شىعىس قازاقستان وبلىستىق ساۋلەت-ەتنوگرافيكالىق جانە تابيعي-لاندشافت مۋزەي-قورىعىنىڭ «التاي» گالەرەياسىندا «بالالىق قايدا باراسىڭ؟» اتتى فوتوسۋرەتتەر كورمەسى اشىلدى. كورمە يەسى – وسكەمەندەگى №39 مەكتەپتىڭ 8-سىنىپ وقۋشىسى داريا باجەنوۆا. داشا ەكى جىل بۇرىن فوتوونەرگە شىنداپ دەن قويعان ەكەن. فوتواپپاراتتىڭ قاراپايىمىنان كاسىپقويىنا كوشكەن قارشاداي قىزعا قىمبات كينوكامەرانى اجەسى سىيلاپتى.
– ون بەس جاسار فوتوشەبەردىڭ شىعارمالارى كوركەم ويدى شىنايىلىعىمەن ءھام شىنشىلدىعىمەن جەتكىزۋىمەن باۋرايدى. ەلۋگە جۋىق جۇمىس جيناقتالعان فوتوكارتينالاردىڭ ارقايسىسى بالالىققا ءتان ەمەس تەرەڭدىكتى, ەرەكشە الەمدى ۇسىنادى. بالالار ادەتتە ەرەسەك ادامنىڭ نازارى شالا بەرمەيتىن دۇنيەلەردى بايقايدى. جانە وعان تۇبەگەيلى جاڭاشا قاراۋعا ءماجبۇر ەتەدى, – دەيدى كورمەنىڭ تۇساۋكەسەرىندە قورىق-مۋزەي ديرەكتورىنىڭ ورىنباسارى تامارا بىكوۆا.
د.باجەنوۆانىڭ ءومىردىڭ قاي سوقپاعىنا تۇسەتىنى ازىرگە بەلگىسىز بولسا دا, ونەرتانۋشىلار ونىڭ ءومىردى وزگەشە كورە بىلەتىنىن ايتادى. وقۋشى فوتوسۋرەتتەرىندە پەيزاجدار, پورترەتتەر مەن ءومىردىڭ وزىنەن ويىپ الىنعان ساحنالار كورىنىس تاپقان. كوپشىلىگىنىڭ استارلى ويى بار. قولايلى ءساتتى قالت جىبەرمەۋ – كەز كەلگەن فوتوسۋرەتشىنىڭ ارمانى. ال فوتوتاسپا ارقىلى رۋحاني نەگىزدى بەرە ءبىلۋ – ەكىنىڭ بىرىنە بۇيىرا بەرمەيتىن قابىلەت. وسى ۇدەدەن تابىلعان «دۋال», «ءۇي», «قار», «كۇن نىسپىلى جۇلدىز» سىندى شىعارمالارى ادامداردىڭ ىشكى دۇنيەسىن تۇسىنۋگە, سەزىمىن قۇرمەتتەۋگە جەتەلەيدى.
ون بەس جاسار وقۋشى ۆەرنيساجىنىڭ اشىلۋىنا اتا-اناسى, قوس ءسىڭلىسى مەن وتباسىلىق دوستارى كەلدى. كورمە يەسى فوتوونەرگە قىزىعۋشىلق اكەسىنەن دارىعانىن ايتادى. شارانى ۇيىمداستىرۋعا قولۇشىن سوزعان پاۆلودار قالاسىنان كەلگەن «پوليگرافيا ورتالىعى» جشس ديرەكتورى, ەلىمىزدەگى بەلگىلى فوتوشەبەر الەكساندر پارحومەنكو ەكەن. وقۋشى جۇمىستارىمەن تانىسقان ول پاۆلوداردا دا كورمە وتكىزۋگە ۇسىنىس جاسادى.
دۋمان اناش,
«ەگەمەن قازاقستان»
وسكەمەن
سۋرەتتە: د.باجەنوۆا (سول جاقتا ءبىرىنشى)
