بالالار باپكەرى... ەسىرتكى شەگەدى

قاراعاندى بالالار فۋتبول مەكتەبىندە جاتتىق­تىرۋشى بولىپ جۇمىس ىستەيتىن ەر كىسى شىعىس قازاقستان وبلىسىندا گاشيشپەن قولعا ءتۇسىپ قالدى. وقيعا بيىلعى مامىر ايىنىڭ باسىندا «اۋىل» شەكارا ستانساسىندا ورىن العان. شەكارا اسكەرىنىڭ قىزمەتكەرلەرى «استانا – لە­ني­نوگورسك» باعىتىمەن كەلە جاتقان پويىزعا تەك­­سەرۋ جۇرگىزگەندە, قىزمەتتىك ءيىسشىل يت ءبىر ءجى­­گىتكە قاراپ ءۇرىپ قويماعان. سول كەزدە ول شە­كارا­شىلارعا وزىمەن بىرگە ەسىرتكى زاتىن الىپ كەلە جاتقانىن, ونى اجەتحاناعا جاسىرىپ قوي­عانىن بىردەن ايتىپ بەرگەن. 40 جاستاعى ەر كىسى ايتقان ورامانى اشىپ قاراعاندا, ودان 4 گرامم گاشيش شىققان. انىقتاي كەلگەندە, ەسىرتكى زاتىنا ەسى كەتىپ جۇرگەن بۇل ساباز كەنشىلەر استاناسىندا بالالارعا فۋتبول ونەرىن ۇيرەتەتىن ۇستاز بولىپ شىقتى. ول سول جولى ءوزى جاتتىقتىراتىن بالالاردى جارىسقا الىپ بارا جاتىپتى. ايتۋىنا قاراعاندا, ول وسى وقيعاعا دەيىن بىرنەشە كۇن بۇرىن گاشيش ورالعان ورامانى كوشەدەن تاۋىپ الىپتى-مىس. سوسىن ءوزى شەگۋ ءۇشىن الىپ قويعان. «بالالار باعبانى» سوتتا ەسىرتكى زاتىن ۇيدە قالدىرۋدى ۇمىتىپ كەتكەنىن ايتتى. ال پويىزدا تەكسەرۋ باستالعان كەزدە, دەرەۋ اجەتحاناعا اپارىپ جاسىرا قويىپتى. وسى ءىستى قاراعان شىعىس قازاقستان وبلىسى بورودۋليحا اۋداندىق سوتى بالالار باپكەرىنە 500 ەڭ تومەنگى ايلىق كولەمىندە ايىپپۇل سالدى. ۇكىم ءالى كۇشىنە ەنگەن جوق. بالالاردىڭ تاعدىرى سەنىپ تاپسىرىلعان ادامنىڭ ءتۇرى وسىنداي. مۇرات ايتقوجا