ىزگى نيەتتى ەكسپەديتسيا

استاناداعى ۇلتتىق مۋزەيدە «جايىق-ورال» حالىق­ارالىق تاريحي-مادەني ەكولوگيالىق ەكسپەديتسياسىنىڭ مەرەيتويلىق شاراسى ءوتتى. مەملەكەتتىك رامىزدەر كۇنىنە وراي ۇيىمداستىرىلعان بۇل شاراعا قازاقستان حال­قى اسسامبلەياسى قولداۋ ءبىل­دىردى. وعان قحا مۇشە­لەرى, «جايىق-ورال» ەكسپەدي­تسي­يا­سىنىڭ ارداگەرلەرى مەن قاتى­سۋشىلارى, عىلىمي جانە شىعارماشىل زيالى قاۋىمنىڭ وكىلدەرى, ەتنومادەني بىرلەس­تىكتەردىڭ وكىلدەرى قاتىستى. باسقوسۋدا جيىرما جىلدىق تاريحى بار ەكسپەديتسيانىڭ قىزمەتى, ءجۇرىپ وتكەن جولى تۇرعىسىندا كەڭ كولەمدە ايتىلدى. رەسەيلىك ارىپتەستەرمەن تىعىز بايلانىستا جۇمىس ءىس­تەپ كەلە جاتقان ەكسپەديتسيا 2001 جىلدان باستاپ حا­لىقارالىق مارتەبەگە يە بولىپتى. كوپ جىلدار بويى ەكس­پە­ديتسيا قۇرامىندا پارلا­مەنت ءماجىلىسىنىڭ دەپۋتاتتارى, ساياسي پارتيالاردىڭ, ات­قارۋشى بيلىكتىڭ وكىلدەرى, ماماندار, ەكولوگ عالىمدار, ولكەتانۋشىلار, ارحەولوگتار, تاريحشىلار, جۋرناليستەر, ستۋدەنتتەر مەن وقۋشىلار جۇمىس ىستەيدى ەكەن. شارانىڭ اشىلۋىندا ءسوز العان قازاقستان حالقى اس­سامبلەياسى توراعا­سى­نىڭ ورىنباسارى, قحا حاتشىلىعىنىڭ مەڭگەرۋشىسى ەرالى توعجانوۆ قازاقستانداعى ىنتىماق پەن ەل بىرلىگىنىڭ ماڭىزدىلىعىنا توقتالىپ, ءارى قاراي دا وسى باعىتتا جۇمىستاردى جال­عاس­تىرا بەرۋ كەرەكتىگىن ايتتى. – بيىلعى جىل – مەم­لە­كە­تىمىز ءۇشىن ەرەكشە جىل. سەبەبى, ەل تاۋەلسىزدىگىنە 25 جىل تولىپ وتىر. ءبىز ءۇشىن تاۋەلسىزدىكتەن قىمبات قۇندىلىق جوق. دەمەك, ونىڭ قادىرىنە دە جەتە ءبىلۋىمىز كەرەك. بۇگىنگى ءىس-شارامىزدىڭ باستى ماقساتى – قازىرگى بىرلىگىمىزدى ودان ءارى نىعايتۋ. بىرلىك, دوستىق, كەلىسىم بولعان جەردە وركەندەۋ دە, دامۋ دا بولادى, – دەدى ە.توعجانوۆ. شارا كەزىندە ەكسپە­دي­تسيانىڭ ەلىمىز ءۇشىن ماڭىزدى جايىق وزەنى بايسسەينىنىڭ ەكو­جۇيەسىن, باي تاريحي-مادەني قۇندىلىقتاردى ساقتاپ قالۋ پروبلەمالارىن, سپورت­تى, دەنەشىنىقتىرۋدى, سالا­ماتتى ءومىر سالتىن, پات­ريوتتىق ءتار­بيە بەرۋدى, ۇرپاقتار ساباق­تاس­تىعىن, ترانس­شەكا­رالىق ىن­تى­ماقتاستىقتى دامىتۋدى ناسي­حاتتاۋدى ءوز ميسسياسى رەتىن­دە قاراستىراتىنى اتاپ ءوتىلدى. وسى جىلدار ىشىندە ەكس­پە­ديتسياعا قاتىسۋشىلار تەك جايىق وزەنى عانا ەمەس, سون­داي-اق, ورال باسسەينىندەگى ساقمار, ەلەك وزەندەرى بويىن­شا بىرنەشە مىڭداعان شاقى­رىم ءجۇزىپ ءوتىپتى. سونىڭ ءناتي­جەسىندە اۋقىمدى زەرتتەۋ جۇمىستارىن جۇرگىزگەن كورى­نەدى. سونداي-اق, ەكسپەديتسيا تاراپىنان كىتاپتار شىعا­رىلىپ, تەلەۆيزيالىق فيلم­دەر تۇسىرىلگەن جانە تاعى باس­قا دا جۇمىستار جۇزەگە اسى­رىلعان. ايتا كەتەيىك, جيىن بارىسىندا ەكسپە­ديتسيانىڭ 20 جىلدىق تاريحىن قامتيتىن «جا­يىق – دوستىق وزەنى» اتتى فوتوسۋرەت كورمەسى ۇسىنىلدى. جولدىباي بازار, «ەگەمەن قازاقستان»