شىعىس قازاقستاندا جوندەۋدەن وتكەن جولدار تەكسەرىلەدى

وسكەمەن. 18 مامىر. شىعىس وڭىرىندە بىلتىر جوندەۋدەن وتكەن رەسپۋبليكالىق جانە وبلىستىق دارەجەدەگى جولداردىڭ جاعدايى تەكسەرۋدەن وتپەك. بۇل تۋرالى شىعىس قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. وبلىس اكىمى دانيال احمەتوۆ اپپاراتتىڭ كەڭەيتىلگەن وتىرىسىندا ءتيىستى ۆەدومستۆولارعا وسىنداي تاپسىرما جۇكتەدى. ءوڭىر باسشىسىنىڭ تاپسىرماسى بويىنشا, مەردىگەرلەردىڭ كەپىلدىك مىندەتتەمەلەرى اياسىندا وتكەن جىلى جوندەۋدەن وتكەن جولداردىڭ قىسقى جانە كوكتەمگى ماۋسىنان كەيىنگى جاعدايى سارالاناتىن بولادى. «بىلتىر وسكەمەننەن ريددەرگە دەيىنگى تاس جولدى ورتاشا جوندەۋدەن وتكىزۋ بويىنشا كوپ جۇمىس اتقارىلدى. سوندىقتان بارلىق مەردىگەرلەر جولداردىڭ جاعدايىن تەكسەرۋى قاجەت. سەبەبى, كەي جول ۋچاسكەلەرىندە جەراستى سۋلارى مەن قارعىن سۋلارعا بايلانىستى ناقتى جۇمىس اتقارىلماعان تۇستارى دا بار», – دەدى دانيال احمەتوۆ. وبلىس باسشىلىعى جولداردىڭ ورتاشا جوندەۋدەن وتكىزىلۋىنە باسا نازار اۋدارىپ وتىرعانى بەلگىلى. ال كەيبىر اۋدانداردا اتالعان جۇمىسقا قاتىستى تاپسىرمالار تولىعىمەن ورىندالىپ وتىرعان جوق. ونىڭ ىشىندە, «وسكەمەن-بوبروۆكا», «وسكەمەن-سامار» جولدارىنداعى ۋچاسكەلەر تەگىستەلمەستەن جوندەلگەن بولاتىن. سونداي-اق, دانيال احمەتوۆ قالالار مەن اۋدانداردى كورىكتەندىرۋ جۇمىستارىن جانداندىرۋدى جانە رەسپۋبليكالىق جولدارداعى شۇڭقىرلاردى 1 ماۋسىمعا دەيىن, ال وبلىستىق دارەجەدەگى جولداردى 1 شىلدەگە دەيىن جوندەۋدى تاپسىردى. دۋمان اناش. دەرەك: شىعىس قازاقستان وبلىسى اكىمىنىڭ ءباسپاسوز قىزمەتى. فوتو: egemen.kz.