ەلىمىزدىڭ الەۋەتى تانىستىرىلعان ساپار

گەرمانيانىڭ ەۋروپاداعى قاۋىپسىزدىك جانە ىنتى­ماقتاستىق ۇيىمىنداعى (Eقىۇ) توراعالىعى اياسىندا جاقىندا بەرليندە وتكەن «ساۋدا مەن ينۆەستيتسيالاردىڭ ءوزارا بايلانىستىلىعى» («Connectivity for Commerce and Investment») حالىقارالىق كونفەرەنتسياسىنا قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو باستاعان دەلەگاتسيا قاتىستى. دەلەگاتسيانىڭ قۇرامىنا قازاقستان رەسپۋبليكاسىنىڭ ەقىۇ-داعى تۇراقتى وكىلى قاي­رات سارىباي, قازاقستاننىڭ گەرمانياداعى ەلشىسى بولات ءنۇسىپوۆ, ءتيىستى مينيسترلىكتەر مەن ۆەدومستۆولاردىڭ, سونداي-اق, ۇلت­تىق كومپانيالاردىڭ وكىلدەرى ەندى. «ەۋرازيا كەڭىستىگىندە ەكونو­ميكالىق ءوزارا ارەكەت­تەستىكتى نىعايتۋ» تاقىرىبىنداعى پلەن­ار­لىق سەسسيادا ر.ۆاسيلەنكو ءسوز سويلەپ, كونفەرەنتسياعا قاتى­سۋشىلاردى ەۋرازيا قۇرلى­عىنىڭ كىندىگىنە ورنالاسقان ەلىمىزدىڭ گەوگرافيالىق ورنىنىڭ ارتىقشىلىقتارىن بارىنشا تولىق جانە ءتيىمدى پايدالانۋعا باعىتتالعان ساياساتىنىڭ باستى باسىمدىقتارىمەن تانىستىردى. كونفەرەنتسياعا قاتىسۋ­شى­لار ءۇشىن «نۇرلى جول» ينفراقۇرىلىمدىق دامۋ باع­دارلاماسى, «باتىس ەۋروپا – باتىس قىتاي» اۆتوكولىك جولى­نىڭ قۇرىلىسى, «قورعاس» شەكارا ماڭى ىنتىماقتاستىعى حالىق­ارالىق ورتالىعىن دامىتۋ جوسپارلارى, اقتاۋ تەڭىز پورتى مەن ترانسكاسپي لوگيستيكالىق باعىتتارى ۇلكەن قىزىعۋشىلىق تۋدىردى. كونفەرەنتسياعا قاتىسۋ­شى­لارعا, سونداي-اق, جىبەك جولىنىڭ ەكونوميكالىق بەلدەۋى مەن ەۋر­ا­زيالىق ەكونوميكالىق وداقتى (ەاەو) قوسا العاندا ەۋرازيا­داعى ءتۇرلى ينتەگراتسيالىق باستاما­لار مەن ينفراقۇرىلىمدىق دامۋ باعدارلامالارىنىڭ ءوزارا ءتيىم­دىلىگىن كورسەتەتىن جوبا-جوس­پارلار تانىستىرىلدى. وسى وراي­دا, ءوزارا ءتيىمدى ەكونوميكالىق ىنتىماقتاستىقتىڭ كەلەشەگىن انىقتاۋ ماقساتىندا ەاەو جانە ەۋروپالىق وداق اراسىنداعى ۇنقاتىسۋدى جولعا قويۋ تۋرالى ەاەو توراعاسى رەتىندەگى قازاق­ستان پرەزيدەنتى نۇرسۇلتان نازارباەۆتىڭ بۇرىن جاريالانعان باستاماسىنىڭ ماڭىزدىلىعى ەرەكشە اتالدى. كونفەرەنتسيانىڭ ماقساتى ۆانكۋۆەردەن ۆلاديۆوستوك­قا دەيىنگى ەكونوميكالىق باي­لانىستاردى نىعايتۋ مۇددە­ل­ەرى ءۇشىن ساۋدا جانە ينۆەس­تيتسيالىق جاعدايلاردى جاقسارتۋ مۇمكىندىكتەرىن ىزدەستىرۋ بولدى. ەقىۇ-نىڭ ەكىنشى ولشەمى شەڭبەرىندە ۇيىمداستىرىلعان بۇل ءىس-شاراعا ەقىۇ كەڭىستىگى ءتۇرلى اۋماقتارىنىڭ ساياسي-ەكونوميكالىق جانە ازاماتتىق قوعامنىڭ جەتەكشى وكىلدەرى قاتىستى. ۇستىمىزدەگى جىلى ەقىۇ-دا گەرمانيا توراعالىق ەتەدى. بۇگىندە بەرلين «ۇنقا­تىسۋدى جاڭعىرتۋ, سەنىمدى جاڭا­دان قا­لىپتاستىرۋ, قاۋىپسىزدىكتى قالپىنا كەلتىرۋ» ۇرانىمەن فەدەرالدىق ۇكىمەت وزەكتى تاقى­رىپتاردىڭ مەيلىنشە مول سانى بويىنشا ۇنقاتىسۋدى ىلگەرىلەتۋ, ەقىۇ كەڭىستىگىندە ۇزاق مەرزىمدى نەگىزدەگى سەنىمدى قالپىنا كەلتىرۋ ءۇشىن ەقىۇ ينستيتۋتتارى مەن قۇرالدارىن نىعايتۋعا ىقپال ەتۋگە نيەتتى ەكەنىن انىق ءبىلدىرىپ وتىر. بەرليندە بولۋى كەزىندە ر.ۆاسيلەنكو گفر ءسىم-ءىنىڭ شىعىس ەۋروپا, كاۆكاز جانە ورتالىق ازيا ەلدەرىمەن ىنتى­ماقتاستىق ماسەلەلەرى بو­يىنشا ۋاكىلى اندرەاس پەش­كەمەن, قازاقستان-گەرمانيا ستراتەگيالىق ىنتىماقتاستىعى بويىنشا ىسكەرلىك كەڭەسىنىڭ تەڭ توراعاسى پەتەر تيلسپەن جانە گەرمانيانىڭ شىعىس ەكونوميكا كوميتەتىنىڭ ايماقتىق ديرەكتورى مارتين حوفمانمەن كەزدەسىپ, كەلىسسوزدەر جۇرگىزدى. سۇحباتتاستار ەكىجاقتى قارىم-قاتىناستاردى دامىتۋ مەن حالىق­ارالىق كۇن ءتارتىبىنىڭ وزەكتى ماسەلەلەرىمەن قاتار, ەكى مەملەكەتتىڭ شيكىزات پەن تەحنو­لوگيالىق سەرىكتەستىگى شەڭبەرىندە ەكونوميكالىق كەلىسىمدەردى جۇزەگە اسىرۋ بويىنشا تابىستى ءوزارا ارەكەتتەستىگى, استانادا وكىزىلەتىن  ەكسپو-2017 كورمەسىنە گەرمانيانىڭ قاتىسۋى, سونداي-اق, قازاقستاندا قوسارلانعان ءبىلىم بەرۋدە نەمىس ۇلگىسىن ەنگىزۋ ماسەلەلەرىن تالقىلادى. قازاقستاندىق ديپلومات, سونىمەن قاتار, اۆستريا سىرتقى ىستەر مينيسترلىگىنىڭ باس حاتشىسى ميحاەل لينحارتپەن كەزدەستى. كەزدەسۋدە ەكىجاقتى كۇن ءتارتىبىنىڭ وزەكتى ماسەلەلەرى مەن اۆستريانىڭ الداعى 2017 جىلى ەقىۇ-دا توراعالىق ەتۋىنە قاتىستى جايتتار تالقىلاندى. اۆستريا توراعالىعىنىڭ «جاسىل ەكونوميكانى قۇرۋ, سەرىكتەس­تىكتى جاساۋ» (Greening the Economies, Building Partnerships) بويىنشا ۇسىنعان ۇرانى قازاقستاننىڭ سىرتقى ساياسي باسىمدىقتارى مەن الداعى ەكسپو-2017 حالىق­ارالىق مامانداندىرىل­­عان كورمەسىنىڭ تۇجىرىمداماسىمەن اسا ۇندەس ەكەنى اتاپ كورسەتىلدى. وسىعان وراي, سۇحباتتاستار كەلەسى جىلى ەكى مەملەكەتتىڭ كۇش-جىگەرىن ەكسپو-2017 الاڭىندا بىرىكتىرۋ تۋرالى ۋاعدالاستىققا كەلدى. «ەگەمەن-اقپارات»