جەڭىل قالجىڭنىڭ جەتەگىنە ەرگەندەر

بىقسىپ, تۇتانا الماي جاتقان شوققا قاۋ ءشوپتى تاستاساڭ, لاپ ەتە قالادى. جەر كودەكسىنە بايلانىس­تى رەفورمالارعا حالىقتىڭ قۇلاعى تۇرىك. وسىنى پايدالانعان بىرەۋ WhatsApp ارقىلى شىمكەنت قالاسىندا ءۇي سالۋعا 10 سوتىقتان جەر بەرىلىپ جاتقاندىعى تۋرالى قاۋەسەت تاراتىپ جىبەرگەن. شىمكەنتتە 2008 جىلدان بەرى جەر تەلىمىن بەرۋ توقتاتىلعان. سەبەبى, جارىق, سۋى جوق قۇلا دۇزدەن جەر تەلىمىن العان ازاماتتار جاعدايلارىنىڭ ناشارلىعىن ايتىپ, قالا اكىمدىگىنىڭ الدىندا تالاي رەت ەرەۋىل جاساعان. سوندىقتان, قالا اكىمدىگى ينفراقۇرىلىم جۇيەسى تولىق تارتىلماي, جەر بەرۋدى مۇلدە دوعارعان ەدى. الگىندەي قاۋەسەتتەن كەيىن جەر سۇراپ اكىمدىكتىڭ الدىن تورۋىلداعان ازاماتتاردان ەكى كۇننىڭ ىشىندە 3 مىڭعا تارتا ءوتىنىش ءتۇستى. «وسى كەزگە دەيىن ازاماتتاردان جەر تەلىمىن بەرۋ تۋرالى 65 مىڭ 500 ءوتىنىش ءتۇسىپ, كەزەك جاسالعان. بىراق 2008 جىلدان باستاپ جەر تەلىمىن بەرۋ توقتاتىلدى. سەبەبى, جەر تەلىمىن بەرەتىن ايماقتاردا ينفراقۇرىلىم جوق. ءبىز ونداي جەردى بەرە المايمىز. ال مىنا ءوتىنىش تاپسىرعان ادامدار 65 مىڭ 500 ادامنان كەيىن كەزەككە تۇرادى. جەر كەزەكپەن عانا بەرىلەدى», – دەيدى شىمكەنت قالالىق جەر قاتىناستارى باسقارماسىنىڭ باسشىسى قاسىمبەك سايلاۋوۆ. اكىمدىك عيماراتى الدىنا جينالعان ازامات­تاردىڭ وتىزشاقتىسىن قابىلداعان قالا اكىمى عابيدۋللا ءابدىراحىموۆ قالا اۋماعى كەڭەي­تىلگەننەن بەرى اۋىل شارۋاشىلىعىنا ءتيىستى 60 مىڭ گەكتار جەر قوسىلعاندىعىن ايتتى. ال قالانىڭ ەسكى اۋماعىندا بوس جاتقان جەر جوق. بار بولسا دا جەكە قولدا ساتىلىمعا شىعادى. باعاسى, ارينە, ۋداي قىمبات. وڭتۇستىك قازاقستان وبلىسىندا ادام رەسۋرسى كوپ. سوعان وراي ءتۇيت­كىلدى ماسەلەلەر دە جەتكىلىكتى. سونىڭ بىرەگەيى – باسپانالى بولۋ. وڭتۇستىك جۇرتىنىڭ تاعى ءبىر ارتىقشىلىعى – جەر بەرسەڭ, ۇكىمەتكە ارتىق سالماق سالمايدى. اينالدىرعان بىرەر جىلدا كەلىستى ءۇي سالىپ, كىرىپ الادى. باردى قاناعات ەتەدى, ارتىقتى سۇرامايدى. «ءۇيى جوقتىڭ – كۇيى جوق» دەيدى قازاق. دابى­رامەن كەلگەن ازاماتتاردىڭ ءوتىنىشىن قوسقاندا, شىمكەنتتە جەر كەزەگىندە تۇرعانداردىڭ سانى 70 مىڭعا جۋىقتادى. جەتپىس مىڭ ادام – جەتپىس مىڭ وتباسى. باقتيار تايجان, «ەگەمەن قازاقستان» وڭتۇستىك قازاقستان وبلىسى