«نۇر وتان» پارتياسى شىعىس قازاقستان وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ اقپارات جانە بايلانىس كۇنى مەرەكەسى قارساڭىندا وڭىردەگى بۇقارالىق اقپارات قۇرالدارى وكىلدەرىمەن كەزدەسىپ, تىلشىلەر قاۋىمىن الداعى كاسىبي مەرەكەلەرىمەن قۇتتىقتادى.
پارتيا فيليالى توراعاسىنىڭ ءبىرىنشى ورىنباسارى جۋرناليستەرمەن جۇزدەسۋ بارىسىندا ءتىلشى قىزمەتىنىڭ قوعامداعى ماڭىزى وتە جوعارى ەكەنىن جەتكىزىپ, پارتيالىق جوبالاردىڭ وڭىردەگى جۇزەگە اسىرىلۋى بۇقارالىق اقپارات قۇرالدارىندا بەلسەندى تۇردە ناسيحاتتالىپ وتىرعانىن, حالىقتىڭ كوكەيكەستى ماسەلەلەرى پارتيا فيليالىنىڭ توراعاسى دانيال احمەتوۆتىڭ «نۇر وتان» پارتياسى عيماراتىنداعى جەكە قابىلداۋى ارقىلى تولىق شەشىمىن تاۋىپ كەلە جاتقانىن اتاپ ءوتتى.
«بارشاڭىزدى كاسىبي مەرەكەلەرىڭىزبەن شىن جۇرەكتەن قۇتتىقتايمىن. سىزدەرگە شىعارماشىلىق تابىس جانە ەڭبەكتەرىڭىزگە ساتتىلىك تىلەيمىن. سىزدەر بيىل 25 جىل تولعان تاۋەلسىزدىك تاريحىن حاتقا ءتۇسىرۋشى, ەلگە تاراتۋشى عانا ەمەس, وزدەرىڭىز دە وسى ۇلى ءىستىڭ قاتىسۋشىسىزدار, – دەدى انۋاربەك مۇحتارحانوۆ.
جيىن سوڭىندا پارتيا فيليالىنىڭ جۇمىسىن ناسيحاتتاپ جۇرگەن جۋرناليستەردىڭ جۇمىستارى سارالانىپ, نەگىزگى 4 باعىت بويىنشا, ياعني «ۇزدىك تەلەارنا ءجۋرناليسى, «ۇزدىك گازەت ءجۋرناليسى», «ۇزدىك راديو ءجۋرناليسى», «ۇزدىك اقپاراتتىق اگەنتتىك ءجۋرناليسى» اتالىمىنىڭ يەلەرىنە «التىن قاۋىرسىن» تابىستالدى. سونىمەن قاتار, پارتيا فيليالىنىڭ جۇمىسىن ناسيحاتتاۋدا زور بەلسەندىلىك تانىتقاندارى ءۇشىن بىرقاتار جۋرناليستەر ارنايى سىيلىقتارمەن ماراپاتتالدى.
«ءبىز اقپارات قۇرالدارىندا جەرگىلىكتى ماسەلەلەردى كوتەرىپ جاتساق, ونىڭ شەشىلۋىنە «نۇروتاندىقتار» تىكەلەي قولداۋ كورسەتىپ, سايلاۋالدى پارتيالىق تۇعىرنامانىڭ جۇزەگە اسۋىنا اتسالىسىپ كەلەدى. وسى ورايدا, ورتاق ءىسىمىز جەمىستى بولىپ, ەلىمىز كوركەيە بەرسىن», – دەدى قازاق راديوسىنىڭ شىعىس قازاقستان وبلىسى بويىنشا مەنشىكتى ءتىلشىسى داۋلەت ابىلقاسىموۆ.
دۋمان اناش.
دەرەك, فوتو: «نۇر وتان» پارتياسىنىڭ شىعىس قازاقستان وبلىسى فيليالىنىڭ ءباسپاسوز قزمەتى.
