بەس جىل بويى ءبىلىم ۇزدىگى

مىنە, وسىمەن جامبىل وبلىسىنىڭ ورەندەر قاتارىنان بەسىنشى جىل ءبىلىم سايىستارىندا جۇزدەن – جۇيرىك, مىڭنان تۇلپار شىعىپ, ەلىمىز بويىنشا ۇزدىك اتانىپ وتىر. وسى وقۋ جىلىندا حالىقارالىق, رەسپۋبليكالىق ءپان وليمپيادالارى مەن عىلىمي جارىستارعا قاتىسقان 272 جامبىلدىق وقۋشىنىڭ 137-ءسى جەڭىمپاز اتاندى. ونىڭ 63-ءى حالىقارالىق وليمپيادالار مەن عىلىمي جارى­س­تاردا, 37-ءسى رەسپۋبليكالىق ءپان وليم­پيا­دالارىندا, 17-ءسى رەس­پۋب­ليكالىق عىلىمي جوبالار جارىستارىندا, 3-ءى پرەزيدەنتتىك وليمپيادادا, 2-ءى رەسپۋبليكالىق ق.بىتىباەۆا اتىنداعى قازاق ءتىلى وليمپياداسىندا, 15-ءى رەسپۋبليكالىق 2-7 سىنىپ وقۋشىلارى اراسىندا وتكەن «زەردە» عىلىمي جوبالار جارىسىندا جۇلدەگە قول جەتكىزدى. رەسپۋبليكالىق پاندەر وليم­پياداسىنىڭ سوڭعى بەس جىلعى جانە عىلىمي جوبالار جارىسىنىڭ سوڭعى ءتورت جىلعى قورىتىندىسى بويىنشا جامبىل وبلىسىنىڭ وقۋشىلارى كوماندالىق ءبىرىنشى ورىندى يەلەنىپ, «ەڭ ۇزدىك كوماندا» اتاندى. – مەن وبلىستىق دارىندى بالالارعا ارنالعان ءۇش تىلدە وقىتاتىن مامانداندىرىلعان مەكتەپتىڭ تۇلەگىمىن, – دەيدى ءۇز­دىك وقۋشى الينا تاراسوۆا. – حا­لىقارالىق «ماتەماتيكا ءجا­نە جوبالاۋ» عىلىمي جوبالار جارىسىنىڭ قولا مەدال يەگەرى, رەسپۋبليكالىق ءپان وليم­پياداسىنىڭ جەڭىمپازىمىن. كىشكەنتايىمنان قازاق ءتىلىن ۇيرەندىم. بۇگىنگى تاڭدا ءۇش تىلدە ەركىن سويلەيمىن. ءبىز ءبىلىمدى جاس­تار  وبلىسىمىزدى, ەلىمىزدى كوركەيتۋگە ۇلەس قوسقىمىز كەلەدى. جامبىل وبلىسىنىڭ اكىمى كارىم كوكىرەكباەۆ دارىندى جاس­تارمەن كەڭ وتىرىپ اڭگىمەلەسىپ, وقۋشىلار مەن ولاردى وقىتقان ۇستازدارعا زور قۇرمەت كورسەتتى. كەشە عانا وتكەن ۇلتتىق بىرىڭعاي تەستىلەۋدىڭ قورىتىندىسى بويىنشا جامبىل وبلىسىنىڭ جالپى ورتا باللى 78,5 پايىزدى قۇراعان بولاتىن. ۇبت قورىتىندىسى بو­يىن­شا وبلىستا ءۇش مەكتەپ ءبىتىرۋشى 124 بالل جينادى. ورالحان ءداۋىت, «ەگەمەن قازاقستان» جامبىل وبلىسى