قۇندى جادىگەرلەردەن قۇرالعان قور

جۋىردا ەلورداداعى تۇڭعىش پرەزيدەنت مۋزەيىندە قازاقستان حالقىنىڭ بىرلىگى كۇنىنە ارنالعان «كۇندەلىكتى ءومىردىڭ بەينەلەرى» اتتى تاقىرىپتا قور كورمەسىنىڭ اشىلۋ سالتاناتى ءوتتى. «مۋزەي جيناعى» اتتى جاڭا مۋزەيتانۋ باعدارلاماسى العاش رەت الەم حالىقتارىنىڭ كۇندەلىكتى تۇرمىستىق مادەنيەتىنىڭ ماڭىزدى تۇستارىن كورسەتەتىن تاقىرىپتىق ينتەرەر توپتاماسىنا جۇيەلەنگەن مۋزەي جيناقتارىنىڭ شاعىن بولىگىن ۇسىندى. كورمەنى مۋزەي ديرەكتورىنىڭ ورىنباسارى كۇلايشا اقتاەۆا اشىپ, ەلباسى كىتاپحاناسىنىڭ اتقارۋشى ديرەكتورى بەيسەمباي جۇمابەكوۆ مۋزەي تاريحىنا, ون­داعى جادىگەرلەردىڭ قۇندىلىعىنا توقتالدى. ايتا كەتەيىك, مۋزەي جيناقتا­رىنىڭ ەرەكشەلىگى – قازاقستان رەسپۋب­ليكاسىنىڭ پرەزيدەنتى ن.ءا.نازارباەۆقا, قازاق ەلىنە, قازاق حالقىنا, الەمدەگى ءوزارا ىق­پالداستىق پەن تاتۋ كور­شىلىك­تى دامىتۋعا باعىتتالعان قازاق­ستاننىڭ حالىقارالىق دەڭگەيدەگى بەلسەندى ءىس-ارەكەتىنە دەگەن زور قۇرمەتتىڭ بەلگىسى رەتىندە تابىس ەتىلگەن سىيلىقتاردان قۇرال­عان. توپتامالار مەن جەكە جادىگەر­لەردىڭ تۇساۋكەسەرى مۋزەي قىزمەت­كەرلەرىنىڭ جۇيەلەنگەن تۇراقتى جۇمىستارىنىڭ ناتيجەسى رەتىندە «مۋزەي جيناعى» باعدار­لاماسىنىڭ ماڭىزدى باعىتتارىنىڭ ءبىرىن قۇرايدى. الەم حالىقتارىنىڭ الۋان ءتۇرلى شىعارماشىلىعى مەن جوعارى كوركەم مادەنيەتىنىڭ ءۇل­گىلەرىنەن ىرىكتەلىپ الىنعان قاي­تالانباس بىرەگەي جيىنتىق ءوز تاريحىنان كوپتەگەن اقپارات بەرەدى. مۋزەيدىڭ ءۇش زالىندا ورنا­لاسقان «كۇندەلىكتى ءومىردىڭ بەي­نەلەرى» كورمەسىنىڭ ەكسپوزيتسياسى كلاسسيكالىق مۋزەيلىك ساحنالىق كورىنىستەردەن جانە سانامىزدا كۇندەلىكتى ومىردەگى اسەمدىكتىڭ سيم­ۆولى رەتىندە قالىپتاسقان جەكە زاتتاردان قۇرالعان. كورمە 2016 جىلدىڭ 26 ماۋسىمىنا دەيىن جال­عاساتىن بولادى. راۋشان تاۋىرحانقىزى, «ەگەمەن قازاقستان» سۋرەتتى تۇسىرگەن ەرلان وماروۆ