فرانتسيا تاعى دا اۋپىرىممەن جەڭدى

* دودا فرانتسۋز جەرىندە ءوتىپ جاتقان فۋتبولدان ەۋروپا چەمپيوناتىنىڭ بۇرناعى كۇنى باستالعان ەكىنشى تۋرىندا الاڭ يەلەرى البانيا قۇراماسىن 2:0 ەسەبىمەن جەڭسە, سلوۆاكيا رەسەيدى 2:1 ەتىپ تىزە بۇكتىردى, ال رۋمىنيا مەن شۆەيتساريا اراسىنداعى كەزدەسۋ 1:1 بولىپ تەڭ تارقادى. وسىلايشا فرانتسيا ەكى ويىندا بىردە-ءبىر ۇپاي جوعالتپاعان تۋرنيردەگى ەڭ العاشقى قۇراما اتاعىنا قول جەتكىزدى. بىراق الدىڭعى ۇشىراسۋداعى سياقتى بۇل ويىندا دا ولارعا جەڭىسكە جەتۋ وڭايعا سوعا قويمادى. ادەتتە كەز كەلگەن ويىننىڭ قالاي وتكەنى ۇمىت بولادى دا, كەيىن ونىڭ ەسەبى عانا ەستە قالادى. ءبىز ءسوز ەت­كەلى وتىرعان ءۇش ماتچتىڭ ەكەۋىن­دەگى احۋال وسى تۇجىرىمدى ايعاقتاي تۇسەدى. قۇرلىق بىرىنشىلىگىندە فاۆوريتتەر قاتارىنان ورىن الماعانىمەن, رەسەي باس جاساعىنىڭ سلوۆاكيادان ۇتىلىپ قالۋى ماماندار تاراپىنان كۇتپەگەن جاعداي سانالدى. شىنىندا دا رەسەيلىكتەردىڭ وسى كۇنى قارسىلاستارىنا ەسە جىبەرىپ الاتىنداي رەتتەرى جوق ەدى. ولار ءبىرىنشى تۋردا اعىلشىندارمەن تەڭ ويناعاننان كەيىن كەزدەسۋگە كوتەرىڭكى كوڭىل كۇيمەن كەلدى. سلوۆاكتار بولسا, العاشقى ماتچ­تا ۋەلستەن 1:2 ەسەبىمەن جەڭىلىپ قالعان. ءبىزدىڭ كورشىلەرىمىز وپ­تيميستىك سارىنداعى ارمان-ويلارىن ويىننىڭ العاشقى جارتى ساعاتىندا انىق بايقاتتى. وسى بولىكتە ولار قارسىلاستار قاقپاسىنا قاراي انگليامەن تەكەتىرەستىڭ بۇكىل ءون بويىنداعىدان دا ارتىق سوققى جاساپ ۇلگەردى. سوعان قاراماستان, ماتۋش كوزاچيكتىڭ دوپ جولىنا دومالاي قۇلاعان ءساتى ونشالىقتى كوپ بولعان جوق. الدىن الا ايتا كەتەيىك, سوڭىنان ماتچتىڭ ۇزدىك ويىنشىسى اتاعى تاپ وسى قاقپاشىعا بەرىلدى. ءبىر قىزىعى, سلوۆاكتار بۇل جولى ۆالليلىكتەرمەن وتكەن ءبىرىنشى سۇرگىن كەزىندەگىدەن دە ناشار وينادى. بىراق مۇنىڭ ءوزى ولاردىڭ ءبىرىنشى تايمدا ەكى گول سالىپ, تۋرنيردە وسىنداي جەتىستىككە جەتكەن العاشقى كوماندا اتانۋىنا ەشبىر كەدەرگى كەلتىرە المادى. گول دا كۇتپەگەن جەردەن سوعىلدى. رەسەيلىكتەر شا­بۋىلىنىڭ نوپىرىندە قالعان سلوۆاكتار جارتىلاي قورعاۋشىسى مارەك گامشيك الاڭ ورتاسىندا اياعىنا دوپ تيىسىمەن ونى الدىنداعى ۆلاديمير ۆايسسقا اسىرىپ تاستادى. سول-اق ەكەن, قۇيىنداي ۇشقان شابۋىلشى دەمدە قارسى قاقپا الدىنا جەتىپ بارىپ, سناريادتى وڭ جاق بۇرىشقا سولقىلداتا اتىپ جىبەردى. گول! ال تايم تۇگەسىلەر شامادا گامشيكتىڭ ءوزى بۇرىشتامادان كەلگەن دوپتى ايىپ الاڭىنىڭ سىرت جاعىندا قابىلداپ الىپ, قاقپاعا الىستان ۇرىپ ءتۇسىردى. رەسەيلىكتەر تەك ەكىنشى تايمنىڭ سوڭىنا قاراي دەنيس گلۋشاكوۆتىڭ كۇش سالۋىمەن ءبىر دوپتىڭ قارىمتاسىن قايتارىپ ۇلگەردى. ولار بۇعان دەيىن دە, بۇدان كەيىن دە تىنىمسىز جاساعان شابۋىلدارىنىڭ بىردە-بىرىنەن ناتيجە شىعارا الماعان. ءبىرىنشى تۋردا بارىن سالىپ ويناعان البانيا الاڭ يەلەرىمەن كەزدەسۋدە دە ايانىپ قالعان جوق. ولار ديدە دەشام شاكىرتتەرىن اتتاپ اياق باستىرمادى. فرانتسۋزدار ەكىنشى تايمدا پول پوگبا مەن انتۋان گريزمانن شىققاسىن عانا ەركىندەۋ وينادى. بىراق 90-مينۋتقا دەيىن قارسىلاستار قاقپاسىنا ءبىر رەت تە تۋرا سوققى جاساي المادى. راس, دوپ ءبىر مارتە قاقپا جاقتاۋىنان قايت­قان. بىراق مۇنداي «تابىس» البانداردى اينالىپ وتپەپ ەدى. ءبارىن گريزماننىڭ گول سوعۋى بۇزىپ جىبەردى. ال ەكىنشى گولدى فرانتسۋزدار (ديميتري پايە) تورەشىنىڭ نەگىزگى ۋاقىتقا قوسقان 6-مينۋتىندا (!) عانا سالدى. ءسويتىپ, سوڭعى ساتكە دەيىن تەڭ تۇرعان ويىن اياق استىنان ەكى دوپ ايىرىمىمەن الاڭ يەلەرىنىڭ پايداسىنا شەشىلىپ شىعا كەلدى. بۇلارعا قاراعاندا, رۋمىنيا مەن شۆەيتساريا اراسىنداعى ماتچ جالپى كورەرمەن قاۋىمنىڭ ايرىقشا قىزىعۋىن تۋعىزعان جوق. بۇعان ستاديوننىڭ ءبىرىنشى رەت تولماي قالعانى دا ايعاق. سوعان قاراماستان, مۇندا دا كەسكىلەسكەن شايقاس ءجۇرىپ جاتتى. وندا تاعى دا رۋمىندار جال­عىز گولدارىن پەنالتيدەن سالدى. ال شۆەيتساريالىقتار تارازى باسىن تەڭەستىرۋ ءۇشىن كوپ كۇش جۇمسادى. كەشە تۇندە انگليا – ۋەلس, ۋكراينا – سولتۇستىك يرلانديا جانە گەرمانيا – پولشا كەزدەستى. سەرىك ءپىرنازار, «ەگەمەن قازاقستان»