كەشە. بۇگىن. ەرتەڭ

ەلوردالىق جاس سۋرەتشىلەردىڭ «KADMII QYZYL» ارت-توبى ۇسىنعان «نەونوماد» كورمەسىندە ءۇش كەزەڭنىڭ كەسكىنى ۇشتاسادى. كورمەنىڭ اشىلۋىندا ۇلتتىق مۋزەيدىڭ ديرەكتورى دارحان مىڭباي جاستاردىڭ زاماناۋي جۇمىستارىن جوعارى باعالاپ, ولارعا شىعارماشىلىق تابىس­تار تىلەدى. – بۇل جۇمىستاردىڭ بارلىعى دا تالانتتى جاس سۋرەتشىلەردىڭ ىشكى دۇنيەلەرىن اشىپ كورسەتەدى. مۇنداي جاڭا باستامالارعا ارقاشان قولداۋ ءبىلدىرۋىمىز كەرەك. سەبەبى, ءبىز ءۇشىن ونەردىڭ ورنى بولەك. الداعى ۋاقىتتا دا مۇنداي تىڭ يدەيالاردىڭ اۆتورلارىن ۇلتتىق مۋزەيدەن كورگىمىز كەلەدى. سوندىقتان, تالاپتى 7 سۋرەتشىنىڭ الداعى جۇمىستارىنا تابىس تىلەيمىن, – دەدى د.مىڭباي. ەسكە سالا كەتەيىك, «KADMII QYZYL» ارت-توبى 2010 جىلى قۇرىلعان. ونىڭ قاتارىندا بەيبىت اسەمقۇل, ايگەرىم جۇما­عاليەۆا, ءاليا قانىبەكوۆا, ناتاليا ليگاي, جەڭىس مول­دابەكوۆ, الماس وراقباي, گۇل­مارال تاتىباەۆا ەسىمدى جاستار بار. كورمەگە ولاردىڭ 30-عا جۋىق جۇمىسى قويىلدى. ونەر تۋىندىلارىنىڭ اراسىندا  ينس­تاللياتسيا, فوتوسۋرەتتەر, ۆيدەو-ارت جانە پەرفومانس بار. تۋعان ءۇيدىڭ سيمۆولى سانالاتىن «ۇيا» ينستاللياتسياسى ارقىلى كورمەنىڭ باستى يدەياسى ايقىندالا تۇسەدى. قازىرگى تاڭدا باقىتتى ءومىر ىزدەگەن ادامدار قۇستارمەن تاعدىرلاس ءتارىزدى. الەمدە ۇنەمى قوزعالىس, ادامدار قالادان-قالاعا, ءبىر ەلدەن ەكىنشى ەلگە, ءبىر قۇرلىقتان ەكىنشى قۇرلىققا كوشىپ-قونىپ جاتادى. ءومىردىڭ زاماناۋي كوشۋ بەينەسى بۇكىل الەمگە ورتاق, بۇگىنگى كوش­پەلىلەر – نەونومادتار – ءوزىن جانە ءوز باقىتىن تابۋ ءۇشىن ورىن اۋىستىرۋدان جالىقپايدى. وسى ارادا, ءوز تامىرىڭنان قول ۇزبەۋ, ءوزىڭنىڭ كىم جانە قايدان ەكەنىڭدى ۇمىتپاۋ وتە ماڭىزدى! سونىمەن قاتار, كورمەگە ناتاليا ليگايدىڭ «ءومىر ەلەسى», ءاليا قانىبەكوۆانىڭ «تۋعان جەرىم تۇعىرىم», گۇلمارال تاتىباەۆانىڭ «زامانا كوشى», الماس وراقبايدىڭ «جۇرت» فوتوسۋرەتتەرىنىڭ توپتاماسى قويىلماق. وسى جۇمىستاردا سۋرەتشىلەر قونىس اۋدارۋدىڭ الەۋمەتتىك-مادەني ۇردىسىنە ءوز كوزقاراستارى مەن ويلارىن بىلدىرۋگە تىرىسادى. مەگاپوليستەر ءوز ءتوڭى­رەگىندەگى ەلدى مەكەندەر مەن ولاردىڭ تۇرعىندارىن وزىنە سىڭىرە وتىرىپ قارقىندى ءوسۋ­دە. مۇنداعى ادامدار قۇم قيىر­شىعى سياقتى. الايدا, ءاربىر ادام بىرەگەي جانە تالانتتى, ايگەرىم جۇماعاليەۆانىڭ «قالا الپاۋىتتارى» توپتاماسىمەن جاسالعان فوتوتۋىندىلارى وسى تۋرالى باياندايدى. سۋرەتشى ساۋلەتتىك انسامبلدەردى, ءمۇسىن كومپوزيتسيالارىنان گورى قا­لانى جاسايتىن جانە وعان جان كىرگىزەتىن ادامداردى جىرلايدى. جەڭىس مولدابەكوۆتىڭ «تاريح قويناۋىنان جارقىن بولاشاق­قا» توپتاماسىمەن جاسالعان فوتوتۋىندىلارىندا بابالارىمىزدىڭ بايىرعى كوشىپ-قونۋ ۇردىسىمەن بۇگىنگى تەمىرجولدار ءوتىپ جاتۋى ىقتيمال قازاقستاننىڭ كەڭ-بايتاق دالاسىنا ەرەكشە ورىن بەرىلگەن. سۋرەتشى ءوز سيۋ­جەتتەرىندە بۇگىنگى مەن كەشەگىنى ۇشتاستىرادى. ال, بەيبىت اسەمقۇل­دىڭ «شەك­­سىزدىك» توپتاماسىمەن جا­سالعان فوتوتۋىندىلارى ايەلدەرگە ارنالعان. قازاق ءما­دەنيەتىندەگى ايەل ەجەلدەن وتباسى مەن ءداستۇردىڭ ساقتاۋشىسى سانالادى. سۋرەتشى قازىرگى زا­مان­داعى ايەلدىڭ كلاسسيكالىق بەي­نەسىنىڭ وزگەرۋى تۋرالى وي تولعايدى. جاستار كورمەسى 26 ماۋسىمعا دەيىن جالعاسپاق. «ەگەمەن-اقپارات»