اكە-شەشەسى ورمانعا تاستاپ كەتكەن بالا 6 كۇننەن كەيىن تابىلدى

استانا. 3 ماۋسىم. جاپونيادا اكە-شەشەسى ورمانعا ادەيى تاستاپ كەتكەن بالا 6 كۇننەن كەيىن امان-ەسەن تابىلدى. بۇل تۋرالى lenta.ru سايتىنا سىلتەمە جاساعان egemen.kz ءتىلشىسى حابارلادى. جەتى جاسار بالا اكە-شەشەسى قالدىرىپ كەتكەن جەردەن 5 شاقىرىم قاشىقتىقتاعى اسكەري قىزمەتكەرلەردىڭ جاتتىعۋ الاڭىنان تابىلعان. مالىمەتتەر بويىنشا, ياماتو تانۋكا ەسىمدى ءبۇلدىرشىن جەرگىلىكتى ۋاقىت بويىنشا ساعات 07:50 كەزىندە سولداتتاردىڭ ۇيشىگىندە وتىرعان. اسكەري قىزمەتكەرلەردىڭ ءبىرى بالانىڭ كورپەنىڭ ۇستىندە جاتقانىن مالىمدەدى. جاۋىنگەرلەر قاتتى اشىققان بالانى تاماق بەرىپ الدەندىرگەن. ريا «نوۆوستي» اقپارات اگەنتتىگى ءبۇلدىرشىن ارنايى تىكۇشاقپەن جەرگىلىكتى اۋرۋحانالاردىڭ بىرىنە جەتكىزىلگەنىن حابارلادى. الدىن الا مالىمەتتەر بويىنشا قازىر جاعدايى بىرقالىپتى. ياماتو تانۋكا ۇيشىككە اتا-اناسى قالدىرىپ كەتكەن كۇنى كەشكە جاقىن ورمانداعى سوقپاق جولمەن جەتكەنىن ايتتى. جاپونيانىڭ قورعانىس كۇشتەرى بالانى ىزدەۋگە 1 ماۋسىم كۇنى جۇمىلدىرىلعان. وپەراتسيا جۇمىستارىنا 70-تەن اسا اسكەري قىزمەتكەر, 200 پوليتسەي مەن ەرىكتىلەر قاتىسقان. ولار حوككايدو ارالىنداعى ورماندى ءتىنتىپ شىقتى. العاشىندا اتا-اناسى وتكەن سەنبى كۇنى, 28 مامىردا بالانىڭ ءوزى جوعالىپ كەتكەنى تۋرالى مالىمەت بەرگەن. الايدا, ارتىنان كولىك پەن ادامدارعا تاس لاقتىرعانى ءۇشىن جازا رەتىندە ورمانعا قالدىرىپ كەتكەنىن مويىندادى. ارادا بىرنەشە مينۋت وتكەننەن كەيىن سول ورىنعا قايتىپ كەلگەن ەكەۋى بالانى ورنىنان تابا الماعان. بيلىكتەگىلەر تانۋكانىڭ قازا تاپقاندىعىنان قاۋىپتەنگەن. ونىڭ ۇستىندە جەيدەسى مەن شالبارى عانا بار بولاتىن. ال ول جەر تۇنگى ۋاقىتتا اۋا تەمپەراتۋراسى 7 گرادۋسقا دەيىن تومەندەيدى. بۇعان قوسىمشا 31 مامىر كۇنى بۇل ايماقتا تولاسسىز جاڭبىر جاۋعان. ايان ءابدۋالي. دەرەك: lenta.ru فوتو: 24.kz.