قوعامدىق كەڭەستە قارالدى

«قوعام وكىلدەرىنىڭ ۇسىنىستارىن تىڭداپ, ونى جۇيەگە كەلتىرۋ جانە بۇ­لاردى جەر رەفورماسى بويىنشا رەسپۋبليكالىق كوميسسيانىڭ قاراۋىنا ۇسىنۋ» كۇن تارتىبىمەن وتكىزىلگەن وبلىستىق قوعامدىق كەڭەستىڭ ءماجىلىسى ىسكەرلىك سيپات الدى. كوميسسيا توراعاسى, وبلىستىق ءماسليحاتتىڭ حاتشىسى دۋلات نۇرمولدين باسقوسۋعا بارلىق اۋدانداردان, قوعامدىق ۇيىمداردان وكىلدەر شاقىرىلعانىن حابارلادى. جينالعاندار الدىندا قولدانىستاعى جەر زاڭناماسى  مەن پرەزيدەنتتىڭ جەر كودەكسىنىڭ كەيبىر باپتارىنا توقتام جاريالاۋىنىڭ ءمانىسى جونىندە وبلىستىق جەر قاتىناستارى باسقارماسىنىڭ باسشىسى الماگۇل قادىرالينا بايانداما جاسادى. وبلىستىق ءماسليحاتتىڭ دەپۋتاتى, رەسپۋبليكالىق كوميسسيانىڭ مۇشەسى نارتاي ىسقاقوۆ بۇدان بۇرىنعى ەكى ماجىلىستە كوتەرىلگەن ماسەلەلەر تۋرالى كەڭىنەن اڭگىمەلەدى. «ءبىز كوميسسيا مۇشەلەرى مەن قوعام وكىلدەرى تاراپىنان ايتىلعان كوپتەگەن ۇسىنىستاردى ەگەجەي-تەگجەيلى قاراستىردىق, – دەدى ول. – بۇلاردىڭ بارلىعى پارلامەنت تاراپىنان قابىلداناتىن كەلىسىم شەشىمدەرىنە نەگىز بولادى. اركىمنىڭ جەرگە ورايلاس پىكىرى مەن كوزقاراستارى ارقيلى بولعانىمەن, كوميسسيا مۇشەلەرىنىڭ بارلىعى ەلىمىزگە تۇراقتىلىق پەن سەرپىندىلىك قاجەتتىگىنە مۇددەلى. وبلىس جۇرتشىلىعى دا وسى باعىتتتا وي ءوربىتىپ, بىردەن-ءبىر دۇرىس شەشىم قابىلداۋعا ۇمتىلاتىنىنا سەنىم­دىمىن». «اق جول» پارتياسى وبلىستىق فيليا­لىنىڭ توراعاسى سەرىك بەيسەمباەۆ شەك­ارالىق اۋماقتارداعى جەردى جالعا بەرۋگە بولمايتىندىعى جونىندە پىكىرىن ايتتى. سونداي-اق, ول شالعاي ەلدى مەكەن تۇرعىندارى جەر رەفورماسى مەن قازىرگى تاڭدا كوتەرىلىپ جاتقان ماسەلەلەر تۋرالى تولىق حابارسىز. كوميسسيا مۇشەلەرى اۋىلدارعا شىعىپ, تۇسىنىك شارالارىن بەلسەندى جۇرگىزۋى ءتيىس, دەدى. مىنبەرگە كوتەرىلگەن «قازاق ءتىلى جانە مادەنيەتى» قوعامدىق بىرلەستىگىنىڭ توراعاسى مەيرامبەك قيىقوۆ اۋىلدار اۋماعىنداعى جەرلەردى ساقتاۋ جانە جەرگە قاتىستى ماسەلەلەردە «ورالمان» ءسوزىن مۇلدەم قولدانباۋ قاجەتتىگىن ورتاعا سالدى. كوكشەتاۋ قالاسىنىڭ قۇرمەتتى ازاماتتارى قادىرجان ءابۋوۆ پەن بولات ءجانادىلوۆ, پروفەسسور قاسىمحان قۇسايى­نوۆ, قوعامدىق كەڭەس مۇشەسى بولات جۇ­پىنوۆتار جەر قاتىناستارىنداعى ۇلتتىق مەنتاليتەت, جەردىڭ ناقتى قوجاسى جانە جەردىڭ نەگىزگى ينۆەستورى مەملەكەت بولىپ قالا بەرەتىنىن اتاپ كورسەتتى. ماجىلىستە وبلىس اكىمىنىڭ ءبىرىنشى ورىنباسارى قادىرحان وتاروۆ ءسوز سويلەپ, وڭىردەگى جەرگە ورنالاستىرۋ, ونىڭ قۇنارلىلىق ەرەكشەلىكتەرى جانە ەكونوميكالىق اينا­لىستاعى ماڭىزى جونىندە تۇسىنىك بەرىپ, سۇراقتارعا جاۋاپ قايتاردى. باقبەرگەن امالبەك, «ەگەمەن قازاقستان» اقمولا وبلىسى