ۇلىبريتانيادا ەڭ سوڭعى تەمەكى زاۋىتى جابىلدى

استانا. 23 مامىر. ۇلىبريتانيانىڭ نوتتينگەم گرافتىعىندا ورنالاسقان Imperial Tobacco كومپانياسىنا قاراستى تەمەكى فابريكاسى جۇمىسىن توقتاتتى. بۇل تۋرالى ۆۆس (بي-بي-سي) اقپارىنا سۇيەنگەن egemen.kz ءتىلشىسى حابارلادى. وسىمەن البيون جەرىندەگى شىلىم شىعاراتىن ەڭ سوڭعى ءوندىرىس ورنى ءوز جۇمىسىن توقتاتتى. ەندى Imperial Tobacco ءوزىنىڭ زاۋىتتارىن جۇمىس كۇشتەرى مەيلىنشە ارزان ەلدەردىڭ تەرريتوريالارىنا قاراي بىرتىندەپ كوشىرە باستايدى. كومپانيا وكىلىنىڭ ايتۋىنشا, ءوندىرىستى گەرمانيا مەن پولشا جەرىنە كوشىرۋ كومپانيانىڭ ءتۇسىمىن £320 ملن. ($464,2 ملن.) اقشاعا ارتتىرادى. نوتتينگەمدەگى فابريكا 1972 جىلى سالىنعان. كومپانيا ونىڭ ساتىلعانىن بۇدان بىرنەشە اي بۇرىن جاريا ەتتى. ءوندىرىس ءوزىنىڭ جۇمىسى شىڭىنا شىعىپ تۇرعان كەزدە جىلىنا 52 ملرد. سيگارەت شىعارىپ تۇردى. كاسىپشىلدەر وداعىنىڭ وكىلى كريس نيدحەمنىڭ ايتۋىنا قاراعاندا, كەيىنگى جىلدارى بريتانيادا تەمەكىگە دەگەن سۇرانىس قاتتى ءتۇسىپ كەتكەن. «ماسەلە ءوندىرىستىڭ قۇلدىراۋىندا عانا ەمەس, مۇنداعى نەگىزگى فاكتور قوعامنىڭ تەمەكىگە دەگەن كوزقاراسىنىڭ ناشارلاپ كەتۋىندە بولىپ وتىر», - دەدى ول. «قازىر ولار تەمەكىگە دەگەن الەۋمەتتىك جەككورۋشىلىك سەزىمى ءالى كۇشتى ەمەس ازيا ەلدەرىنە قاراي بەت بۇرعالى تۇر. مەن Imperial Tobacco كومپانياسىنىڭ يراك, سيريا, رەسەي, قىتاي ەلدەرىنىڭ نارىعىنا ءۇمىت ارتىپ وتىرعانىنا سەنىمدىمىن», - دەپ تۇيىندەدى كاسىپوداق وكىلى. تالعات رايىمبەك. دەرەك, فوتو: ۆۆس.