اقىن ەڭبەگىنە لايىقتى باعا

ەلباسى نۇرسۇلتان نازارباەۆ اقىن, قوعام قايراتكەرى ولجاس سۇلەيمەنوۆپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى. نۇرسۇلتان نازارباەۆ و.سۇلەيمەنوۆتى 80 جىلدىق مە­رەيتويى­­مەن قۇتتىقتاپ, ونىڭ وتاندىق زيال­ى قاۋىمنىڭ كورنەكتى وكىلى ەكەنىن اتاپ ءوتتى. – ناعىز زيالى ءبىلىمدى عانا بولىپ قويماي, ەڭ باستىسى – قۋانىشتا دا, قيىن ساتتەردە دە ءاردايىم جۇرتپەن بىرگە بولىپ, ار-نامىستىڭ ۇلگىسىن كورسەتەدى, سول ارقىلى حالىق بىرلىگى مەن مەملەكەت قۋاتىن ساقتايدى. ءسىز «نەۆادا-سەمەي» قوزعالىسىن باسقاردىڭىز جانە سەمەي يادرولىق پوليگونىن جابۋ ىسىندە زور كومەك كورسەتتىڭىز. كەيىنگى جىلدارى دا جەڭىل بولعان جوق. قازاقستان شەكارا­سىنىڭ دەماركاتسياسىن جۇرگىزىپ, تاۋەلسىزدىگىن نىعايتۋ كەرەك بولدى. بۇل ىستە دە ءسىزدىڭ ۇلە­سىڭىز بار. بۇگىندە زيالى قاۋىم وكىل­دەرى مەن بۇكىل جاستارىمىز ءۇشىن ۇلگى بولىپ وتىرسىز, – دەدى مەملەكەت باسشىسى. كەزدەسۋ بارىسىندا نۇرسۇلتان نازارباەۆ وتاندىق ادەبيەتتى دامى­تۋعا ايرىقشا ۇلەس قوسقانى ءۇشىن, سونداي-اق, تاتۋلىق پەن ازا­ماتتىق كەلىسىمدى نىعايتۋعا باعىت­تالعان بەل­سەندى قوعامدىق قىز­مەتى ءۇشىن و.سۇلەيمەنوۆكە «قازاق­ستاننىڭ ەڭبەك ەرى» التىن جۇلدىزىن تاپسىردى. مەملەكەت باسشىسى اقىنعا مىقتى دەنساۋلىق, وتباسى باقىتىن جانە شىعارماشىلىق تابىس تىلەدى. و.سۇلەيمەنوۆ جوعارى اتاق بە­رىل­­گە­نى ءۇشىن العىسىن ءبىلدىردى جانە بۇل بۇكىل قازاقستان ادە­بيەتىن قول­داۋ­­­دىڭ كورىنىسى ەكەنىن ايتتى. ول, سون­­­­داي-اق, ءوز شىعار­مالارىنىڭ بار­لى­­عى حالىق پەن ەلدىڭ يگىلىگىن ارت­تى­­رۋ نيەتىمەن جازىل­عانىن اتاپ, مەم­­لە­كەتىمىزگە با­قىتتى بولاشاق تىلەدى. سۋرەتتەردى تۇسىرگەندەر س.بوندارەنكو, ب.وتارباەۆ