شىعىس قازاقستاندا زايسان اۋدانىنىڭ اكىمى تاعايىندالدى

وسكەمەن. 16 ماۋسىم. شىعىس قازاقستان وبلىسىنىڭ اكىمى دانيال احمەتوۆتىڭ وكىمىمەن وسىعان دەيىن وسكەمەن قالاسىنىڭ اكىمى بولعان تەمىربەك جۇماقۇل ۇلى قاسىمجانوۆ زايسان اۋدانىنىڭ اكىمى بولىپ تاعايىندالدى. وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ اۋدان اكتيۆىنە جاڭا باسشىنى تانىستىردى. تەمىربەك قاسىمجانوۆ 1957 جىلى 20 تامىزدا شىعىس قازاقستان وبلىسى زايسان اۋدانى جارسۋ اۋىلىندا تۋعان. ول 1981 جىلى تومسك قۇرىلىس-ينجەنەر ينستيتۋتىن «ينجەنەر-قۇرىلىسشى», 1998 جىلى شىعىس قازاقستان تەحنيكالىق ۋنيۆەرسيتەتىن «ينجەنەر-ەكونوميست, مەنەدجەر» ماماندىعى بويىنشا بىتىرگەن. ەڭبەك جولىن زايسان اۋدانىنداعى قارابۇلاق كەڭشارىندا جۇمىسشىدان باستاعان. جوعارى وقۋ ورنىن اياقتاعاننان كەيىن شىعىس قازاقستان وبلىستىق تۇرعىن ءۇي-كوممۋنالدىق شارۋاشىلىعىنىڭ ينجەنەرى, باس ينجەنەرى بولدى. كەيىن وسكەمەن قالاسىنىڭ وكتيابر اۋداندىق اكىمشىلىگىنىڭ ورىنباسارى, ءبىرىنشى ورىنباسارى بولىپ قىزمەت اتقاردى. 2001-2008 جىلدارى وبلىستىق قۇرىلىس باسقارماسى باسشىسىنىڭ ورىنباسارى, كەيىن باسشىسى لاۋازىمدارىندا بولدى. تەمىربەك قاسىمجانوۆ 2008 جىلدىڭ تامىز ايىنان 2009 جىلدىڭ ناۋرىز ايىنا دەيىن وسكەمەن قالاسىنىڭ اكىمى, 2009 جىلدىڭ ساۋىرىنەن 2013 جىلدىڭ مامىر ايىنا دەيىن جارما اۋدانىنىڭ اكىمى قىزمەتتەرىن اتقاردى. كەيىن قايتادان 2016 جىلدىڭ 20 ساۋىرىنە دەيىن وبلىس ورتالىعىن باسقاردى. دۋمان اناش. دەرەك, فوتو: شىعىس قازاقستان وبلىسى اكىمدىگىنىڭ ءباسپاسوز قىزمەتى.