«مەدەۋ» مەن «شىمبۇلاق»

كەلەسى جىلى بۇل جەرلەردى 60 ەلدىڭ تۋريستەرى كەلىپ كورمەك ۋنيۆەرسيادا-2017 ءۇشىن «مەدەۋ» مۇز ايدىنى مەن «شىمبۇلاق» شاڭعى شيپاجايىنىڭ اۋماعىنان سالىناتىن سپورتتىق كەشەندەر ينفراقۇرىلىمىنىڭ دامىتۋ ارقىلى دەمالۋشىلار مەن شەتەلدىك تۋريستەردى كوپتەپ تارتۋ ماسەلەسى ءسوز بولدى. الماتى قالاسىنىڭ اكىمى باۋىرجان بايبەك قاتىسقان كوشپەلى وتىرىس جۇمىسىندا قالا تۇرعىندارى مەن قوناقتارى جاقسى كورەتىن ايگىلى «دەنساۋلىق باسپالداعى», «قارلىعاش» ءدام­حاناسى جانە «گورەلنيك» ىستىق بۇلاعىنىڭ قايتا وڭدەلگەن جوندەۋ جۇمىستارى مەن بىرقاتار جاڭا جوبالار تانىستىرىلدى. قازاق گەوگرافيالىق قوعامى­نىڭ ۇيىتقى بولۋىمەن ىسكە قوسىلعان «مەدەۋ-شىمبۇلاق» باعىتىنداعى وتاندىق ەكو­ترانسپورت­تىڭ قورشاعان ورتاعا پايداسى جونىندە اتاپ وتكەن قالا باسشىسى, الداعى ۋاقىتتا دا تاۋ باۋرايى مەن قالا اسەم­­دىگىنە جانە تابيعي تەپە-تەڭ­دىگى ساقتالۋىنا ەرەكشە ءمان بەرىلەتىندىگىن ايتتى. ايتا كەتەيىك, ەكولوگيالىق وتىنمەن قوزعالاتىن 18 ادامدىق 4 اۆتوبۋس وسىدان 1 اي بۇرىن وسى باعىتقا قوسىلعان ەدى. جول ءجۇرۋ قۇنى – 200 تەڭگە. «شىمبۇلاق» شيپاجايىنىڭ اۋماعىنا كىرۋگە ارناۋلى ەكواۆتوبۋستار مەن ەلەكتروموبيلدەن باسقا كولىكتىڭ بارلىق تۇرىنە قاتاڭ تىيىم سالىنعان. بۇدان وزگە, قالا باسشىسى سوڭعى ۋاقىتتا قالا تۇرعىن­دارىنىڭ اراسىندا سالاماتتى ءومىر سالتىن ۇستانىپ, تابيعات اياسىندا دەمالۋشىلار قاتارىنىڭ كۇرت وسكەندىگىن ايتا كەلىپ, «مەدەۋ» مەن «شىمبۇلاق» ارقىلى ىشكى ءتۋريزمدى جاقسى جولعا قويۋ جوس­پارىن جۇزەگە اسىرۋدى ۇسىندى. قانات ەسكەندىر, «ەگەمەن قازاقستان» الماتى