قازاق دالاسىندا

108 مىڭ كيىك تىرشىلىك ەتەدى اۋىل شارۋاشىلىعى مينيسترلىگى وسى جىلدىڭ 18 ءساۋىرى مەن 3 مامىرى ارالىعىندا بەتپاقدالا, ورال جانە ءۇستىرت پوپۋلياتسياسىنىڭ كيىكتەرىنە اۋەدەن ساناق جۇرگىزدى. مالىمەتتەرگە سۇيەنسەك, قازاقستاندا 108 مىڭ 300 اقبوكەن بار ەكەن. – وتكەن جىلى بەتپاقدالا تارا­لىمىنىڭ جاپپاي قىرىلۋىنان كەيىن 2016 جىلعى ساناق بويىنشا اقپارات بەرگىمىز كەلەدى. بەتپاقدالا تارالىمىندا 36 مىڭ 200 كيىك تىرشىلىك ەتەدى. ورال تارالىمىندا بۇل كورسەتكىش 70 مىڭ 200 كيىكتى قۇرايدى. ءۇستىرت تارالىمىندا 1900 باس تىركەلدى, – دەدى اۋىل شارۋاشىلىعى مينيسترلىگى جانۋارلار دۇنيەسى جانە اڭشىلىق شارۋاشىلىعى باسقارماسىنىڭ باسشىسى باقىتبەك دۇيسەكەەۆ. جيىن بارىسىندا اۋىل شارۋا­شىلىعى مينيسترلىگىنىڭ وكىلدەرى 2015 جىلى جابايى تىرشىلىك يەلەرىنىڭ نەدەن قىرىلعانى ءالى انىقتالماعانىن مالىمدەدى. – ولاردىڭ ەڭ كوپ مەكەن ەتەتىن جەرى ورال ءوڭىرى بولعاندىقتان, بۇل ماڭايدىڭ كۇزەتىلۋىنە, اقبوكەننىڭ تارالۋىنا قاتتى ءمان بەرىپ وتىرمىز. وسىعان بايلانىستى مامىر ايىندا ورال قالاسىندا ارناۋلى «وحوتزووپروم» مەكەمەسىنىڭ فيليالىن اشتىق. بۇل ورىنعا قىزمەتكەرلەر سانى بويىنشا دا, تەحنيكا جاعىنان دا كومەك كورسەتىپ وتىرمىز. مەكەمە جانىنان ءتورت ارنايى توپ قۇرىلدى. ءاربىر توپقا جول تالعامايتىن ەكى كولىك, ال كولىكتەر­دىڭ ارقايسىسىنا ەكى ينسپەكتوردان بولدىك. ەكى توپ استانادا, قالعان ەكى توپ قىزىلوردادا جۇمىس ىستەيدى, – دەدى باقىتبەك دۇيسەكەەۆ. ايان ءابدۋالي, «ەگەمەن قازاقستان» ايتا كەتەيىك, 2015 جىلى مامىردا بەتپاقدالانى مەكەندەيتىن 150 مىڭنان استام كيىك قىرىلعان. ونىڭ ناقتى سەبەبى ءالى كۇنگە دەيىن بەلگىسىز.