قازاقستاننىڭ ءرولى جوعارى باعالانعان باسقوسۋلار

ءماجىلىس سپيكەرى ب.ىزمۇحامبەتوۆ سانكت-پەتەربۋرگتە تمد پاا شارالارى اياسىندا تاجىكستاننان, قىرعىزستاننان, ازەربايجاننان كەلگەن ارىپتەستەرىمەن, سونداي-اق ەقىۇ پارلامەنتتىك اسسامبلەياسىنىڭ توراعاسىمەن كەزدەستى, دەپ حابارلادى وسى پالاتانىڭ ءباسپاسوز قىزمەتى. جۇزدەسۋ بارىسىندا پارلا­مەنتارالىق, سونىڭ ىشىندە, ىنتى­ماقتاستىق جونىندەگى توپتار, سونىمەن قاتار, قازاقستان مەن قىرعىزستان پارلامەنتتەرىمەن ۇيىمداستىرىلعان پارلامەنت­ارالىق كەڭەس اياسىندا ءوزارا ءىس-قيمىلدى دامىتۋ ماسەلەلەرى تالقىلاندى. باقتىقوجا ىزمۇحامبەتوۆ ازەر­بايجان, قىرعىزستان پارلا­مەنت­تەرىنىڭ توراعالارىنا, سونداي-اق تاجىكستان ولي ءماجىلىسى نا­مويان­داگون ءماجى­لىسىنىڭ سپي­كەرى­نە قازاقستان پرەزيدەنتىنىڭ «الەم. XXI عاسىر» مانيفەسىن جولدادى. ءماجىلىس سپيكەرى ەقىۇ پا توراعاسى يلككا كانەرۆامەن كەزدەسۋىندە دە اتالعان ۇيىمعا قا­تى­سۋشى-مەملەكەتتەر تاراپىنان ماني­فەستىڭ قولداۋ تاباتىندىعىنا سەنىم ءبىلدىردى. ءوز كەزەگىندە يلككا كانەرۆا قازاقستاننىڭ ەقىۇ پا-داعى ءرولىن جوعارى باعالادى. اڭگىمە بارىسىندا باقتىقوجا ىزمۇحامبەتوۆ داعدارىس, لاڭكەستىك شابۋىلدار, ەكونوميكالىق سانكتسيالار جاعدايىندا پارلامەنتارالىق قارىم-قاتىناس ءرولىنىڭ ارتا تۇسەتىندىگىن اتاپ ءوتتى. باقتىقوجا ىزمۇحامبەتوۆ باستاعان پالاتا دەلەگاتسياسى سانكت-پەتەربۋرگتەگى شارالار بارىسىندا تمد پاا 44-پلەنارلىق وتىرىسىنا قاتىستى. وندا عارىش كەڭىستىگىن بەيبىت ماقساتقا پايدالانۋ مەن زەرتتەۋ سالاسىندا, سونداي-اق, «بيوەنەرگەتيكانى دامىتۋ نەگىزدەرى تۋرالى», «ەكولوگيالىق ساراپتاما تۋرالى», «اعارتۋشىلىق قىزمەت تۋرالى», باسقا دا مودەلدىك زاڭدار بويىنشا ىنتىماقتاستىق تۋرالى تمد كونۆەنتسياسىنىڭ جوباسى تالقىلاندى. ءماجىلىس دەپۋتاتتارى م.ءاشىم­باەۆ, س.وماروۆ, م.ايسي­نا, م.تىنىكەەۆ, ش.حاحازوۆ, م.چيركوۆ, ب.ماكەن تمد پاا وتى­رىسى اياسىندا مەملەكەتتىك قۇرى­لىس جانە جەرگىلىكتى ءوزىن ءوزى باس­قارۋ تاجىريبەسىن مەڭگەرۋ, ساياسي ءما­سەلەلەر مەن حالىقارالىق ىنتىماقتاستىق, اگرارلىق ساياسات, تابيعي رەسۋرس جانە ەكولوگيا, مادەنيەت, اقپارات, تۋريزم جانە سپورت باعىتتارىنداعى مودەلدىك زاڭنامالار بويىنشا پىكىر الماستى. سونىمەن قاتار, پارلامەنت­ارالىق وداق, ەۋروپا كەڭەسى پارلا­مەنتتىك اسسامبلەياسى, دوستاس­تىق (ۇلتتار) پارلامەنتتىك قاۋىم­داستىعى توراعالارى دا بيىك ءمىن­بەر­دەن وزەكتى ماسەلەلەردى كوتەردى. وسى رەتتە پارلامەنتارالىق اسسامبلەيالار ىنتىماقتاستى­عىن ارتتىرۋعا ايرىقشا نازار اۋدارىلدى. بۇل تۋراسىندا ەقىۇ پا توراعاسى يلككا كانەرۆا پارلامەنتتىك ديپلوماتيا مەن ءوزارا ءىس-قيمىلدىڭ كۇشىنە سەنەتى­نىن, باستى ماقسات ەتەنە باي­لانىس ورناتۋ ەكەندىگىن العا تارت­سا, پارلامەنتارالىق وداق ءتور­اعاسى سابەر چوۋدحۋري سانكت-پەتەر­بۋرگتە شىعىس پەن باتىستىڭ پار­لا­مەنتتىك اسسامبلەيالارى كەزدە­سۋى­نىڭ ماڭىزدىلىعىن ءسوز ەتىپ: – سوڭعى 24 جىلدا قابىلدانعان مودەلدىك زاڭداردىڭ 86 پايىزى بەلگىلى دەڭگەيدە ۇلتتىق پارلامەنتتەرمەن بايلانىستى. بۇل – ۇلتتىق پارلامەنتتەر ءۇشىن جاق­سى تاجىريبە. ول تاجىريبەنى حالىق­ارالىق قوعامداستىقپەن ءبولىسۋدىڭ پايداسى وتە-موتە زور, – دەدى. پارلامەنت وكىلدەرى قازىرگى جاعدايدا, مەملەكەتتەردى جاقىن­داس­تىرۋدا پارلامەنتتىك ديپ­لوماتيانىڭ ءرولى ارتا تۇسە­تىنىنە سەنىم ءبىلدىردى.