ۇرپاق ۇمىتپايدى

ۇلتتىق ۇلاننىڭ №6655 اسكە­ري بولىمىندە كەلىسىمشارت نەگىزىندە قىزمەت اتقارعان كىشى سەرجانت بەرىك­جان قاليەۆتىڭ اقتوبەدە لاڭ­كەستەرمەن سوڭعى دەمى بىتكەنشە ايقاسقان ەرلىگى ەلگە ءمالىم. ارىستاي ازاماتتىڭ ارتىندا اڭىراپ ءتورت بالاسى مەن اياۋلى جارى نۇرسۇلۋ قاليەۆا قالدى. ساربازدىڭ سۇيەگى 8 ماۋسىم كۇنى تۋعان اۋىلى جاق­سىبايدا جەرلەندى. قارالى جيىنعا قاتىس­قان وبلىس اكىمى التاي كول­گىنوۆ ەلباسىنىڭ تاپسىرماسىمەن وتباسىنا مەملەكەتتىك قولداۋ كور­سەتىلەتىنىن ايتقان ەدى. كەشە مەملەكەت باسشىسىنىڭ تاپسىرماسى بۇلجىتپاي ورىندالعانىنا بارشا باتىسقازاقستاندىقتار كۋا بولدى. قاليەۆتەر وتباسىنا باتىس قازاقستان وبلىسىنىڭ اكىمى التاي كولگىنوۆ زاشاعان كەنتىنەن جاڭا پاتەر كىلتىن تابىستادى. – اقتوبەدەگى قاندى وقيعادا ءۇش اسكەري قىزمەتكەر قازا تاپتى. سولاردىڭ ءبىرى – جەرلەسىمىز بەرىكجان قاليەۆ. سوڭىندا ءتورت بالاسى قالدى. ەلباسىمىزدىڭ لاڭكەستىك قۇرباندارىنىڭ وتبا­سىلارىنىڭ ەشبىرى قاراۋسىز قالماسىن دەگەن تاپسىرماسى بويىنشا جان-جاقتى قولداۋ كور­سەتىلۋدە. زايىبى نۇرسۇلۋ قا­ليەۆا مەكتەپكە جۇمىسقا ورنالاس­تى. بالالارى زاشاعان كەنتىندەگى مەكتەپتە ساباق وقيتىن بولادى, كىشكەنتايى شاعىن ورتالىققا بارادى. وتباسىنا ءۇش بولمەلى پاتەر بەرىلدى. ونىڭ الدىندا 5 ميلليون تەڭگە قارجىلاي كومەك كورسەتىلدى. الداعى ۋاقىتتا دا نازارىمىزدان تىس قالدىرماي, قامقورلىق كورسەتەتىن بولامىز, – دەدى وبلىس باسشىسى. نۇرسۇلۋ قاليەۆا ەلباسى قام­قورلىعىنا ريزاشىلىعىن ءبىلدىردى. ول ءوز جۇرەگىنىڭ تۇك­پىرىندەگى وي-تىلەگىن بىلايشا جەتكىزدى: – ەلدە تەك تىنىشتىق پەن بەرەكە-بىرلىك بولسىنشى. العىسىم شەكسىز. كۇنى كەشە عانا وتە شاعىن پاتەردە تۇردىق. قازىر ءبارى دە جەتكىلىكتى, – دەگەن ول, سونىمەن قاتار, جارىنىڭ اسىل قاسيەتتەرىن ەسكە الدى. جۇبايىمنىڭ مىنەزى اقجارقىن, وتە سالماقتى بولدى. ەشكىمنەن قولىنان كەلگەن كومەگىن ايامايتىن. قىزمەتىنە جاۋاپ­كەرشىلىكپەن قاراپ, جان-تانىمەن بەرىلىپ ىستەيتىن. بالالارىنا جاقسى تاربيە بەردى. نۇرتاي تەكەباەۆ, جۋرناليست, تەمىر قۇسايىن, «ەگەمەن قازاقستان» باتىس قازاقستان وبلىسى سۋرەتتە: پاتەر كىلتىن تاپسىرۋ كەزىندە