بارىمىزدى باعالايتىندار بار

ءيا, ماڭعىستاۋلىق ءتىلشىمىز كوپتىڭ كوكەيىندە جۇرگەن وزەكتى ماسەلەنى كوتەرىپ وتىر. بۇل – شىندىق. ويتكەنى, جاز ايى باستالا سالىسىمەن قازاقستاندىقتار شەت مەملەكەتتەردەگى دەمالىس ورىندارىنا اعىلا باستايتىنى انىق. سەبەبى, قازاقستانداعى دەمالىس ورىندارىمەن سالىستىرعاندا انتاليادا نەمەسە دۋبايدا دەمالۋ ارزانعا تۇسەدى. ۇشاقتىڭ قۇنى دا قازاقستاندىقتاردىڭ قالتاسىنا شاق كەلەدى. ونىڭ ۇستىنە شەت مەملەكەتتەردەگى دەمالىس ورىندارىنداعى سەرۆيستىك قىزمەتتەردىڭ دە جوعارى ەكەنىن دەمالۋشىلار تامسانا ايتىپ جاتادى. سوندىقتان, قازاقستاندىقتار وتباسىمەن, بالا-شاعاسىمەن بىرگە شەتەلدە تىنىققاندى ءجون سانايدى. ول ءۇشىن ولاردى سوگە جامانداۋعا بولماس. ويتكەنى, قاي جەردە دەم الامىن دەسە دە اركىمنىڭ ەركى. بىراق, تاعى دا قايتالاپ ايتۋىمىزعا تۋرا كەلەدى, قازاقستاندا دا ءدال شەتەلدەگىدەي الاڭسىز دەم الۋعا بارلىق جاعداي جاسالعان بولسا, قۇنى قالتا كوتەرەتىن بولسا, جۇرتتىڭ شەتەلگە سابىلىپ نەسى بار؟! ارينە, بيلىكتەگىلەر بۇل ماسەلەگە بايلانىس­تى قول قۋسىرىپ قاراپ وتىر دەۋدەن اۋلاقپىز. جو­عارىدا ءسوز بولعان «كەندىرلى» دەمالىس ورنىن جاڭعىرتۋعا بايلانىستى جاعىمدى جاڭالىق تا جۇرتتىڭ اراسىنا تاراپ ۇلگەردى. ءساتىن سالسا, جوسپارلاعان جۇمىستار جۇزەگە اسسا, ماڭعىستاۋ وبلىسىنىڭ كاسپي تەڭىزى جاعالاۋىندا كەلىستى قوناقۇيلەرى بار دەمالىس ورىندارى سالىناتىن  كۇن الىس ەمەس. وعان نەمىس ينۆەستورلارى ق ۇلىق ءبىلدىرىپ وتىر. ولاردىڭ بۇل رەتتە اۋقىمدى جوبالارى بار. ونىڭ وسى جاقىن كۇندەرى بەرليندە تانىستىرىلىمى بولعان. ينۆەستورلاردىڭ ايتۋىنا قاراعاندا, كاسپي تەڭىزىنىڭ جاعالاۋىنداعى «كەندىرلى» كۋرورتى تەك زامان تالابىنا ساي دەمالىس ورنى عانا بولىپ قالمايدى, 200 مىڭ ادام تۇراتىن تۇتاس قالاعا اينالاتىن ءتۇرى بار. جوسپار بويىنشا ءبىزدىڭ مەملەكەتىمىز وندا مەكتەپتەر مەن بالا­باقشالار, ال ينۆەستورلار جەكەمەنشىك نىسان­داردىڭ قۇرىلىسىن جۇرگىزەتىن بولادى. 23 قوناقۇي مەن اكۆاپاركتەردىڭ, ياحت-كلۋبتار مەن ساۋىق­تىرۋ ورتالىقتارىنىڭ قۇرىلىسىن ينۆەستورلار قارجىلاندىرادى دەگەن جوسپار بار. العاشقى كەزەكتە ولار 600 ميلليون ەۋروعا دەيىن قارجى سالماق. ال جوبانى اياقتاعان كەزدە قاراجات كولەمى 30 ميلليارد ەۋروعا جەتەدى. سوندىقتان, بارىمىزدى ءوزىمىز باعالاي الماساق تا, باعا­لايتىندار بار بولىپ شىقتى. سوعان قۋان­دىق. بۇل تاقىرىپ تۋرالى اڭگىمە قوزعالعاندا, تاعى ءبىر ەسكەرتۋگە ءتيىستى ماسەلە بار – مىسىرداعى, ءتۇر­كياداعى قازىرگى الاساپىران جاعدايلاردى جۇرت كورىپ-ءبىلىپ وتىر. وندا دەمالىسقا بارىپ, ەلگە جەتۋى مۇڭ بولعاندار دا جوق ەمەس. قاندى قاقتىعىس بولىپ جاتقان ەلدەرگە باراتىن تۋريستەردىڭ دە, دەمالۋشىلاردىڭ دا قاراسى ازاياتىنى انىق. سولاي بولىپ تا وتىر. سوندىقتان, وسىنى ەلىمىزدەگى دەمالىس ورىندارىنىڭ باسشىلارى ۇتىمدى پايدالانىپ قالۋى كەرەك ەمەس پە؟ جانە دە بۇل باسقا مەملەكەتتەردەن دە تۋريستەردى تارتۋدىڭ قولايلى ءساتى. نارىققا جانە ۋاقىتقا سايما-ساي قيمىل-ارەكەت ەتۋگە بولماس پا؟ بۇعان كىم كەدەرگى؟ ەگەر جو­عارىدا ايتقانىمىزداي, دەمالىستىڭ باعاسى كوپشىلىكتىڭ قالتاسى كوتەرەتىندەي بولسا, سەرۆيستىك قىزمەت جوعارى ساپالى بولسا, وتانداستارىمىزدىڭ قازاقستاننىڭ تىنىعۋ ورىندارىندا دەم العاندى قوش كورەتىنى انىق. عالىم ومارحان, «ەگەمەن قازاقستان»