شەكارا قاۋىپسىزدىگى – باستى نازاردا

شىمكەنتتە قازاقستان رەسپۋبليكاسى ۇلتتىق قاۋىپسىزدىك كوميتەتى  توراعا­سىنىڭ ورىنباسارى – شەكارا قىزمەتىنىڭ ديرەكتورى, گەنەرال-مايور دارحان ءدىلمانوۆتىڭ توراعالىعىمەن شانحاي ىنتىماقتاستىق ۇيىمىنا (شىۇ) مۇشە مەملەكەتتەر  شەكارا قىزمەتى باسشىلارىنىڭ ءتورتىنشى ءماجىلىسى بولىپ ءوتتى. وعان قاتىسۋشى التى مەم­لەكەتتىڭ – قازاقستان, قىتاي, قىرعىزستان, رەسەي, تاجىكستان جانە وزبەكستان ەلدەرىنىڭ وكىلدەرى ۇيىمعا مۇشە مەملەكەتتەردىڭ شەكاراسىنداعى جاعداي تۋرالى ءوزارا اقپاراتتارمەن الماس­تى. سونداي-اق, ماجىلىسكە قاتىسۋشى­لار تەرروريستىك ەلەمەنتتەر شىۇ-عا مۇشە مەم­­لەكەتتەردىڭ مەملەكەتتىك شەكارالارى ارقىلى شەكارالىق ايماقتارعا ەنىپ, وزدەرىنىڭ زاڭسىز ءىس-قيمىلدارىن جۇزەگە اسىرۋعا تى­رىسقان جاعدايلاردا ولاردىڭ جولىن كەسۋگە باعىتتالعان ءوزارا ىنتىماقتاستىق پەن ءىس-قيمىل تۋرالى شارتتى جۇزەگە اسىرۋعا ارنالعان ءىس-شارالاردىڭ بارىسىن تالقىلادى. جيىندا د.ءدىلمانوۆ ماجىلىسكە قاتى­سىپ وتىرعان وبلىس باسشىسى بەيبىت اتامقۇلوۆقا ءسوز بەردى. ءوڭىر باسشىسى ءوز سوزىندە وڭتۇستىكتە 3 ملن.-عا جۋىق حالىقتىڭ, 100-دەن اسا ۇلتتار مەن ۇلىستاردىڭ ىنتىماعى جاراسىپ, تۇسىنىستىكتە ءومىر ءسۇرىپ جاتقاندىعىن ايتتى. وبلىس وزبەكستان جانە قىرعىزستان مەملەكەتتەرىمەن شەكارالاس. اۋىلى ارالاس, قويى قورالاس تۋىسقان ەلدەرمەن اۋىزبىرشىلىك جاقسى بولعانىمەن, ەل ءىشىن الا تايداي بۇلدىرەتىن سودىرلار ازايماي تۇر. سوڭعى جىلدارى ەسىرتكى تاسىمالى ماسەلەسى ۋشىعىپ كەلەدى. تەرروريستىك ارەكەتتەردى بولدىرماۋ ءۇشىن شانحاي ىنتىماقتاستىق ۇيىمىنا مۇشە مەملەكەتتەردىڭ بىرلەسكەن ءىس-قيمىلى اسا قاجەت.  وسىنى ايتقان وبلىس باسشىسى شىۇ جۇمىسىنا ساتتىلىك تىلەدى. كەزدەسۋدەگى نەگىزگى مىندەتتەر ناقتىلان­عاننان كەيىن ءماجىلىس جابىق جاعدايدا ءوتتى. بۇل ماسەلەگە تۇسىنىستىكپەن قاراۋعا بولادى. ويتكەنى, بۇعان دەيىن تەررورلىق ارەكەتتەن امان-ساۋ دەلىنىپ كەلگەن قازاقستاننىڭ وزىندە ەشكىمنەن قىمسىنباي تاپا-تالتۇستە مىلتىق اسىنعان سودىرلار بوي كورسەتىپ قالدى. شانحاي ىنتىماقتاستىق ۇيىمىنا مۇشە التى مەملەكەت تە بەيبىت تۇرعىنداردى اۋىر قاسىرەتكە ۇرىندىراتىن قاۋىپتەن امانبىز دەي المايدى. ءماجىلىس بارىسىندا وعان قاتىسۋشىلار شىۇ شەكارالىق كەڭىستىگىندە زاڭسىز ءىس-ارەكەتتى ەسكەرتۋ مەن ونىڭ جولىن كەسۋگە باعىتتالعان «بىرلىك-2016»  بىرلەسىپ جۇرگىزىلەتىن شەكارالىق وپەراتسياسىنىڭ ءمان-جايىن پىسىقتادى. سوڭىندا اتقارىلعان جۇمىستارىنىڭ قورىتىندىسىن شىعارىپ, الداعى ۋاقىتتا جاسالاتىن باسقا دا جوس­پارلاردىڭ جوباسىن تالقىلادى. ءماجىلىستىڭ ەكىنشى بولىگىندە قازاقستاندىق شەكاراشىلار ارىپتەستەرىنە قازاقستان رەسپۋبليكاسىنىڭ مەملەكەتتىك شەكاراسىن كۇزەتۋ قالاي ۇيىمداستىرىلاتىندىعىن بايانداپ, شەكارا كۇزەتۋ بارىسىندا قولدانىلاتىن جاڭا تەحنيكالىق قۇرالدارمەن جانە يننو­ۆاتسيالىق تەحنولوگيالارمەن تانىستىردى. ءماجىلىس قورىتىندىسى بويىنشا شىۇ-عا مۇشە مەملەكەتتەردىڭ مەملەكەتتىك شەكارالارىن كۇزەتۋگە, تەرروريزمگە, سەپاراتيزمگە جانە ەكسترەميزمگە قاتىسى بار ادامداردىڭ وتەتىن ارنالارىن كەسۋگە باعىتتالعان, پراكتيكالىق ىنتىماقتاستىقتى كۇشەيتۋگە ارنالعان كوپجاقتى, ەكىجاقتى بىرقاتار قۇجاتتارعا قول قويىلدى. الەمدەگى جاعداي سان قۇبىلىپ تۇرعان كەزەڭدە ەشكىم كورپەسىن قىمتاپ, دۇنيەجۇزىلىك وقيعالاردان قالىس قالا المايدى. شانحاي ىنتىماقتاستىق ۇيىمىنا مۇشە مەملەكەتتەردىڭ شەكارا قىزمەتىنە بايلانىستى جاساسقان ءتۇيىنى – ءوزارا ىنتىماقتاستىقتى كۇشەيتىپ, حالىقارالىق قاۋىپسىزدىكتى نىعايتۋ. مامىلە وسى. باقتيار تايجان, «ەگەمەن قازاقستان» وڭتۇستىك قازاقستان وبلىسى