«Vaskania» كيىمدەرىنە سۇرانىس ارتتى

سەمەي كەڭەستىك كەزەڭدە جەڭىل ونەركاسىپ ورتالىعى رەتىندە دامىعان قالا بولعانى بەلگىلى. سوڭعى جىلدارى شاھاردىڭ جەڭىل ونەركاسىپتەگى الەۋەتى قايتا قارقىن الىپ كەلەدى. تاياۋدا سەمەيدەگى ساپارىمىزدىڭ اياسىندا «Vaskania» كيىم تىگۋ فابريكاسىنىڭ جۇمىسىمەن تانىسقان ەدىك. بۇگىندە كيىم-كەشەك سالاسىندا بەلگىلى برەندكە اينالا باستاعان «Vaskania» ءسوزى قازاق تىلىندە «تۇمار» دەگەن ۇعىمدى بىلدىرەدى. وسىدان 15 جىل بۇرىن قۇرىلعان كيىم اتەلەسى نەگىزىنەن ءوندىرىس ورىندارى مەن كاسىپورىندار­دىڭ قىزمەتكەرلەرىنە ارنالعان جۇمىس كيىمدەرىن تىگۋمەن شۇعىلدانا­دى جانە تەرى مەن بىلعارىدان ەكس­كليۋزيۆتى كيىم تۇرلەرىن تىگەدى. «Vaskania» ءونىمى جاڭاشىلدىعى­مەن جانە ءسان سالاسىنداعى ۇردىستەردى ءدوپ باساتىندىعىمەن ەرەكشەلەنەدى ەكەن. كاسىپورىن جەتەكشىسى يرينا بۋلۋتحانوۆا ءبىزدى جىلى شىرايمەن قارسى الىپ, فابريكا قىزمەتى جونىندە اڭگىمەلەدى. مودەلەر-كونسترۋكتور رەتىندە 30 جىلعا تاياۋ وسى سالادا ەڭبەك ەتكەن, وندىرىسكە يننوۆاتسيالىق كوزقاراسپەن قاراي الاتىن يرينا نيكولاەۆنا ءوزىنىڭ امەريكالىق بيزنەس-مەنەدجەر برايان ترەي­سيدىڭ شاكىرتى بولعاندىعىن, مودەلەرلەردىڭ شاقىرۋىمەن ءۇش جىل بويى تۇركيانىڭ ىستانبۇل قالاسىندا جانە كەيىننەن اسكەري كيىمدەر تىگۋگە شەشىم قابىلداعان ساتتە قىتايدىڭ اسكەري زاۋىتىن­دا ءبىر جىلعا جۋىق تاجىريبە جي­ناۋ ءۇشىن جۇمىس ىستەگەنىن ماقتانىشپەن ايتىپ ءوتتى. كاسىپكەر ءبىزدى الدىمەن كيىم­دەردىڭ ءتۇرلى ۇلگىلەرى قويىل­عان ارنايى بولمەگە باستادى. مۇندا اسكەري, وندىرىستىك جانە اڭشىلار مەن بالىقشىلارعا ارنالعان كيىم ۇلگىلەرى مەن ءارتۇرلى كەشتەرگە ارنالعان ساندىك كيىمدەر دە مول ەكەن. باس كيىمدەردىڭ ءوزى ءبىر توبە. تەرىدەن تىگىلگەن كيىمدەر بولىمىندە ساپالى بىلعارىدان, باعالى اڭ تەرىلەرىنەن, قاراكول ەلتىرىسىنەن تىگىلگەن قىسقى, كۇزگى ماۋسىمعا ارنالعان سىرتقى كيىمدەر قويىلعان. ونىڭ اراسىندا جۇلما تون, كۇزەن ىشىك, بىلعارى كۇرتكە سىندى كيىمدەر كوز تارتارلىقتاي كوركەم ءتى­گىل­گەنىن بايقادىق. سونداي-اق, توقىما بولىمىندە مەكتەپ وقۋ­شى­لارىنىڭ فورمالارىنا تاپسىرىستار قابىلدايدى. ءبىر ەسكەرەتىنى, قازىرگى بالالاردىڭ دا, اتا-انالاردىڭ دا تاڭداۋى ەرەكشە. وسى ورايدا مەكتەپتەردىڭ وقۋشىلارعا ارنالعان فورمالارى كەلەسى ءبىلىم ورداسىنىڭ كيىمىنە ۇقساي بەرمەيتىنى راس. ياعني, مەكتەپتەردىڭ تاڭداۋى بويىنشا وقۋشى كيىمدەرىن دە ءتۇرلى ستيلدە تىگۋگە تۋرا كەلەدى. قازىرگى كەزدە كاسىپورىننىڭ 6 جاستان 16 جاسقا دەيىنگى قىزدار مەن ۇلدارعا ارنالعان مەكتەپ فورماسىنىڭ ارنايى كاتالوگى قالا وقۋشىلارىنا تانىستىرىلۋدا. قولىمىزعا ۇستاپ كورگەن كويلەك, جەيدەلەردىڭ ساپالى ماتەريالداردان تىگىلەتىنىن بايقادىق. كاسىپكەر ساپالى ماتالاردى رەسەي, يتاليا, فرانتسيا وندىرۋشىلەرىنەن, جوعارى دەڭگەيدە وڭدەلگەن تەرى مەن بىلعارىنى تۇركيادان الاتىنىن ايتتى. «Vaskania» فيرماسى كيىم­دەردى تاپسىرىسپەن تىگەدى. تۇ­تى­نۋشىلار اراسىندا جاڭا كيىم­دەرگە عانا ەمەس, ەسكى كيىمدەردى وڭدەۋگە نەمەسە ساندىك تۇرعىدان قايتا پىشىمدەۋگە تاپسىرىس بەرۋشىلەر دە ءجيى كەزدەسەدى. بۇل رەتتە كاسىپورىن قىزمەتكەرلەرى ءتۇرلى كيىم ۇلگىلەرىن تۇتىنۋشى نازارىنا ۇسىنۋمەن بىرگە قاجەتتى جاعدايدا تۇتىنۋشىلاردىڭ جەكە قالاۋى بويىنشا ساندىك جۋرنالداردان نەمەسە ينتەرنەتتەن ۇناتقان كيىم ۇلگىلەرىنىڭ سۋ­رەتتەرى ارقىلى دا تاپسىرىس قابىلدايدى. – ءبىزدىڭ نەگىزگى باعىتىمىز جۇمىس كيىمدەرىن تىگۋگە ار­نالعان. تەرىمەن دە جۇمىس ءىس­تەيمىز. تاپسىرىس بويىنشا ءتى­گۋمەن, وڭدەۋمەن جانە جاڭا كيىم ۇلگىلەرىن دايارلاۋمەن اينالىسامىز. كاسىپورىنداعى جاس­تاردى ۇيرەتۋگە دەن قويامىز. قىزمەتكەرلەرىمىز تۇراقتى تۇردە كاسىبي بىلىكتىلىكتەرىن جەتىلدىرىپ تۇرادى. ءوز ونىمدەرىمىز بويىنشا كورمەلەرگە قاتىسامىز. جۋىردا عانا الماتىدا 18 مەملەكەتتىڭ قاتىسۋىمەن وتكەن كورمەگە قاتىستىق­. قاتىسۋشىلاردىڭ اراسىندا اقش, يتاليا, قىتاي سياقتى جەڭىل ونەركاسىپتى جولعا قويعان مەملەكەتتەردىڭ وكىلدەرى بولدى. دەسە دە, ءبىزدىڭ ونىمدەرىمىز شەتەلدىك تاۋارلاردان كەم ءتۇس­كەن جوق. دەگەنمەن, نەگىزگى تۇ­تىنۋشىلارىمىز جەرلەستەرىمىز بولىپ وتىر. ولاردىڭ اراسىندا, بانك, قۇرىلىس مەكەمەلەرى مەن قۇقىق قورعاۋ ورگاندارى, باق, كوممۋنالدىق قىزمەت سالالارى بار, – دەيدى يرينا نيكولاەۆنا. «سەمەي سيليكات كىرپىش زاۋى­تى», «سەمەي ەت كومبيناتى», «قا­لا­جولقۇرىلىس» سىندى ۇزاق جىلداردان بەرى ۇزدىكسىز تاپسىرىس بەرىپ كەلە جاتقان مەكەمەلەر كاسىپورىننىڭ تۇراقتى ءارىپ­تەستەرى ساناتىندا. – ءبىز كاسىپورىنداردان تاپسىرىس قابىلداعاندا, جۇمىس فورماسىن قاراپايىم جۇمىسشىدان باستاپ, تەحنولوگ, ينجەنەر سىندى ىشكى قىزمەت ساتىسى دا ايقىن اڭعارىلاتىنداي ەتىپ پىشىمدەيمىز. بۇل ەرەكشەلىك كيىمنىڭ ستيلىنەن كورىنىس تابادى. سونداي-اق, ۇنەمى جاڭا مودەل شىعارۋ جولىندا ەڭبەكتەنەمىز, – دەدى ول. قازىرگى كەزدە تسەحتا 21 تىگىنشى جۇمىس ىستەسە, ولاردىڭ ىشىندە ءمۇم­كىندىگى شەكتەۋلى 6 ادام ءناپا­قاسىن وسى جەردەن تاۋىپ وتىر. تىگىنشىلەردىڭ ورتاشا ەڭبەكاقىسى 50 مىڭ تەڭگەنى قۇرايدى ەكەن. ال تاپسىرىلعان جۇمىس كولەمى ۋاقىتىندا جانە ساپالى ورىندالىپ, ءارى قاراي ەڭبەك كولەمى ۇلعايسا ەڭبەكاقىعا دا ۇستەمە قوسىلادى. «Vaskania» ءونىمى نارىقتاعى با­عاعا قاراعاندا 20-30 پايىزعا ارزاندىعىمەن دە ەرەكشەلەنەدى. دۋمان اناش, «ەگەمەن قازاقستان» سەمەي