پارتيا ساپىندا مەملەكەتتىك قىزمەتكەر نەگە از؟
«نۇر وتان» حدپ اقتوبە وبلىستىق فيليالىنىڭ ءحىى ەسەپ بەرۋ-سايلاۋ كونفەرەنتسياسى ءوتتى. وندا فيليال ساياسي كەڭەسىنىڭ ەسەپتىك كەزەڭدەگى جۇمىسى قورىتىندىلانىپ, «نۇر وتان» حدپ 2020 جىلعا دەيىنگى باعدارلاماسى تالقىلاندى. جيىندا پارتيا فيليالىنىڭ توراعاسى, ساياسي كەڭەستىڭ جانە باقىلاۋ-تەكسەرۋ كوميسسياسىنىڭ جاڭا قۇرامى مەن «نۇر وتاننىڭ» ءحىىى سەزىنە وبلىستىق پارتيا ۇيىمىنان دەلەگاتتار سايلاندى. كونفەرەنتسياعا «نۇر وتان» حدپ جانىنداعى جەمقورلىققا قارسى كۇرەس ۇيىمداستىرۋ كەڭەسىنىڭ توراعاسى, سەنات دەپۋتاتى ورالباي ابدىكارىموۆ, «نۇر وتان» حدپ ساياسي كەڭەسى بيۋروسىنىڭ مۇشەسى, ءماجىلىس دەپۋتاتى نۇرتاي ءسابيليانوۆ, وبلىس اكىمى ەلەۋسىن ساعىندىقوۆ, پارتيا فيليالىنىڭ ءمۇشەلەرى قاتىستى. «نۇر وتاننىڭ» وبلىستىق فيليالىنىڭ توراعاسى بالعالي ورداباەۆ وتكەن جىلدىڭ قورىتىندىلارى تۋرالى باياندادى. – «نۇر وتان» – حالىق سەنىمىنە يە بولعان ەلىمىزدەگى ەڭ ۇلكەن ساياسي كۇش. قازىر قۇرامىمىزدا 32 674 ادام بار, ەسەپتىك مەرزىمدە پارتيا مۇشەلىگىنە 7797 ادام قابىلداندى. الايدا, ءبىزدىڭ ماقساتىمىز – پارتيا قۇرامىنىڭ سانىن عانا ارتتىرۋ ەمەس, ساپاسىن دا جاقسارتۋ. جەتىستىكتەرىمىز بارشىلىق, كەمشىلىكتەرىمىز دە جوق ەمەس, سول كەمشىلىكتەردىڭ سەبەبىن انىقتاپ, پارتيا جۇمىسىن وڭالتۋعا بار كۇشىمىزدى سالۋعا ءتيىسپىز. پارتيا قۇرامىن ارتتىرۋ باعىتىندا مەملەكەتتىك مەكەمەلەردىڭ بولىمدەرى مەن باسقارمالارىنداعى پارتيالىق ۇيىمدار ناشار جۇمىس جاسادى دەۋگە بولادى, ولار ءوز جۇمىستارىنا ەندى-ەندى عانا بەلسەندى كىرىسە باستاعانداي. مەملەكەتتىك قىزمەتكەرلەر قاتارىندا دا نۇروتاندىقتار تىم از, مىسالى, قازىر 16 324 مەملەكەتتىك قىزمەتكەر جۇمىس جاساپ جاتقان بولسا, سونىڭ بار بولعانى 2697-ءسى عانا ءبىزدىڭ پارتيامىزدىڭ مۇشەسى. قاتارىمىزدا شاعىن جانە ورتا كاسىپكەرلەر دە از. مىنە, باستاۋىش ۇيىمدار مەن فيليالدارىمىزدىڭ ەڭ ءبىرىنشى قولعا الاتىن جۇمىستارى وسىلار, – دەدى ب.ورداباەۆ. ول, سونىمەن قاتار, پارتيانىڭ باستاۋىش ۇيىمدارى ازف, تەمىر جول باسقارماسى, ءدوڭ كەن بايىتۋ كومبيناتى, ازحس, وبلىستىق اۋرۋحانا, قالا ەمحانالارى جانە جوعارى وقۋ ورىندارىمەن بۇرىنعىدان دا گورى تىعىز جۇمىس جاساۋى قاجەتتىگىن تىلگە تيەك ەتتى. پارتيالىق-ساياسي وقۋ, ساياسي كەڭەس وتىرىستارى, اشىق قوعامدىق قابىلداۋلار مەن پارتيا فيليالىنىڭ اقپاراتتىق-ناسيحاتتىق جۇمىستارى تۋرالى اڭگىمەلەدى. شەشەن «جاس وتان» جاستار قاناتىنىڭ جۇمىسى تۋرالى دا ءسوز قوزعادى. ال ەسەپ بەرۋ-سايلاۋ كونفەرەنتسياسىندا ءسوز العان جەرگىلىكتى «جاس وتاننىڭ» اتقارۋشى حاتشىسى اسەل بولەكوۆا اقتوبەلىك جاسوتاندىقتاردىڭ ەكى جىل قاتارىنان «ۇزدىك فيليال» اتانعانىن ماقتانىشپەن جەتكىزدى بىراق, دەدى ول, كەمشىلىكتەر دە بار. سۇراق تۋىندايدى: جۇمىس جوسپارى, جۇيەلىك كەستەسى جانە پارتيا فيليالىنا ۇقساس كۇندەلىكتى ۇيىمداستىرۋشىلىق جۇمىسى بار ساياسي جاستار ۇيىمىندا شتاتتىق بىرلىك بولماسا, ءتيىمدى جۇمىس قايدان كەلەدى؟ وبلىستىق فيليال جانىنان ءبولىم نەمەسە اۋدانداردان شتاتتىق بىرلىك قۇرۋدى ءجون سانايمىز. سوندا عانا «جاس وتان» تولىق كۇشىندە جۇمىس جاساي الادى. تاعى ءبىر ماسەلە – كادرلار تۇراقتامايتىنى, بىزدە دارىندى جاستار كوپ, بىراق ءتۇرلى سەبەپتەرمەن ءبىز ولاردى ۇزاق ۋاقىت ۇستاي المايمىز, ەكىنشىدەن, جاس كوشباسشىنىڭ جۇمىسىنا ارنالعان ادىستەمەلىك نۇسقاۋلىق جوق, ال بۇل ماسەلەلەر تيپتىك ءىس-شارالاردىڭ وتكىزىلۋىنە اكەلىپ سوقتىرادى. كونفەرەنتسيا بارىسىندا پارتيا فيليالىنىڭ باقىلاۋ-تەكسەرۋ كوميسسياسىنىڭ ءتورايىمى ۇ.مامەنوۆا, فيليال جانىنداعى پارتيالىق باقىلاۋ كوميتەتىنىڭ ءتوراعاسى ع.نۇرىشەۆ, اقتوبە وبلىسى اكىمىنىڭ ورىنباسارى ر.كەمالوۆا, اقتوبە كولىك, كوممۋنيكاتسيا جانە جاڭا تەحنولوگيالار كوللەدجى جاستار ءىسى جونىندەگى كوميتەتىنىڭ توراعاسى ب.قاۋمەشوۆ ءسوز سويلەدى. كونفەرەنتسيانى وبلىس اكىمى ەلەۋسىن ساعىندىقوۆ قورىتىندىلادى: – «نۇر وتان» پارتياسى – ەلباسى نۇرسۇلتان نازارباەۆتىڭ سارابدال ساياساتى مەن يدەياسى ماڭىنا حالىقتى توپتاستىرا بىلگەن ۇيىمداستىرۋشى ورگان, الىپ ساياسي كۇش. ەلباسىن, ونىڭ باستامالارىن قولدايمىز. قازىرگى ءبىزدىڭ جەتكەن جەتىستىكتەرىمىزدىڭ بارلىعىندا پارتيالىق ۇيىمنىڭ زور ۇلەسى بار دەپ تولىق سەنىممەن ايتا الامىن. بۇل كونفەرەنتسيا وتە مازمۇندى بولدى, – دەي كەلە, ە.ساعىندىقوۆ وبلىس ەكونوميكاسىنداعى جەتكەن جەتىستىكتەر تۋرالى ءبىراز اڭگىمەلەدى. كونفەرەنتسيا سوڭىندا پارتيا فيليالىنىڭ توراعاسى, ساياسي كەڭەستىڭ جانە باقىلاۋ-تەكسەرۋ كوميسسياسىنىڭ جاڭا قۇرامى مەن «نۇر وتاننىڭ» ءحىىى سەزىنە وبلىستىق پارتيا ۇيىمىنان دەلەگاتتار سايلاندى. پارتيا فيليالىنىڭ توراعاسى بولىپ بالعالي ورداباەۆ قايتا سايلاندى. «سەنىمدەرىڭىزدى اقتاۋعا تىرىسامىن», –دەدى ول. ساتىبالدى ءساۋىرباي, مەيرامگۇل ساتاەۆا, جۋرناليست.كەمشىلىكسىز كەمەلدەنۋ جوق
وسكەمەندە «نۇر وتان» حالىقتىق-دەموكراتيالىق پارتياسى شىعىس قازاقستان وبلىستىق فيليالىنىڭ ەسەپ بەرۋ-سايلاۋ كونفەرەنتسياسى ءوتتى. ونىڭ جۇمىسىنا «نۇر وتان» حدپ حاتشىسى ن.س.گروموۆ, پارلامەنت ءماجىلىسىنىڭ دەپۋتاتى ب.تىلەۋحان, شىعىس قازاقستان وبلىسىنىڭ اكىمى جەرگىلىكتى فيليال توراعاسى بەردىبەك ساپارباەۆ قاتىستى. كۇن تارتىبىندەگى ماسەلەلەر بويىنشا بەردىبەك ماشبەك ۇلى بايانداما جاسادى. سوڭعى ەكى جىلدا حالىقپەن بىتە قايناسىپ كەتكەن «نۇر وتان» پارتياسى مۇشەلەرىنىڭ سانى 7 مىڭعا ارتىپ, بۇل كۇندەرى كەندى التايدا ولاردىڭ سانى 66 532 ادامعا جەتتى دەدى بايانداماشى. ءبىر قاراعاندا, جامان كورسەتكىش ەمەس سياقتى. بىراق, وبلىستا 1,5 ميلليونعا جۋىق ادام تۇراتىنىن ەسكەرسەك, ازداۋ كورىنەدى. سوندىقتان باستاۋىش ۇيىمدار بۇل باعىتتا ءوز جۇمىستارىن شيراتا تۇسكەندەرى ءجون. ب.ساپارباەۆتىڭ بايانداماسىندا كەمشىلىكتەر از ايتىلعان جوق. ءوز قاتارلارىن سەنىمدى كادرلارمەن تولىقتىرىپ وتىرۋدا «اتتەگەن-ايلار» بار, جارعى ءتارتىبىن بۇزۋشىلىق اباي, بورودۋليحا ءجانە كوكپەكتى اۋداندارىندا ورىن العان. سونىمەن بىرگە, ريددەر, زىريان قالالارىندا دا اتقاراتىن ءىس باستان اسادى. كەيبىر اۋداندارداعى پارتيا بەلسەندىلەرى بىلىمدەرى مەن بىلىكتەرىن جەتىلدىرۋ ماسەلەسىنە دە سالعىرت قارايدى. دەمەك, پارتيا مۇشەلەرى قاراپايىم ادامدارمەن تىعىز جۇمىس جاساپ, ولاردىڭ الەۋمەتتىك ماسەلەلەرىن شەشۋگە بەلسەنە ارالاسقاندارى ءجون. بۇدان كەيىن بايانداماشى وبلىستىڭ ەكونوميكالىق جاعدايى جايلى حاباردار ەتتى. ەسەپتى كەزەڭ ىشىندە وبلىستا ءبىر تريلليوننان استام تەڭگەنىڭ ونىمدەرى شىعارىلعان. تەك ونەركاسىپ بويىنشا 624 ميلليارد تەڭگەنىڭ, ال اۋىل شارۋاشىلىعى بويىنشا 151 ميلليارد تەڭگەنىڭ ونىمدەرى ءوندىرىلىپتى. وكىنىشكە قاراي, ازىق-ت ۇلىك باعاسىنىڭ ءوسىپ كەتۋىنە كەزىندە توقتاۋ سالا المادىق. قازىر جەر-جەردەگى پارتيا باستاۋىش ۇيىمدارىنىڭ بەلسەندىلەرى باعا ساياساتىن دۇرىستاۋعا بەلسەنە ارالاسقاندارى كەرەك. «جول كارتاسى» بويىنشا وبلىستا سوڭعى ەكى جىلدا قىرۋار ىستەر تىندىرىلدى, دەدى ب.ساپارباەۆ. «ءبىزدىڭ وبلىستىق باستاماشى توپ ەلىمىزدىڭ تۇڭعىش پرەزيدەنتى ن.نازارباەۆتىڭ وكىلەتتىگىن ۇزارتۋ جونىندە رەفەرەندۋم ءوتكىزۋ باستاماسىن كوتەرگەنى بەلگىلى. كەندى التاي جۇرتشىلىعى ەلباسىنىڭ قامقورلىعى مەن كومەگىن ۇنەمى كورىپ كەلەدى. ءوڭىردەگى ءتۇستى مەتاللۋرگيانىڭ الىپتارى «قازمىرىش», «وسكەمەن تيتان-ماگني كومبيناتى» جانە «ءۇلبى مەتاللۋرگيا كومبيناتى» اق-تارى سياقتى الىپتاردىڭ «ەكىنشى تىنىسىن» اشقان نۇرسۇلتان ءابىش ۇلى. ەندەشە, ەلباسىن قولداۋعا شاقىرامىن», – دەدى فيليال توراعاسى. بايانداماشى مەملەكەتتىك جاستار ساياساتىن جۇزەگە اسىرۋ بويىنشا «نۇر وتان» پارتياسى مۇشەلەرىنە ناقتى مىندەتتەر جۇكتەدى. جارىسسوزگە شىققاندار كۇن ءتارتىبىندەگى ماسەلەلەرمەن قاتار, ەل پرەزيدەنتى ن.نازارباەۆتىڭ وكىلەتتىگىن 2020 جىلعا دەيىن ۇزارتۋ بويىنشا رەفەرەندۋمدى قولداۋ جونىندە پىكىرلەرىن ءبىلدىردى. «نۇر وتان» حدپ حاتشىسى ن.گروموۆ جينالعاندار الدىندا ءسوز الىپ, الدا تۇرعان مىندەتتەرگە توقتالدى. كونفەرەنتسيادا پارتيانىڭ وبلىستىق فيليالىنىڭ توراعاسى بولىپ ب.ساپارباەۆ ءبىراۋىزدان قايتا سايلاندى. پارتيا سەزىنە دەلەگاتتار سايلاندى. وڭداسىن ەلۋباي, وسكەمەن.
