ەلباسىمەن بىرگەمىز!
قازاقستاندىقتار ن.نازارباەۆتىڭ پرەزيدەنتتىك وكىلەتتىگىن ۇزارتۋدى قولدايدى
«ەلباسى كەمەڭگەر – كوشى ءتۇزۋ كەمەلدى ەل!»
اتتى اكتسياعا 10 مىڭ قىزىلوردالىق قاتىستى
مىنا فانيدە ساتىپ الۋعا بولمايتىن, قۇنى اقشامەن ولشەنبەيتىن دۇنيەلەر بولادى. سونىڭ ءبىرى – پەيىل, ادامداردىڭ كوڭىلى. ات باسىنداي التىن بەرىپ ادامنىڭ كوڭىلىن اۋلاۋ, ونىڭ ساعان دەگەن نيەتىن ساتىپ الۋ مۇمكىن ەمەس. سىيلاستىق – ساتىلمايدى. «جاقسىلاردى قۇداي جولىقتىرادى» دەگەن ءتامسىل بار. اسىلىندا, جاراتۋشى جاپپار يەمىز قازاق جۇرتىنا جاقسى باسشى جولىقتىرعان. ويتكەنى, ەلدىڭ ەلباسىعا دەگەن پەيىلى ەرەكشە. اقمەشىت القابى اق قارعا وراندى. قىس بويىنا تابيعات انا توسىن مىنەز تانىتىپ, قار بولماپ ەدى. بىرنەشە كۇن بۇرىن قىزىلوردا اق كورپە جامىلدى. بۇعان دەيىن توبەسىندە كۇن ك ۇلىپ تۇرعان قىزىلوردادا قازىر اياز سالتانات قۇرىپ تۇر. سوندا دا جۇرت قالانىڭ ورتالىق الاڭىنا قاراي اعىلۋدا. سەبەبى, مۇندا وبلىستىق ازاماتتىق قوعام وكىلدەرىنىڭ باستاماسىمەن «ەلباسى كەمەڭگەر – كوشى ءتۇزۋ كەمەلدى ەل!» اتتى اكتسيا ءوتىپ جاتقان. ءبىر ءسوزبەن ايتقاندا, قىزىلوردالىقتار ەلباسىنىڭ وكىلەتتىگىن 2020 جىلعا دەيىن ۇزارتۋعا ءۇن قوسىپ جاتىر ەدى. ەلباسى مەرزىمىن ۇزارتۋعا قاتىستى اكتسيانى ۇيىمداستىرۋشى – قىزىلوردا وبلىستىق «ازاماتتىق اليانس» قاۋىمداستىعى. اكتسياداعى العاشقى ءسوزدى قاۋىمداستىق ءتورايىمى داريعا اقماعامبەتقىزى قۇتتىقتاۋ ءسوز سويلەپ اشتى. ول ەلباسىنىڭ ەرەن ەڭبەگىنە, مەملەكەتتى نىعايتۋ ىسىنە قوسقان ولشەۋسىز قاجىر-قايراتىنا, جۇرتتى جۇمىلدىرىپ, حالىقتى قايىرىمدىلىققا باستاپ وتىرعان كورەگەن ساياساتىنا ەرەكشە توقتالدى. ءتورايىمنان كەيىنگى ءسوز تىزگىنى دەربەس زەينەتكەر, قىزىلوردا وبلىسىنىڭ قۇرمەتتى ازاماتى ابدوللا داۋلەت ۇلىنا ءتيدى. – بۇگىندە قازاقتى الەم تانىدى. ازۋلى, ساياساتتاعى سان قيلى الپاۋىتتار قازاقستان دەپ اتالاتىن مەملەكەتتى ءبىلدى, ونىڭ كوشباسشىسى نۇرسۇلتان نازارباەۆتى الەمدىك دەڭگەيدەگى ساليقالى ساياساتكەر رەتىندە مويىندادى. مۇنىڭ ءبارى ءبىر كۇندە قونا سالعان باق ەمەس. ەلباسىنىڭ سىندارلى ساياساتىنىڭ ارقاسىندا جەتكەن, ەلدىڭ اۋىزبىرلىگىنىڭ ناتيجەسىندە كەلگەن داڭق ەدى. سوندىقتان مەن ەلباسىنىڭ مەرزىمىن 2020 جىلعا دەيىن ۇزارتۋدى قولداۋعا شاقىرامىن, – دەدى. سىر سۇلەيلەرىنىڭ سوقپاعىن جالعاستىرىپ كەلە جاتقان مۇحتار نيازوۆ مىنبەردەن كورىندى. «1986 جىلى الماتىدا جاستار الاڭعا اعىلدى. نە ءۇشىن؟ «ءار ەلدى ءوز ۇلى باسقارۋى كەرەك» دەگەن ۇرانمەن شىقتى ولار. بيلىگىڭنەن ايىرىلىپ, باسقانىڭ تىزگىن ۇستاعانىنا شىداي المادى. سوندىقتان ءدال بۇگىنگىدەي بولىپ الاڭعا بارىپ, ۇران تاستادى. ال ءبۇگىنگى ءبىزدىڭ الاڭعا شىعۋىمىز ءبولەك دۇنيە. ويتكەنى, ەلىمىزدى باسقارىپ وتىرعان ەر بار. ەلباسىن قولدايتىن ەلى بار. كورەگەن كوشباسشى قازاق كوشىن بۇدان ءارى دە باستاي بەرۋى كەرەك. سول سەبەپتى ەلباسىنىڭ وكىلەتتىگىن 2020 جىلعا دەيىن ۇزارتۋدى ءبىراۋىزدان قولدايىق». اقىننىڭ ارىندى ءسوزىنەن كەيىن الاڭ ۇرانعا باستى. «قازاقستان! نۇرسۇلتان! نۇر وتان!» دەگەن ۇراندى تىركەستەر اسپاندا قالىقتاپ تۇرىپ الدى. «نۇر وتان» پارتياسىنىڭ قىزىلوردا وبلىستىق فيليالى ءتوراعاسىنىڭ ءبىرىنشى ورىنباسارى ولمەسحان بولاتبەكوۆتىڭ ءسوزى دە كوپتىڭ كوكەيىنە قوندى. – قاڭتاردىڭ قاقاعان قاسيەتتى قىسى, اقمەشىتتىڭ اڭقىلداعان اينالايىن جەلى سىزدەردى, انالارىمىز, اتالارىمىز, ارداگەرلەرىمىز, سان ءتۇرلى ءوندىرىس ورىندارىنىڭ جۇمىسشى قىزمەتكەرلەرىن جانە مىڭداعان جاستاردى ەشبىر توڭدىرا المايدى. سەبەبى ەلىم, جەرىم, حالقىم دەپ تۇرعان ەلباسىمىز نۇرسۇلتان نازارباەۆتىڭ ىستىق ىقىلاسقا تولى, تۇلا بويىڭدى جىلىتار قامقور كوڭىلىن سەزىنىپ, بۇگىنگە دە, ەرتەڭگە دە سەنىمدى سەزىمدە تۇراسىزدار. مەن ءسوزىمدى ساۋالمەن باستاعاندى ءجون كوردىم. سىر بويىندا الىپ وندىرىستەر بولىپ پا ەدى؟ سىر بويىندا الەم باعالاعان وليمپيادا ساڭلاقتارى قانشالىقتى ەدى؟ سىر بويىندا مىڭداعان بالا وقيتىن مەكتەپتەر بولدى ما؟ جەتپىس جىل بويى جول جوندەۋ كورمەي, اۋىل اراسى الىستاپ كەتكەن ەمەس پە ەدى؟ ءبىز كەشەگە دەيىن قۇدىقتان ساپالى اۋىز سۋ ءىشىپ پە ەدىك؟ تاماقتى تالعاپ ىشەتىن, كيىمدى تاڭداپ كيەتىن حالىقتىڭ جاعدايى وسىنداي دارەجەدە مە ەدى؟ – دەدى ولمەسحان ماتەن ۇلى. – ال وسىنىڭ ءبارى كورەگەن كوشباسشى, سارابدال ساياساتكەر نۇرسۇلتان نازارباەۆتىڭ جەمىستى ەڭبەگىنىڭ ارقاسى, – دەگەندە الاڭ جاپپاي قولدادى. – تاريح بەتىندە تەڭىزدى ەكىگە بولگەن جاعداي جوق, قۋاتتى قازاقستان ارال تەڭىزىنە وسىنى جاسادى. قازاقستان دەگەندە ەلباسى نۇرسۇلتان نازارباەۆتىڭ جارقىن بەينەسى, پاراساتتى ءىسى كورىنەدى. ارال قالاسىندا تۇراتىن 105 جاستاعى كوكىرەگى كۇمبەز اجە ءالپەش سادىقوۆا ايتادى: اينالايىن ولمەسحان, جاسىم بولسا 106-عا قارادى. نۇرسۇلتان بالام مەنەن 40 جاستاي كىشى, ءالى قانشا بولاشاعى بار, سونى ۇلكەن بولسام دا كورگىم كەلەدى. ەندەشە, سول كۇنگە جەتۋگە قازاقستان, نۇرسۇلتان, «نۇر وتان» ەسىمدەرىمەن ەرتەڭگى كۇنگە بىرگە بارۋ باقىتىن بۇيىرتسىن, – دەپ اياقتادى ءسوزىن. پرەزيدەنت مەرزىمىن ۇزارتۋعا قاتىستى اكتسياعا قىزىلورداداعى بارلىق ازاماتتىق قوعام وكىلدەرى قاتىسىپ, باستامانى ءبىراۋىزدان قولدايتىندارىن ءبىلدىرىپ جاتتى. ولاردىڭ قاتارىندا «رۋحانيات» پارتياسىنىڭ وبلىستىق فيليالىنىڭ جەتەكشىسى اتاباي بازارباي, «قازاقستاننىڭ ورىس ۇلتى» قاۋىمداستىعىنىڭ وبلىستىق ءبولىمشەسىنىڭ باسشىسى ۆلاديمير تولوكوننيكوۆ, «قىزىلوردا جاستارى» قاۋىمداستىعىنىڭ توراعاسى باۋىرجان ماستەكوۆ, سامبو كۇرەسىنەن حالىقارالىق دارەجەدەگى سپورت شەبەرى, ەكى دۇركىن ازيا ويىندارىنىڭ چەمپيونى ديانا ءسادۋاقاسوۆا, قازاقستان كاسىپكەرلەرى مەن جۇمىس بەرۋشىلەرىنىڭ جالپىۇلتتىق «اتامەكەن» وداعىنىڭ قىزىلوردا فيليالىنىڭ جەتەكشىسى الماسبەك تۇرتاەۆ, «يگىلىك» كورپوراتيۆتى قورىنىڭ پرەزيدەنتى اقتولقىن شەرەحاندار بار. جيىن بارىسىندا اكتسياعا قاتىسۋشىلار وبلىس جۇرتشىلىعىنا ۇندەۋ قابىلدادى. ۇندەۋدە «الاشتىڭ اناسى» اتانعان سىر ەلىنىڭ جۇرتشىلىعى قازاقستان رەسپۋبليكاسىنىڭ تۇڭعىش پرەزيدەنتى, ۇلت كوشباسشىسى, نۇرسۇلتان نازارباەۆتىڭ پرەزيدەنتتىك وكىلەتتىگىن 2020 جىلدىڭ 6 جەلتوقسانىنا دەيىن ۇزارتۋ تۋرالى جالپىحالىقتىق رەفەرەندۋم ءوتكىزۋ باستاماسىنا قولداۋ بىلدىرە وتىرىپ, ەلباسىمىزدىڭ مەملەكەتتىك ىشكى جانە سىرتقى ساياساتتاعى, ەكونوميكالىق دامۋىمىزدى, حالىقتىڭ الەۋمەتتىك يگىلىگىن ارتتىرۋداعى ءوزى باستاعان يگى ىستەرىن ءوزى اياعىنا دەيىن جەتكىزۋىن قالايدى جانە ەلباسىنا زور سەنىم بىلدىرەدى» دەلىنگەن. ەرجان بايتىلەس, قىزىلوردا.كەلەشەك ءۇشىن كەرەك
زاڭ عىلىمدارىنىڭ دوكتورى, كاسىپكەر قايرات بالابيەۆ وسىدان اتتاي جەتى جىل بۇرىن ەلباسىنىڭ حالىققا جولداۋىندا كاسىپكەرلەردى الەۋمەتتىك نىساندار سالۋعا شاقىرعان باستاماسىن قىزۋ قولداعانداردىڭ ءبىرى. حالىققا قاجەتتى ساۋدا ورىندارىن سالىپ, تاسى ورگە دومالاپ تۇرعان جىگىت اعاسى جۇبايى قارلىعاش بەكبوسىنوۆامەن كەڭەسىپ, “اتف” جانە “تسەنتركرەديت” بانكتەرىنەن 10 ملن. دوللار نەسيە الادى دا بالا باقشالار مەن مەكتەپ سالۋ ىسىنە كىرىسىپ كەتەدى. باستاپقىدا بانكتەردىڭ ۇستەمەسى 18 پايىز بولعان. ەل ءمۇددەسى ءۇشىن تاۋەكەلدىڭ قايىعىنا مىنگەن قايراتتاي جىگىتتەردى دولى داۋىلدىڭ وتىنە تاستاماپتى ەلباسى. نۇرسۇلتان نازارباەۆتىڭ ارالاسۋىمەن الەۋمەتتىك نىساندار سالىپ جاتقان كاسىپكەرلەردىڭ بانككە بەرەشەگى 11 پايىزعا دەيىن ازايعان. سونىڭ ناتيجەسىندە, حالىقارالىق ستاندارتتارعا ساي “ايگەرىم”, “بالا بي” بالا باقشالارى مەن ەركىن ويلى, تالانتتى مۇعالىمدەردىڭ ءوزىندىك باعدارلامالارىن جۇزەگە اسىرۋعا جاعداي جاسايتىن قازاقشا, ورىسشا جانە اعىلشىنشا وقىتاتىن “بايتەرەك” مەكتەبى اشىلعان. دۇنيە ءجۇزىن داعدارىس سالقىنى سەرگەلدەڭگە سالعاندا ءبىزدىڭ قازاقستان ەل ەكونوميكاسىنا وراسان قارجى سالىپ جاتتى, دەيدى قايرات راحىم ۇلى. رەفەرەندۋم تۋرالى يگىلىكتى باستاما كوتەرىلگەن سوڭ شىمكەنت قالاسىنداعى ءوزىم جانە زايىبىم قارلىعاش ەكەۋمىز قۇرىلتايشى رەتىندە باسشىلىق جاسايتىن سەگىز سەرىكتەستىكتىڭ باسشىلارى مەن مۇشەلەرىنىڭ بىزگە بىلدىرگەن ءوتىنىشتەرىنە ساي «نۇر وتان» حدپ ءتوراعاسىنىڭ ءبىرىنشى ورىنباسارى نۇرلان نىعماتۋلين مەن وسى پارتيانىڭ وڭتۇستىك قازاقستان وبلىستىق فيليالى ءتوراعاسىنىڭ ءبىرىنشى ورىنباسارى ۇلاسبەك سادىبەكوۆكە ارنايى حات جولدادىق. ەلباسىنىڭ وكىلەتتىك مەرزىمىن ۇزارتۋدى تولىق قولدايتىنىمىزدى جانە بارشامىز ءبىراۋىزدان داۋىس بەرەتىندىگىمىزدى شىنايى نيەتپەن ءمالىم ەتتىك. سەگىز سەرىكتەستىكتە ءۇش مىڭعا جۋىق ادام قىزمەت ەتەدى. وسىنىڭ بارلىعى ەلباسىنىڭ وكىلەتتىگىن ۇزارتۋدى تولىعىمەن قولداپ وتىر. تاۋەلسىزدىك العان جىلدارى كەشە عانا كەڭەستىك جۇيەدە بولعان مەملەكەتتەر سەكىلدى قازاقستاننىڭ دا جاعدايى مۇشكىلدەۋ بولعانى بەلگىلى. نۇرسۇلتان ءابىش ۇلىنىڭ سارابدال ساياساتىنىڭ ارقاسىندا 19 جىل ىشىندە الەم تانيتىنداي, مويىندايتىنداي دارەجەگە جەتتىك. قاراپايىم ىسكە بەيىمى بار سان مىڭداعان كاسىپكەرلەر وزدەرى يگەرگەن كاسىپتى جەتىلدىرۋدەن ءناسىبىن تاۋىپ, بيزنەس سالاسىنداعى جولدارىن تابىستى جالعاستىرۋدا. وسىنىڭ بارلىعى كىمنىڭ ارقاسىندا ورىندالىپ, جۇزەگە اسىرىلۋدا دەگەندە, ونىڭ ەڭ ۇشار باسىندا ءبىزدىڭ بۇگىنگى پرەزيدەنتىمىز, ۇلت كوشباسشىسى نۇرسۇلتان نازارباەۆ سىندى بيىك تۇلعانىڭ تۇرعاندىعىن قانداي ماقتانىشپەن ايتساق تا ارتىقتىق ەتپەيدى. ۇلت كوشباسشىسى جايىندا ۇلاعاتپەن ويلانعاندا ول كىسىنىڭ ەل ءۇشىن اتقارعان ءىسىنىڭ, جەكە ۇلەسىنىڭ ءبىزدىڭ ولشەمىمىزدەن الدەقايدا بيىك ەكەنىنە الەمدىك دەڭگەيدەگى سارابدال ساياساتشىلار مەن ساراپشىلار وزدەرىنىڭ وڭ باعاسىن الدەقاشان بەرىپ قويعان. دامىعان ەلدەردىڭ ءوزى داعدارىستىڭ تۇساۋىندا بۇلقىنىپ جاتقاندا, سول قيىندىقتان حالقىن الىپ شىققان ءارى ونىڭ ىلگەرى وركەندەۋ دەڭگەيىن تومەندەتپەگەن ساناۋلى مەملەكەت باسشىلارىنىڭ باسىندا تاعى دا نۇرسۇلتان نازارباەۆ بولدى. سوندىقتان دا قازاقستان حالقى تاعدىرىن ەلباسىمەن تىكەلەي بايلانىستىرادى. باسقوسۋدا سەگىز سەرىكتەستىكتىڭ باسشىلارى وسىنداي وي قوزعادى. يننوۆاتسيالىق ورتالىقتىڭ ديرەكتورى ناتاليا تەن كەيبىر اقپارات قۇرالدارىنىڭ ارانداتۋشىلىعىمەن كەلىسپەيتىندىگىن ايتتى. “كەيبىر مەملەكەتتەر دەموكراتيا دەگەندى العا تارتىپ, وزدەرىندەگى جۇيەنى بىزگە كۇشتەپ تاڭعىسى كەلەدى. ەلدى ولاي دۇرلىكتىرۋ جاقسىلىق ەمەس. حالىق قالاۋى – نۇرسۇلتان نازارباەۆ. نۇرسۇلتان ءابىش ۇلى قازاقستان حالقىنا بار كەرەكتى بەرىپ كەلەدى. ەڭ باستىسى, ءار ءتۇرلى ەتنوستار اراسىندا جاراسىمدى ىنتىماق بار. سوندىقتان, ءبىز ەلباسىمىزبەن بىرگەمىز. “بايتەرەك” مەكتەبىنىڭ ديرەكتورى مارينا پونتي قازاقستاندىق ءبىلىم جۇيەسىنىڭ دەڭگەيى جىل سايىن ءوسۋ ۇستىندە ەكەندىگىن ايتتى. ال, ءبىلىمدى ۇرپاق – مەملەكەتتىڭ كەمەل كەلەشەگى. اتا زاڭىمىزعا ەلباسى اتاۋىنىڭ ءمارتەبەسى مەن رەفەرەندۋم وتكىزۋ ءجونىندەگى وزگەرىستەر مەن تولىقتىرۋلاردى ەنگىزۋ جونىندەگى پارلامەنت مۇشەلەرى جاساعان ۇسىنىستار مەملەكەت كەمەلدىگى ءۇشىن ءبىرىنشى كەزەكتەگى قاجەتتىلىك ەكەندىگىن ەستەن شىعارماعانىمىز ابزال. مىنە, رەفەرەندۋم بىزگە وسى ءۇشىن قاجەت. وسىنداي ويلاردى سەرىكتەستىك باسشىلارى امانتاي مامەدوۆ, ەلەنا كاسيانوۆا, ءجانابىل ساباەۆ, قارلىعاش نادىرقۇلوۆالار دا ايتتى. باقتيار تايجان, شىمكەنت.رەفەرەندۋمعا جۇرتشىلىق كوزقاراسى قانداي؟
2011 جىلدىڭ قاڭتار ايى بويىنا بىرقاتار قازاقستاندىق ۇيىمدار قازاقستان رەسپۋبليكاسى پرەزيدەنتىنىڭ وكىلەتتىگىن 2020 جىلعا دەيىن ۇزارتۋ جونىنەن رەفەرەندۋم وتكىزۋ باستاماسىنا ازاماتتاردىڭ كوزقاراستارىن ءبىلۋ بويىنشا الەۋمەتتىك سۇراۋ سالۋلار جۇرگىزدى. رەفەرەندۋم وتكىزۋ تۋرالى وڭ شەشىم قابىلدانا قالعان جاعدايدا رەسپوندەنتتەردىڭ 85 پايىزى داۋىس بەرۋگە قاتىسۋعا دايىن. تۇڭعىش پرەزيدەنت – ۇلت كوشباسشىسى ن.ءا.نازارباەۆتىڭ وكىلەتتىك مەرزىمىن 2020 جىلعا دەيىن ۇزارتۋ ءجونىنەن رەفەرەندۋم وتكىزۋ تۋرالى باستامانى سۇراۋ سالىنعانداردىڭ 93 پايىزى قولدايدى. قۇلشىنىس ۇلكەن «نۇر وتان» حدپ-نىڭ باستاماسىمەن دەموكراتيالىق كۇشتەردىڭ جالپىۇلتتىق «قازاقستان-2030» كواليتسياسىنىڭ قۇرىلۋىنا وراي سەمەيدە قالا اكتيۆىنىڭ جيىنى بولىپ ءوتتى. جيىنعا ساياسي پارتيالار, ۇكىمەتتىك ەمەس جانە قوعامدىق ۇيىمدار وكىلدەرى, جاستار كوپتەپ قاتىستى. جيىن جۇمىسىن اشقان رەفەرەندۋم وتكىزۋ جونىندەگى باستاماشى توپ توراعاسى, شاكارىم اتىنداعى سەمەي مەملەكەتتىك ۋنيۆەرسيتەتىنىڭ رەكتورى ەرلان سىدىقوۆ بۇگىنگى كۇن ءتارتىبىندەگى ماسەلەگە قىسقاشا توقتالا كەلىپ, رەفەرەندۋم وتكىزۋ مەن كواليتسيا قۇرۋ ساياسات جالاۋى ەمەس, ۋاقىت, ەل قالاۋى ەكەندىگىن ايتتى. ول سولاي دەي كەلىپ, رەفەرەندۋم وتكىزۋ ءجونىندە باستاما كوتەرىلىپ جاتقان ەلىمىزدىڭ شىعىس ايماعى, سەمەي ءوڭىرىندە ساياسي پارتيالار, ۇكىمەتتىك ەمەس جانە قوعامدىق ۇيىمدار تاراپىنان كواليتسياعا كىرۋگە زور قۇلشىنىس بولاتىندىعىنا سەنىم ءبىلدىردى. ايتقانداي-اق, جيىندا ءسوز ءسويلەگەندەردىڭ ءبارى ءبىر توقتامعا كەلىپ جاتتى. ماسەلەن, «نۇر وتان» حدپ-نىڭ قالالىق فيليالى ءتوراعاسىنىڭ ورىنباسارى زۋلفيا جامالتدينوۆا وسىندا باستالعان باستاما جەرىنە جەتكىزىلۋى ءتيىس دەسە, «اق جول» دەموكراتيالىق پارتياسى قالالىق فيليالىنىڭ توراعاسى ورىنبەك سارسەنبين جينالعانداردى ەلىمىزدى ءبىر بەلەستەن ەكىنشى بەلەسكە باستاپ الىپ كەلە جاتقان ەلباسىمىزدى قولداۋعا شاقىرا وتىرىپ, اقجولدىقتاردىڭ كواليتسيا قاتارىنان تابىلاتىندىقتارىنا سەندىردى. ال ۇلى وتان سوعىسىنىڭ ارداگەرى, تاتار ۇلتتىق-ءمادەني ورتالىعى توراعاسىنىڭ ورىنباسارى عازيز احمەروۆ بولسا, وسى ماسەلە بويىنشا استانادا ارداگەرلەر پلەنۋمى كواليتسياعا كىرەتىندىكتەرىن مالىمدەگەنىن ايتا كەلىپ, بۇل يگى باستامادان سەمەيلىك ارداگەرلەردىڭ دە سىرت قالمايتىندىقتارىن ءبىلدىردى. سەرۆيس كوللەدجىندەگى جاستار كوميتەتىنىڭ ءتوراعاسى ولجاس سوعىمباەۆ جاستار تىلەگىن جالىندى جىر جولدارىمەن جەتكىزدى. داۋلەت سەيسەن ۇلى, سەمەي.
