينەكولوگ, ۋرولوگ, نەفرولوگ, اللەرگولوگ, پروكتولوگ, سۋردولوگ جانە باسقا سيرەك كەزدەسەتىن ماماندىق يەلەرى وسى ەمحانادان تابىلادى. قازىر ەمحانا بولىمىندە 45 جوعارى ساناتتى مامان, ونىڭ ءىشىندە 3 مەديتسينا عىلىمدارىنىڭ كانديداتى قىزمەت جاسايدى.
ءارتۇرلى سالانىڭ تاجىريبەلى ماماندارىن ورتاق ىسكە جۇمىلدىرىپ, ەمحانانىڭ ەلورداداعى ىرگەلى دە بىلىكتى كەڭەستىك-دياگنوستيكالىق ورتالىققا اينالۋىنا ەمحانا ءبولىمىنىڭ باسشىسى, «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىنىڭ يەگەرى, تاجىريبەلى مامان گۇلنار ابلياەۆانىڭ قوسقان ۇلەسى ولشەۋسىز. ونىڭ وسىنداي ىسكەر ۇيىمداستىرۋشىلىق قابىلەتىنىڭ شىڭدالۋىنا وسى مەديتسينالىق كەشەندە قالىپتاسقان جوعارى كاسىبي شەبەرلىك مەكتەبىنىڭ ىقپالى زور بولعاندىعى داۋسىز. 2004 جىلى قالامىزداعى №2 بالالار اۋرۋحاناسىنىڭ جانىنان العاش رەت ەمحانا ورتالىعى اشىلعان بولاتىن. سول جىلى گۇلنار ابلياەۆا وسى جاس ۇجىمعا دارىگەر-پۋلمونولوگ رەتىندە جۇمىسقا قابىلداندى. ال 2007 جىلى №2 بالالار اۋرۋحاناسى باس دارىگەرىنىڭ ەمدەۋ جۇمىسى جونىندەگى ورىنباسارى بولىپ تاعايىندالدى. 2012 جىلدان باستاپ №2 بالالار اۋرۋحاناسى باس دارىگەرىنىڭ ەمحانا جۇمىسى جونىندەگى ورىنباسارى قىزمەتىن اتقارىپ كەلەدى. بۇگىندە اتالمىش ەمحانادا بۇلدىرشىندەردىڭ بويىنداعى سيرەك كەزدەسەتىن سىرقاتتاردى دەر كەزىندە انىقتاپ, ۋاقىتىندا ءتيىمدى ەمدەۋ شارالارىن جۇرگىزۋگە بارىنشا جاعداي جاسالعان.
– ەلورداداعى حالىقارالىق جوعارى مەديتسينالىق ستاندارتتارعا ساي جاڭا ۇلگىدەگى وسى بالالار اۋرۋحاناسىنىڭ بازاسىندا استانا مەديتسينالىق ۋنيۆەرسيتەتىنىڭ بالالار حيرۋرگياسى جانە پەدياتريا كافەدرالارى جۇمىس ىستەيدى. جالپى, ءبىزدىڭ اۋرۋحانادا بالالار حيرۋرگياسى سالاسىنا باسىمدىق بەرىلىپ, وسى كۇردەلى سالا بويىنشا ۇجىمنىڭ جوعارى تالاپ ۇدەسىنەن كورىنۋىنە اۋرۋحانانىڭ باس ءدارىگەرى, مەديتسينا عىلىمدارىنىڭ دوكتورى, پروفەسسور, ەلىمىز بويىنشا بالالار حيرۋرگياسىنىڭ قازىرگى ۋاقىتتاعى بىلىكتى مامانى راسۋلبەك راحمانبەردى ۇلى ايپوۆتىڭ سىڭىرگەن ەڭبەگى زور, دەيدى ۇزىلگەن اڭگىمەسىن ودان ءارى ساباقتاعان گۇلنار رۇستەمقىزى. وسى رەتتە ەرەكشە اتاپ وتەتىن ءبىر ماسەلە, ءبىزدىڭ اۋرۋحانادا سوڭعى كەزدە بۇلدىرشىندەردىڭ بەت-جاق مۇشەلەرىن ەمدەۋ بولىمشەسى اشىلدى. ومىرگە ەندى عانا كەلگەن نارەستەلەردىڭ اراسىندا ەرنى جىرىق, تاڭدايى جوق جانە باسقا تۋا بىتكەن كەمىستىكتەرى بار سابيلەردىڭ كەزدەسەتىنى جاسىرىن ەمەس. بۇرىن مۇنداي سابيلەرگە وتا جاساۋ ءۇشىن رەسپۋبليكالىق ورتالىقتارعا, ءتىپتى شەتەل ماماندارىنىڭ كومەگىنە جۇگىنۋ قاجەت بولاتىن. №2 قالالىق بالالار اۋرۋحاناسىندا اشىلعان بۇلدىرشىندەردىڭ بەت-جاق مۇشەلەرىن ەمدەۋ بولىمشەسى تۋا بىتكەن كەمىستىگى بار مۇنداي نارەستەلەرگە بىردەن وتا جاساپ, قۇلان-تازا ساۋىقتىرىپ جىبەرەدى.
ەمحانا ءبولىمى جەتەكشىسىنىڭ ايتۋى بويىنشا, بۇرىن قالامىزدا جازاتايىم كۇيىككە شالدىققان, ۇسىككە ۇشىراعان بالالاردى ەمدەيتىن جەكە ورتالىق بولماعان ەكەن. مۇنداي بۇلدىرشىندەر ەرەسەكتەر اۋرۋحاناسىنداعى ارنايى بولىمدەردە ەمدەلىپ كەلگەن. ونىڭ وزىندىك قيىندىقتارى دا كوپ بولدى. ويتكەنى, كۇيىك, ۇسىك سياقتى جازاتايىم اپاتتارعا بالالاردىڭ ءجيى ۇشىرايتىندىعى بەلگىلى. مىنە, سوندىقتان اتالمىش مەديتسينالىق كەشەندە اشىلعان بالالاردى كۇيىكتەن جانە ۇسىكتەن ەمدەۋ ورتالىعى رەسپۋبليكامىزدىڭ بالالار مەديتسيناسى سالاسىنداعى ۇلكەن جەتىستىكتەردىڭ ءبىرى ەكەندىگى داۋسىز.
ءومىردىڭ قاي سالاسى بولماسىن, بىلىكتى مامانعا جۇكتەلەتىن جاۋاپكەرشىلىك جۇگى ۇلكەن. بۇل ماسەلەنىڭ, اسىرەسە, دەنساۋلىق سالاسىندا سالماعى ەرەكشە ارتاتىنى دا اقيقات. «ءبىزدىڭ №2 قالالىق بالالار اۋرۋحاناسىنىڭ مەديتسينالىق قىزمەت ساپاسىن جانە ەمدەۋ شارالارىنىڭ تيىمدىلىگىن ارتتىرا وتىرىپ, قالامىزداعى ەمدەۋ ورتالىقتارىنىڭ كوشباسىنان كورىنۋىنە ۇجىمداعى ءتاجىريبەلى دە بىلىكتى مامانداردىڭ ەڭبەگى زور. بۇل رەتتە جوعارى ساناتتاعى دارىگەر-كارديولوگ عايشا بالتاشەۆانىڭ, جوعارى ساناتتاعى دارىگەر-نەۆروپاتولوگ اليا دوسىمبەكوۆانىڭ, جوعارى ساناتتاعى ءدارىگەر-تراۆماتولوگ-ورتوپەد ناتاليا چجەن جانە باسقالاردىڭ ەسىمىن ەرەكشە اتاپ وتكەن ءجون», دەيدى ەمحانا ءبولىمىنىڭ جەتەكشىسى گۇلنار ابلياەۆا ءارىپتەستەرىنىڭ ەڭبەگىنە دەگەن زور ءىلتيپات سەزىممەن.
ەلورداداعى ەڭسەلى دە ىرگەلى ەمدەۋ ورتالىعىنداعى قالىپتاسقان وسى ءبىر جوعارى ەڭبەك احۋالى مەن جاس استانالىقتارعا كورسەتىلەتىن ساپالى مەديتسينالىق قىزمەتكە كۋا بولىپ, كوڭىلىمىز شىنايى العىس سەزىمىنە تولدى. سونىمەن بىرگە, وسى مامىراجاي ماۋسىم ايىندا ەلىمىز بويىنشا ەرەكشە اتالىپ وتىلەتىن دەنساۋلىق ساقتاۋ سالاسى قىزمەتكەرلەرىنىڭ كاسىبي مەرەكەسىمەن اق حالاتتى ابزال جانداردى شىن جۇرەكتەن قۇتتىقتاپ, ساتتىلىك جانە تابىس تىلەدىك.
جىلقىباي جاعىپار ۇلى,
«ەگەمەن قازاقستان»
استانا
