قازاقستان حالقى اسسامبلەياسىنىڭ مالىمدەمەسى
مەملەكەت باسشىسى ءوسىپ-وركەندەگەن, تاۋەلسىز, ازات قازاقستاندى قۇرۋ ماقساتىنا قول جەتكىزۋدىڭ ءسوزسىز جاڭا كەزەڭى بولىپ تابىلاتىن, نەگىزگى ماسەلەلەردىڭ بارلىعىن قامتىعان مەملەكەتتىك ساياساتتىڭ ستراتەگيالىق باعىتىن ايقىنداعان «بولاشاقتىڭ ىرگەسىن بىرگە قالايمىز» اتتى جولداۋىن جاريالادى.
جولداۋدا قازاقستان تاۋەلسىزدىك جىلدارىندا ەرەكشە قارقىندى دامۋ ۇلگىسىن كورسەتكەنى اتالىپ ءوتتى. 2011 جىلدىڭ 1 قاڭتارىنىڭ وزىندە ادام باسىنا شاققاندا ءىجو كورسەتكىشى 1994 جىلمەن سالىستىرعاندا 12 ەسە ءوسىپ, ءار ادام باسىنا شاققاندا 9 مىڭ دوللاردى قۇرادى, بۇل دەڭگەيگە جەتۋ 2015 جىلعا جوسپارلانعان بولاتىن. تاۋەلسىزدىكتىڭ العاشقى 20 جىلدىعىندا مۇنداي ناتيجەگە ءالى بىردە-ءبىر ەل قول جەتكىزبەگەن ەكەن.
مەملەكەت باسشىسى ۇدەمەلى يننوۆاتسيالىق-يندۋستريالىق دامۋ باعدارلاماسى ەلەۋلى ۇلەس بەرە باستاعانىن جانە, ەڭ باستىسى, ەكونوميكانى ونىڭ ناقتى سەكتورىنىڭ ءوسىمى ەسەبىنەن تەرەڭ قۇرىلىمداۋعا باستاۋ بولعانىن ەگجەي-تەگجەيلى كورسەتىپ بەردى.
مەملەكەت باسشىسىنىڭ باستاماسىمەن اگرارلىق سەكتوردا اۋىلدىڭ يندۋستريالىق دامۋىنا قۋاتتى سەرپىن بەرەتىن ەتتى مال ءوندىرىسىن دامىتۋ بويىنشا بۇرىن بولماعان جوبانى ىسكە اسىرۋ جوسپارلانۋدا.
پرەزيدەنت ن.ءا. نازارباەۆ ايماقتىق ساياساتتىڭ جاڭا ۇستانىمىن قالىپتاستىرۋدى ۇسىنىپ: «قۋاتتى بيزنەس – قۋاتتى مەملەكەت» قاعيداسىن جاريالادى.
جولداۋدا سىبايلاس جەمقورلىققا قارسى الەمدىك رەيتينگتەگى ءبىزدىڭ ەلىمىزدىڭ كورسەتكىشىن 45 تارماققا العا جىلجىتۋعا جانە تمد-دا جوعارى پوزيتسياعا شىعۋىنا مۇمكىندىك بەرگەن سىبايلاس جەمقورلىقپەن كۇرەستىڭ اسەرلى ناتيجەلەرى اتالىپ ءوتتى.
ەڭ بەدەلدى الەمدىك رەيتينگتەردە قازاقستان ايتارلىقتاي العا شىقتى. الەمدىك بانكتىڭ 2010 جىلعى بايانداماسىندا قازاقستان بيزنەس مۇددەسىن قورعاۋ ءجونىندە رەفورما جۇرگىزۋ بويىنشا كوشباسشى دەپ تانىلدى. قازاقستان نەعۇرلىم قولايلى بيزنەس-كليماتتى ەلدەردىڭ الەمدىك رەيتينگىندە الەمنىڭ 183 ەلىنىڭ ىشىندە 59-ورىندى يەلەندى. بۇل – ۇلت كوشباسشىسى مەن قازاقستان حالقىنىڭ قاجىرلى ەڭبەگىنىڭ الەمدىك قوعامداستىقپەن ناقتى مويىندالۋى.
مەملەكەت باسشىسى كۇن تارتىبىنە حالىقتىڭ ءال-اۋقاتىن نىعايتۋعا باعىتتالعان الەۋمەتتىك مودەرنيزاتسيا جانە جاڭا الەۋمەتتىك ساياسات ماسەلەسىن قويدى. ءبىلىم بەرۋدى, دەنساۋلىق ساقتاۋدى جانە تىلدەردى دامىتۋدىڭ ماڭىزدى مەملەكەتتىك باعدارلامالارى قاتارىنا تۇبەگەيلى يننوۆاتسيالىق باعدارلامالار: جاڭا جۇمىسپەن قامتۋ ستراتەگياسى, تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋ, تۇرعىنداردى ساپالى اۋىز سۋمەن قامتاماسىز ەتۋ قوسىلدى. بۇل باعدارلامالار ءاربىر قازاقستان ازاماتىنىڭ ءومىرىن تىكەلەي جاقسارتۋدى كوزدەيدى.
قازاقستان حالقى اسسامبلەياسى پرەزيدەنت جولداۋىن قازاقستان حالقىنىڭ الەۋمەتتىك تولىسۋىنىڭ, ونىڭ اينىماس ۇلتتىق بىرلىگىنىڭ, قوعامدىق كەلىسىمى مەن تولەرانتتىلىقتى نىعايتۋدىڭ, ۇلت كوشباسشىسىنىڭ اينالاسىنا توپتاسۋدىڭ, قۋاتتى ۇلت قالىپتاستىرۋدىڭ بەرىك نەگىزى دەپ سانايدى.
جولداۋدىڭ ءتىل ساياساتى باعىتىنداعى مىندەتتەرى قوعامداعى تەرەڭ وزگەرىستەردى, بەيبىتشىلىك پەن كەلىسىمنىڭ كوپتىلدى جانە كوپكونفەسسيالى قوعامداعى سەنىم, مەملەكەتتىك ءتىل – قازاق ءتىلىن وقۋعا دەگەن شىنايى تالپىنىس پەن سول تىلمەن اتالاتىن جەرگە دەگەن سىيلاستىق تۋعىزعانىن كورسەتەدى. قازاقستان حالقى اسسامبلەياسى نۇرسۇلتان ءابىش ۇلىنىڭ ءار قازاقستان ازاماتى ءۇشىن ءۇش ءتىلدى ءبىلۋ – باياندى بولاشاقتىڭ كەپىلى تۋرالى ويىن تولىعىمەن قولدايدى جانە ىسكە اسىرۋعا كۇش سالادى.
قازاقستان حالقى اسسامبلەياسى ۇلت كوشباسشىسىنىڭ 2011 جىلدى – تاۋەلسىزدىكتىڭ 20 جىلدىعىن «بەيبىتشىلىك پەن جاسامپازدىقتىڭ 20 جىلى» دەپ جاريالاۋ تۋرالى شەشىمىن قولدايدى. ءتاۋەلسىزدىك جىلدارى قازاقستاندىق جولدىڭ نەگىزگى قۇندىلىقتارى قالىپتاستى, ولار – بوستاندىق, بىرلىك, تۇراقتىلىق, وركەندەۋ. قازاقستان حالقىنىڭ جانىنا جاقىن بۇل ۇعىمدار ءار ازاماتتىڭ ىشكى جان-دۇنيەسىنىڭ, ءدىلىنىڭ, ومىرلىك قاعيداتتارىنىڭ ولشەمىنە اينالدى.
بۇل ۇعىمدار, 15 جىل بويى, نۇرسۇلتان ءابىش ۇلى نازارباەۆتىڭ باستاماسىمەن قۇرىلعان قازاقستان حالقى اسسامبلەياسى جۇمىسىنىڭ نەگىزگى باعىتتارى بولىپ كەلەدى.
ءبىز, ۇلتىمىزدىڭ كوشباسشىسى, تۇڭعىش پرەزيدەنت جانە تاۋەلسىز قازاقستاننىڭ نەگىزىن قالاۋشى نۇرسۇلتان ءابىش ۇلى نازارباەۆ, حالىقتىڭ جۇرەگىنەن شىققان 2020 جىلعا دەيىن پرەزيدەنتتىڭ وكىلەتتىگىن ۇزارتۋ تۋرالى باستامانى قولدايدى دەپ سەنەمىز. بۇل باستاما بۇگىن قازاقستان حالقىن بىرىكتىرىپ, ۇلكەن قوعامدىق قوزعالىسقا, «قازاقستان – 2020» دەموكراتيالىق كۇشتەر قوعامدىق كواليتسياسىنا اينالدى.
تاۋەلسىز جانە ەگەمەن قازاقستاننىڭ جالعىز بيلىك قۋاتى – حالىق. قازاقستان حالقى ءوزىنىڭ وتكەنى, بۇگىنى مەن بولاشاعىن ءوز پرەزيدەنتىمەن بايلانىستىرادى. بۇل – اقساقالداردىڭ دانالىعىمەن جانە جاستاردىڭ سەرپىلىسىمەن, انالاردىڭ بالالارى تۋرالى ويلارىمەن جانە كاسىپكەرلەردىڭ ىسكەرلىك كوزقاراسىمەن قابىلدانعان شەشىم. بۇل قىزمەتتەگى پرەزيدەنتتى تاڭداعان ەركىن جانە ەرىكتى جالپىحالىقتىق شەشىم.
قازاقستان حالقى اسسامبلەياسى «بولاشاقتىڭ ىرگەسىن بىرگە قالايمىز!» اتتى جولداۋ – حالىقتىڭ ءوز كوشباسشىسىنا بايلانىستى قابىلداعان شەشىمىن قولداۋشى سالماقتى دالەل ەكەنىن ناقتىلاي وتىرىپ, بارلىق قازاقستان ازاماتتارىن بەيبىتشىلىك پەن تۇراقتىلىق نەگىزىندە باس بىرىكتىرىپ, پرەزيدەنت ناقتىلاعان تاپسىرمالاردى ورىنداۋعا جۇمىلۋعا, ءبىرلىگىمىزدى ساقتاۋعا جانە ءوزىمىزدىڭ ساياسي تاڭداۋىمىزدى دۇرىس جاساۋعا شاقىرادى.
بۇل بارلىعىمىزعا جانە ارقايسىمىزعا, تاۋەلسىز وتانىمىز – قازاقستان رەسپۋبليكاسىنىڭ دامۋى مەن وركەندەۋى ءۇشىن قاجەت.
قازاقستان حالقى اسسامبلەياسىنىڭ كەڭەسى
2011 جىلعى 28 قاڭتار.
