رەسەي مۇعاجىرىنىڭ ۇلى اۆستريا پرەزيدەنتى بولدى

استانا. 23 مامىر. اۆستريادا پرەزيدەنت سايلاۋى ەكىنشى تۋرىنىڭ ناتيجەلەرى بەلگىلى بولدى. وندا ازداعان داۋىس ارتىقشىلىعىمەن «جاسىلدار» پارتياسىنىڭ ەكس-ليدەرى 72 جاستاعى الەكساندر ۆان دەر بەللەن جەڭىسكە جەتتى. بۇل تۋرالى «ۆەستي.Ru» اقپارىنا سۇيەنگەن egemen.kz ءتىلشىسى حابارلادى. جاڭا پرەزيدەنت اتانعالى تۇرعان كانديدات سايلاۋدا 50,35 پايىزدىق داۋىسقا يە بولدى. ونىڭ وڭشىل پوپۋليستىك اۆستريا ازاتتىق پارتياسىنان تۇسكەن قارسىلاسى نوربەرت حوفەر 49,64 پايىزدىق داۋىس الدى. ەكى قارسىلاستىڭ اراسىن نەبارى 31 مىڭنان ءسال اساتىن داۋىس قانا ءبولىپ تۇردى. سوڭعى ساتكە دەيىن جۇرت جەڭىسكە جەتەدى دەپ ءۇمىت ارتقان حوفەر ناتيجە رەسمي جاريالانعانعا دەيىن-اق ءوزىنىڭ ۇتىلىپ قالعانىن مويىندادى. ول سوسىن «فەيسبۋك» جەلىسى ارقىلى ءوز سايلاۋشىلارىنا العىس ايتتى. بۇعان دەيىن نوربەرت حوفەر ەۋروينتەگراتسياعا بارىنشا قارسى بولىپ كەلگەن, ميگراتسيانى قالامايتىن پوزيتسياسىمەن تانىمال ەدى. بۇعان قاراعاندا, بەللەن قالىپتى سولشىل تسەنتريستەر كوزقاراستى ۇستانىپ, ەۋروينتەگراتسياعا قارسى ەمەس ەكەنىن ءبىلدىرىپ كەلەدى. مۇنى جۇرت كەيدە ونىڭ ءوزىنىڭ دە مۇعاجىردىڭ, ياعني ەمميگرانتتىڭ بالاسى ەكەنىندىگىنەن كورەدى. ماسەلە مىنادا, الەكساندر ۆان دەر بەللەننىڭ اكەسى الەكساندر الەكساندروۆيچ (ۆان دەر) بەللەن – پسكوۆ قالاسىنىڭ تۋماسى. ونىڭ وتباسى XX عاسىردىڭ باس جاعىندا رەسەيدى رەۆوليۋتسيا جالىنى شارپي باستاعان كەزدە ەستونيا ارقىلى گەرمانياعا قونىس اۋدارعان ەدى. كەيىن ولار اۆسترياعا كەلىپ تابان تىرەدى. الەكساندار ۆان دەر بەللەن 1944 جىلى ۆەنادا تۋعان. اۆستريادا پرەزيدەنت بۇكىلحالىقتىق سايلاۋ جولىمەن 6 جىلعا سايلانىپ, نەگىزىنەن رەپرەزەنتيۆتى فۋنكتسيا اتقارادى. ال اتقارۋشى بيلىكتى فەدەرالدى كانتسلەر باسقارادى. سونىمەن بىرگە پرەزيدەنت اۆستريادا باس قولباسشى بولىپ تابىلادى, كەيبىر جاعدايلاردا كانتسلەردى وتستاۆكاعا جىبەرىپ, پارلامەنتتى تاراتا الادى. تالعات رايىمبەك. دەرەك, فوتو: ۆەستي.Ru.