بولاشاعى زور جاڭا باعدار

ەلىمىزدىڭ ترانزيتتىك جولدارىنىڭ تىنىسى كەڭەيە بەرمەك. ماسەلەن, اسپاناستى ەلىنىڭ استاناسى بەيجىڭدە قىتاي – قازاقستان – تۇرىكمەنستان – يران تەمىرجول باعدارىنىڭ تۇساۋكەسەر ءراسىمى وتكىزىلگەن بولاتىن. بۇل حالىقارالىق شارا ەلىمىزدەن وتەتىن جۇك كولەمىن ارتتىرۋمەن قاتار, ەكسپورتتىڭ ۇلعايۋىنا دا ءوز اسەرىن تيگىزەرى انىق. شارانى قازاقستان مەن تۇرىكمەنستان مەملەكەتتەرىنىڭ قىتايداعى ەلشىلىكتەرى جانە «قازاقستان تەمىر جولى» ۇك» اق بىرلەسىپ ۇيىمداستىرعان. مەملەكەت باسشىسىنىڭ ساۋىردەگى تەگەرانعا ساپارى بارىسىندا قا­زاقستان يرانمەن بىرلەسىپ «جىبەك جولى» باعدارىنىڭ كولىكتىك-لوگيستيكالىق الەۋەتىن دامىتۋدىڭ ۇزاق مەرزىمدى باعدارلاماسىن قابىلداعان بولاتىن. بۇل باعدارلاما باسە­كەلەستىككە ساي تاريف بەلگىلەۋ مەن شەكارا­لىق ستانسالاردى دامىتۋدى جانە شەكارادان ءوتۋ مەرزىمىن قىسقارتۋدى, قىتاي – قازاقستان – تۇرىكمەنستان – يران – ءۇندىستان باعىتىندا جانە كەرى باعىتتا جۇك اينالىمىن ۇلعايتۋدى كوزدەيدى. اتالعان ماگيسترال قازاقستان مەن قىتايدىڭ «نۇرلى جول» جانە «جىبەك جولى ەكونوميكالىق بەلدەۋى» باعدارلاماسىنىڭ ناقتى ورىندالۋىنىڭ كورسەتكىشى بولىپ تابىلادى. جاڭا تەمىرجول جەلىسى باعىتتىڭ باسەكەلەستىگى مەن كونتەينەرلىك تاسىمال قىز­مەتىن جانداندىرا تۇسەتىن جوعارى كولىكتىك الەۋەتكە يە. ءبىزدىڭ ەلدە قۇرلىق دالىزدەرى ارقىلى ترانزيتتىك كولىك الەۋەتىن كوتەرۋ ءتيىمدى. وسى ورايدا تەمىرجول جەلىسى مەن لوگيستيكالىق ينفراقۇرىلىم جاساقتالىپ, جۇكتەردى جەتكىزۋدى جەدەلدەتۋ مەن كولىكتىك شىعىنداردى ايتارلىقتاي قىسقارتۋ جۇزەگە اسادى. تۇساۋكەسەر راسىمىندە ءسوز سويلەگەن كوم­­­­­پا­نيا­نىڭ لوگيستيكا جونىندەگى ۆيتسە-پرەزيدەنتى قانات الپىسباەۆ قازىرگى تاڭدا ليانيۋنگان پورتىنداعى قازاقستان – قىتاي تەرمينالىن, «قورعاس – شىعىس قاقپاسى» اەا بىرلەسە پايدالانۋعا زور مۇمكىندىكتەر بار ەكەنىن ايتقان. ليانيۋنگان پورتىنداعى لوگيستيكالىق تەرمينالدا وتكەن جىلى 193 مىڭ كونتەينەر وڭدەلگەن. سونداي-اق, اتالعان پورتتان ورتالىق ازيا مەن قازاقستانعا 498 كونتەينەرلىك پويىز جىبەرىلىپتى. بۇيىرتسا, 2020 جىلعا قاراي تەرمينال ارقىلى جىلىنا 500 مىڭ كونتەينەر جونەلتىلەتىن بولادى. بۇگىندە وسى پورتتا شىۇ لوگيستيكالىق ايماعىن دامىتۋ جوسپارلانۋدا. ول ارقىلى 2020 جىلعا قاراي 2,2 ميلليون كونتەينەر جۇكتى شوعىرلاندىرۋعا بولاتىن كورىنەدى. نەگىزى, «قورعاس – شىعىس قاقپاسى» اەا قىتاي – رەسەي – ورتالىق ازيا – وڭتۇستىك كاۆكاز, ەۋروپا باعىتىنا شىعاتىن جۇك اعىندارىن شوعىرلاندىرۋدىڭ كولىكتىك-لوگيستيكالىق حابى بولىپ تابىلادى. وتكەن جىلدىڭ ەكىنشى جارتىسىندا قۇرعاق پورت ارقىلى 14 مىڭ كونتەينەر وڭدەلگەن. يران تارابىمەن بىرلەسىپ كولىكتىك-لوگيستيكالىق ينفراقۇرىلىم جاساقتاۋدىڭ جول كارتاسى بويىنشا ينچەبۋرۋن ستانساسى, باندەر – ابباس تەڭىز پورتى كونتەينەرلىك تەرمينالىندا دا ءتيىمدى جوبالار جۇزەگە اسىرىلا باستاعان. ءبىزدىڭ ەل قىتايدىڭ بيزنەس قاۋىمداستىعىمەن تۇرىكمەنستان ارقىلى يران باعىتىنا, پارسى شىعاناعى ەلدەرىنە ترانزيتتىك كونتەينەرلىك تاسىمالدا كەشەندى مۋلتيمودالدىق سەرۆيستىك قىزمەت كورسەتۋگە دايىن. نۇرباي ەلمۇراتوۆ, «ەگەمەن قازاقستان»