«جاس قانات-2016» جەڭىمپازى انىقتالدى

«جاس قانات – 2016» جاس انشىلەردىڭ رەسپۋبليكالىق بايقاۋىنىڭ العاشقى كونتسەرتى 20 مامىر كۇنى وتكەن بولاتىن. بۇل كۇن تەك قاتىسۋشىلار عانا ەمەس, قازىلار القاسى ءۇشىن دە اسا تولقىمالى ساتتەرگە تولى بولدى. اسىرەسە, مەدەۋ ارىنباەۆ, مارجان اراپباەۆا, ءمادينا سادۋاقاسوۆا, جانار دۇعالوۆا سىندى جاسقاناتتىقتارعا كونتسەرت ەرەكشە توسىن سىي تارتىپتى. ولار «جاس قانات» بايقاۋىنىڭ مۇراعاتىنداعى بەينەجازبادان وزدەرىنىڭ ونەر كورسەتكەن كەزدەرىن تاماشالاپ, وتكەن كۇنگە ساياحات جاسادى. سايىسقا قاتىسۋشى ونەرپازدار بۇل جولعى بايگەدەن وزدەرىنىڭ ونەر جولى­نا ۇلكەن سا­باق الىپ قانا قوي­ماي, استانا قالاسىمەن دە كەڭىنەن تانىسىپ ۇلگەردى. ولاي دەي­تىنىمىز, جارىستى ۇيىم­داستىرۋشىلار ءۇمىت­كەرلەردىڭ ءاربىر كۇنى اسەرلى بولۋى ءۇشىن قالامىزدىڭ كورىكتى جەرلەرىنە ساياحات ۇيىمداستىرعان بولاتىن. سولاردىڭ سوڭ­عىسى ءارى قاتىسۋشىلار ءۇشىن ەڭ ماڭىزدىسى ەلوردا اكىمدىگىندەگى كەزدەسۋ بولدى. استانا قالاسى اكىمىنىڭ ورىنباسارى ەرمەك امانشاەۆ ونەرلى ورەندەرمەن جۇرەكجاردى اڭگىمە قوزعادى. «جاس قاناتتىڭ» ەندى-ەندى اياققا تۇرا بەرگەن كەزەڭىنە كوز جۇگىرتىپ, جاس دارىنداردى قاناتتاندىردى. كەزدەسۋ سوڭىندا قاتىسۋشىلار ءبىر اۋىزدان «ايتتىم سالەم قالامقاس» ءانىن تارتۋ ەتىپ, ريزاشىلىقتارىن جەتكىزدى. اكىم ورىنباسارى ەستەلىك كىتاپتار مەن گۇل شوعىن تابىستادى. سونىمەن, سايىس قورىتىندىسىنا كەلەتىن بولساق, ءۇش كۇن بويى ۇمىتكەرلەردىڭ اراسىنان ۇزدىك بولىپ, ءوزىنىڭ ونەرىمەن كورەرمەندى دە, قازىلاردى دا ەرەكشە تاڭعالدىرعان پاراسات وتان وزا شىعىپ, جارىستىڭ جەڭىمپازى اتاندى. ەكىنشى ورىن قاراعاندىدان كەلگەن «ءۇش ءجۇز» توبىنا بۇيىرسا, ءۇشىنشى ورىندى ورالدىق ايبەك داۋلەتقاليەۆ ەنشىلەدى. سونداي-اق, مەرەيتويلىق گالا-كونتسەرتتە ەلىمىزدىڭ تانىمال انشىلەرى ءمادينا سادۋاقاسوۆا, مەدەۋ ارىنباەۆ, مارجان اراپباەۆا, جانار دۇعالوۆا, «مەلومەن» توبى, نۇرلان ابدۋللين, نۇرجامال ۇسەنباەۆا, ەرلان كوكەەۆ, باقىت شاداەۆا, ديماش قۇدايبەرگەن ونەر كورسەتتى. راۋان قايدار, «ەگەمەن قازاقستان»