ءمۇشايرا مارەگە جەتتى

ەل تاۋەلسىزدىگىنىڭ 25 جىلدىعى جانە استانا كۇنى قۇرمەتىنە ارنالعان «ازاتتىق اياسىندا» اتتى رەسپۋبليكالىق جىر ءمۇشايراسى ءوز مارەسىنە جەتتى. استانا قالاسى اكىمدىگىنىڭ قولداۋىمەن ساكەن سەيفۋللين مۇراجايى وسىمەن التىنشى رەت وتكىزىپ وتىرعان ءداستۇرلى جىر دوداسىنا بيىل جۇزگە جۋىق ۇمىتكەر قاتىستى. تاۋەلسىزدىكتى ءار قىرىنان تولعاعان ولەڭ-داستاندار اقىنداردىڭ بۇل كەلەلى تاقىرىپتى كەستەلى جىرمەن ورنەكتەۋ جولىندا كوپ ىزدەنگەندەرىن بايقاتتى. اسىرەسە, سەمەيلىك مەدەت بوجان, قاراعاندىلىق اسەت امانجولوۆ سەكىلدى جاڭا ەسىمدەردىڭ كورىنۋى قۋانىشتى. مۇشايراعا تاۋەلسىزدىك تاريحىن تۇپتەن تارتىپ جىرلاعان داستاندار دا كوپتەپ تۇسكەنىن ايتا كەتكىمىز كەلەدى. الايدا, جاس اقىن ولجاس قاسىمنىڭ «عاسىر قاسىرەتى» داستانى عانا قازىلار القاسىنىڭ كوڭىلىنەن شىقتى. بايگەگە تۇسكەن شىعارمالاردى تالعام سۇزگىسىنەن وتكىزە كەلە مەم­لەكەتتىك سىيلىقتىڭ لاۋ­رەاتى, جازۋشى قاجىعالي مۇحامبەتقاليەۆ توراعالىق ەتكەن قازىلار القا­سىنىڭ شەشىمىمەن ءبىرىنشى بايگە – «استانامەن سىرلاسۋ» ولەڭى ءۇشىن بەلگىلى قالامگەر ادىلبەك ىبى­رايىم ۇلىنا بەرىلدى. ەكىنشى ەكى ورىندى «نۇرلى كوش» ولەڭى ءۇشىن دۇكەن ءماسىمحان ۇلى جانە «بەردىعوجا ءباھادۇر» ولەڭى ءۇشىن داۋلەتكەرەي كاپ ۇلى يەلەندى. ءۇشىنشى ورىنداردى «استانا» جىرى ءۇشىن اقتوبەلىك باۋىرجان باباجان ۇلى, «تاڭعى تىلەك» ولەڭى ءۇشىن الماتىلىق نۇروللا ساعاتباەۆ, «ماڭگىلىك ەل – ماڭگىلىك مۇرات» ولەڭى ءۇشىن قاراعاندىلىق اسەت امانجولوۆ سياقتى اقىندار ءبولىستى. سونداي-اق, ىنتالاندىرۋ سىيلىقتارى «تۋعان ەل» ولەڭى ءۇشىن نۇرلان قالقاعا, «عاسىر قاسىرەتى» داستانى ءۇشىن استانالىق جاس اقىن ولجاس قاسىمعا, «بوستاندىق» ولەڭى ءۇشىن استانالىق جاس اقىن ەربول الشىنبايعا, «ازاتتىق پەن ەلباسى» ولەڭى ءۇشىن مەدەت بوجانعا, «بۇل – قازاق» ولەڭى ءۇشىن سەمەيلىك جاس اقىن ارمان شەريزاتقا بەرىلدى. ساكەن سەيفۋللين مۇراجايى تاعايىنداعان ارنايى سىيلىقتى «قازاق جەرى» ولەڭى ءۇشىن استانالىق ەسەنگەلدى ءسۇيىنوۆ قانجىعاسىنا بايلادى. جۇلدەگەرلەردى ماراپاتتاۋ 1 شىلدە كۇنى استانادا «جاستار» سارايىندا وتەدى. سەرىكحان سابىربەكوۆ, قازىلار القاسىنىڭ جاۋاپتى حاتشىسى استانا