كوپشىلىك كوكەيىندەگى ماسەلەلەر

وبلىستىق قوعامدىق كەڭەستىڭ كەزەكتى وتىرىسىندا بۇگىنگى كۇنى جۇرتشىلىق نازارىن اۋدارىپ وتىرعان جەرگە قاتىستى جايلار اڭگىمە ارقاۋىنا اينالدى. وندا وسى ماسەلەگە بايلانىستى ايتىلعان ۇسىنىستار مەن پىكىرلەردى جيناقتاپ, رەسپۋبليكالىق كوميسسيا قاراۋىنا جىبەرۋ تۋرالى ورتاق شەشىم قابىلداندى. اتالعان جيىنعا كەڭەس مۇشەلەرىمەن قا­تار, جەر­گىلىكتى بيلىكتىڭ, قوعامدىق بىرلەستىكتەردىڭ, ساياسي پار­تيا­لاردىڭ وكىلدەرى قاتىستى. قوعامدىق كەڭەستىڭ ءتور­اعاسى قۋانىش ەلۋباەۆ جەر زاڭدىلىعىنداعى وزگە­رىستەرگە جۇرتشىلىقتىڭ بەي-جاي قاراماۋىنا بايلانىس­تى حالىق اراسىندا قىزۋ تالقىلاۋلار ءجۇرىپ جاتقانىن ەسكە الىپ, ماسەلەنىڭ مانىسىنە قاتىستى جينالعانداردىڭ وزىندىك وي-تۇجىرىمدارىن ورتاعا سالۋدى ۇسىندى. – ءبىزدى الاڭداتاتىنى كەي­بىرەۋلەردىڭ قازاقستاندا جەر شەتەلدىكتەرگە ساتىلادى دەگەن جالعان اقپاردى تاراتىپ جىبەرۋى. مۇنىڭ ءوزى بىرقاتار ءتۇسىن­بەستىكتەرگە جول اشتى. سوعان بايلانىستى ءتۇسىندىرۋ جۇمىستارى جانداندىرىلدى. ەلباسى جەر كودەكسىنىڭ جەكەلەگەن تارماقتارى بويىنشا بەلگىلى ءبىر مەرزىمگە موراتوري جاريالادى. پرەزيدەنتتىڭ تاپسىرماسىمەن ارنايى كوميسسيا قۇرىلىپ, جۇمىس ىستەۋدە. ءبىزدىڭ ماقساتىمىز ناقتى ءىس-شارالارمەن جۇرتشىلىقتى ايقىن حاباردار ەتۋ بولىپ تابىلادى,– دەدى ول. وبلىس اكىمىنىڭ ورىنباسارى مۇحتار جۇماعازيەۆ جەر رەفورماسىنىڭ نەگىزگى تۇستارىنا تەرەڭىرەك توقتالىپ, وبلىس اۋماعىندا وسى باعىتتا اتقارىلىپ جاتقان شارالار تۋرالى تاراتا اڭگىمەلەدى. اتالعان ماسەلە بويىنشا جاعدايدى تۇراقتاندىرۋ ءۇشىن جەرگىلىكتى بيلىك تاراپىنان قولعا الىنعان جۇمىستارمەن جەتە تانىستىردى. جەردى ءتيىمدى پايدالانۋ ماسەلەلەرىن العا تارتا كەلىپ, اۋىل­داردا كووپەراتسيا قۇرۋ كوپتەگەن ءتۇيىندى جايلاردى شەشۋگە سەپتىگىن تيگىزەتىنىن جادىعا سالدى. وبلىستىق ءماسليحاتتىڭ دەپۋتاتى, «ايس» جشس ديرەكتورى مارات يتەعۇلوۆ, فيلوسوفيا عىلىمدارىنىڭ دوكتورى, پروفەسسور التاي تاي­جانوۆ, وبلىستىق ارداگەرلەر كەڭەسىنىڭ توراعاسى كەڭەس ءبىرمانوۆ, وبلىستىق جەر قاتى­ناستارى باسقارماسىنىڭ باسشىسى قاباي سارسەنعاليەۆ جانە باسقالارى وزدەرىنىڭ جەرگە قاتىستى ويلارىن ورتاعا سالىپ, ۇسىنىس-پىكىرلەرىن ءبىلدىردى. ساتىبالدى ءساۋىرباي, «ەگەمەن قازاقستان» اقتوبە وبلىسى