قالا. تەڭىز جاعاسى. كۇيساندىق

اقتاۋدا تەڭىز جاعالاۋىنا كەلۋشىلەر ءۇشىن كوڭىل كوتەرۋگە, تىنىعۋعا ارنالعان كۇيساندىق مۋزىكالىق اسپابى قويىلدى. انگليادا 2008 جىلى قولعا الىنىپ, قازىر الەمگە تانىلعان جو­بانى اقتاۋلىق ەكى جاس جىگىت جۇزەگە اسىردى. يدەيا اۆتورلارى – جەرگىلىكتى ماشينا قۇراستىرۋ زاۋىتىندا جۇمىس ىستەيتىن شىڭ­عىس ەسبوسىنوۆ پەن دامير جان­سۋپوۆ كلاسسيكالىق مۋزى­كانىڭ تىڭدارماندارى ەكەن. كەزىندە مۋزىكا سالاسىن­دا فورتەپيانو سىنىبىندا ءبىلىم العان شىڭعىس «كوشە كۇي­سان­دىعى» يدەياسى ويىنا كەلگەن سوڭ, ءوز ۇيىندەگى مۋزىكالىق اس­پاپ­تى كوشە بويىندا كوپشىلىك ءۇشىن  كادەگە جاراتۋدى ويلاعان. باستامالارى اقتاۋ قالالىق اكىم­دىگىنەن قولداۋ, جەرگىلىكتى ونەر مەكتەبىنەن دەمەۋ تاپقاندىقتان, كۇيساندىق كوپ ۇزاماي اقتاۋ قالاسىنداعى 15-شاعىن اۋداننىڭ تەڭىز جاعالاۋىنا ورنالاستى. كۇي­ساندىققا كەلۋ­شىلەر كوپ. ولار­دىڭ اراسىنان ورىنداۋشىلار دا تابىلىپ جاتىر. ال, بىلايعى جۇرت, جاس-كارى دەمەي, تازا اۋادا كوپشىلىك بولىپ مۋزىكا تىڭداپ دەمالعاندى جوعارى باعالاۋدا. ال مۋزىكا ماماندارى بولسا, بۇل كوڭىلدى دەمالىسپەن بىرگە, كلاس­سيكالىق مۋزىكانى ناسيحاتتاۋ دەپ وتىر. ەۋروپا ەلدەرىندە «كوشە كۇيساندىعى» تەمىرجول ۆوكزالى, اۋەجاي, دەمالىس باقتارى سىندى ادام كوپ جينالاتىن جەرلەرگە قويىلاتىندىعىن ەسكەرىپ, جوبا اۆتورلارى حالىقتىڭ قىزى­عۋشىلىعىنا قاراي وتىرىپ, مۇمكىندىگىنشە قالانىڭ تاعى ءبىر­قاتار جەرلەرىنە كۇيساندىق قويۋدى جوسپارلاپ وتىر. گۇلايىم شىنتەمىرقىزى, «ەگەمەن قازاقستان» اقتاۋ