«حابار» اگەنتتىگىنىڭ جاڭا باسشىسى تاعايىندالدى

استانا. 18 مامىر. «حابار» اگەنتتىگى اكتسيونەرلىك قوعامىنىڭ باسقارما ءتورايىمى لاۋازىمىنا الماگۇل احمەتجانوۆا تاعايىندالدى. بۇل تۋرالى khabar.kz-كە سىلتەمە جاساعان egemen.kz ءتىلشىسى حابارلادى. بۇگىن اقپارات جانە كوممۋنيكاتسيالار ءمينيسترى داۋرەن اباەۆ «حابار» اگەنتتىگىنىڭ ۇجىمىنا جاڭا باسشىنى  تانىستىردى. الماگۇل احمەتجانوۆا 2016 جىلعى 16 مامىردا مەملەكەت باسشىسىنىڭ وكىمىمەن قازاقستان پرەزيدەنتىنىڭ ءباسپاسوز حاتشىسى بولىپ تاعايىندالعان ايدوس ۇكىبايدىڭ لاۋازىمىنا ورنالاسادى. الماگۇل اۋعاليقىزى احمەتجانوۆا 1975 جىلعى 4 جەلتوقساندا الماتى قالاسىندا تۋعان. ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن 1998 جىلى «الەۋمەتتانۋ» ماماندىعى بويىنشا تامامداعان. ماگيستر دارەجەسى بار. الماگۇل احمەتجانوۆا اگەنتتىكتەگى ءوز ەڭبەك جولىن 1999 جىلى رەداكتور جانە پروديۋسەر لاۋازىمىندا  باستادى.  2002-2004 جىلدارى باعدارلامالار ديرەكتسياسىنىڭ جەتەكشىسى, 2005-2011 جىلدارى باعدارلامالار ديرەكتسياسىنىڭ ديرەكتورى, 2012 جىلدان باستاپ بۇگىنگە دەيىن باسقارما توراعاسىنىڭ ءبىرىنشى ورىنباسارى لاۋازىمىندا قىزمەت ەتتى. «حابار» اگەنتتىگى اكتسيونەرلىك قوعامى مەديا حولدينگى 1995 جىلى قۇرىلدى. قازاقستاندا جانە شەت ەلدە قازاق, ورىس جانە اعىلشىن تىلدەرىندە حابار تاراتاتىن «حابار» ارناسى, جەرسەرىكتىك ارنا Kazakh TV, تاۋلىك بويى اقپارات تاراتاتىن 24 KZ جانە مادەني-اعارتۋشىلىق «ءبىلىم جانە مادەنيەت» اتتى ءتورت ارنادان تۇرادى. ايان ءابدۋالي. دەرەك: khabar.kz. فوتو: 24.kz.