قارجىلىق باقىلاۋ قاتاڭ بولماقشى

ەلباسىنىڭ «100 ناقتى قادام» ۇلت جوسپارىندا بەلگىلەنگەن 93-قادامداعى «مەملەكەتتىك اۋديت جانە قارجىلىق باقىلاۋ تۋرالى» زاڭ قابىلداۋ تاپسىرماسى بويىنشا, 3 جىل كولەمىندە وسى باعىتتا زاڭدى دايىنداۋ جۇمىستارى جۇرگىزىلدى. بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قارجى ۆيتسە-ءمينيسترى رۋسلان بەكەتاەۆ ءمالىم ەتتى. ونىڭ ايتۋىنا قاراعاندا, قارجىلىق ەسەپ ءاۋديتى مەملەكەتتىك ستاندارتتارى بويىنشا پرينتسيپ ءمانىن ەسەپكە الىپ جانە تاڭداۋدى قولدانۋ ارقىلى جۇزەگە اسىرىلادى. بۇل ورايدا, جەرگىلىكتى بيۋدجەتتەن باستاپ, 2019 جىلى ەسەپ كوميتەتى اۋديتىنە رەسپۋبليكالىق بيۋدجەتتىڭ شوعىرلاندىرىلعان قارجىلىق ەسەپتىلىگىنە دايىندالۋ مىندەتى تۇر. قارجىلىق ەسەپ ءاۋديتى ەسەپكە الىنباعان اكتيۆتەر جانە مىندەتتەمەلەردى كورسەتۋ ءۇشىن ىسكە اسىرىلادى. سونىمەن قاتار, ىشكى مەملەكەتتىك اۋديت كوميتەتى بۇزۋشىلىق فاكتىلەردى انىقتاۋ جانە ەسكەرتۋ جاساۋ ءادىس-تاسىلدەرىنە وزگەرىستەر ەنگىزۋدە. حالىقارالىق تالاپتارعا ساي, ءبىز كوزدەلگەن نىسانداردان مىندەتتى تۇردە بۇزۋشىلىق تاۋىپ, ايىپتالۋشىلارعا شارا قولدانۋعا كەلگەن قارسىلاس رەتىندە ەمەس, كەرىسىنشە, جاعدايدى تارتىپكە سالۋ ءۇشىن جانە بولاشاقتا قۇقىققا قايشى ىستەردىڭ قايتالانۋىنا جول بەرمەۋ باعىتىندا جۇمىس جاساۋىمىز قاجەت, دەدى ۆيتسە-مينيستر. سونداي-اق, بارلىق اۋديتورلىق ءىس-شارالار تاۋەكەلدەردى باسقارۋ جۇيەسى بويىنشا ناقتى سۇراقتاردى قاراستىرۋ ءۇشىن جوسپارلانعانىن اتاپ ءوتتى. جانە كامەرالدىق باقىلاۋعا ەرەكشە ءمان بەرىپ وتىرمىز. كامەرالدىق باقىلاۋ وتكىزۋ كەزەڭىنەن باستاپ, مەملەكەتتىك ساتىپ الۋداعى بۇزۋشىلىقتاردىڭ 32%-دان 22%-عا دەيىن تومەندەۋى جاسالعان جۇمىستىڭ تيىمدىلىگىن دالەلدەيدى. وسى ۋاقىتقا دەيىن 174 ملرد.تەڭگەگە جاسالعان بۇزۋشىلىققا ەسكەرتۋ بەرىلدى. جەمقورلىققا قارسى مەحانيزمنىڭ ءرولىن اتقاراتىن بىرىڭعاي دەرەكقورمەن ەلەكتروندى اۋديت بۇل جۇمىستى الدەقايدا جەڭىلدەتپەك. ياعني, نىسانانىڭ بايقاۋىنسىز تەكسەرىس جۇرگىزە بەرەدى. بۇگىنگى كۇندە قارجى مينيسترلىگىنىڭ كۇشى مەن مەملەكەتتىك ساتىپ الۋلاردىڭ ناتيجەسى وزگەرتىلدى. ءتارتىپ بۇزۋشىلىق بايقالعان كەزدە ماتەريالدار بۇرىنعىداي قۇقىق قورعاۋ ورگاندارىنا بەرىلەدى, دەدى ر.بەكەتاەۆ. ەلميرا ماتىباەۆا, «ەگەمەن قازاقستان»