باتىس قازاقستاندا بيۋدجەت قارجىسىن جىمقىرعان بالاباقشا ديرەكتورى سوتتالدى

ورال. 18 مامىر. باتىس قازاقستاندا بيۋدجەت قارجىسىن جىمقىرعان بالاباقشا ديرەكتورى سوتتالدى. بۇل تۋرالى batysnewskz.kz پورتالىنا سىلتەمە جاساعان egemen.kz ءتىلشىسى حابارلادى. ورال قالالىق سوتىنىڭ ۇكىمىمەن №20 «بالبوبەك» مەكتەپكە دەيىنگى ۇيىمىنىڭ ديرەكتورى ا.تولەگەنوۆاعا قوماقتى كولەمدە ايىپپۇل سالىندى. ول قىلمىستىق كودەكستىڭ 189-بابى 3-ءبولىمى 2-تارماعىنا سايكەس ايىپتى دەپ تانىلىپ, 55-باپتىڭ 4-ءبولىمى قولدانىلا وتىرىپ, مۇلكىن تاركىلەۋمەن بىرگە 5000 ايلىق ەسەپتىك كورسەتكىش كولەمىندە ايىپپۇل سالىندى. باتىس قازاقستان وبلىستىق پروكۋراتۋراسىنىڭ ءباسپاسوز قىزمەتىنەن تۇسكەن مالىمەتكە قاراعاندا, ول سونداي-اق, ءومىر بويىنا مەملەكەتتىك ورگانداردا لاۋازىمدى قىزمەت اتقارۋ قۇقىعىنان ايىرىلدى. ورال قالالىق پروكۋراتۋراسى اتالعان بالاباقشانى تەكسەرۋ بارىسىندا بيۋدجەت قاراجاتىن جىمقىرۋ دەرەگىن انىقتاعان بولاتىن. اتاپ ايتقاندا, ا.تولەگەنوۆا پسيحولوگتى فورمالدى تۇردە جۇمىسقا قابىلداعان. وعان مۇندا مۇلدەم ەڭبەك ەتپەسە دە, 2014 جىلدىڭ ماۋسىمىنان 2015 جىلعى قازان ايىنا دەيىن 716 690 تەڭگە نەگىزسىز تولەنگەن. بۇل قاراجاتتى ديرەكتور ءوز قاجەتىنە جۇمساعان. ۇكىم زاڭدى كۇشىنە ەنگەن جوق. تەمىر قۇسايىن. دەرەك, فوتو: batysnewskz.kz.