ءبىزدىڭ وبلىسقا بولات باقاۋوۆتىڭ اكىم بولىپ تاعايىندالعانىنا كوپ ۋاقىت وتكەن جوق. ءسويتىپ, ادەتتەگىدەي جيىندار, اكىمدىك وتىرىستارى, بريفينگتەر, كەزدەسۋلەر باستالدى. ولار دا كەرەك شىعار. بىراق, سول باسقوسۋلاردا بولات باقاۋوۆ الدىنداعى قاعازدان باس كوتەرمەيدى. جينالعان جۇرت, تەلەديداردان قاراعان كوپشىلىك وبلىس اكىمىنىڭ كوزدەرىن كورمەيدى. جيىن باستالعاننان-اق, ورىس ءتىلىندە جازىلعان ءماتىندى وقي بەرەدى, وقي بەرەدى. جۇرتقا قارامايدى. مەرەكە, سالتاناتتاردا دا قولىنا ءبۇرىستىرىپ جارتى بەت قاعاز الىپ شىعادى.
ءبىلىمدى, بىلىكتى اكىمدەر ەلدىڭ, جەرگىلىكتى جەردىڭ جاعدايىن بەس ساۋساعىنداي بىلۋلەرى كەرەك. قاعازعا قاراماي سويلەۋ – ءوڭىردىڭ جاعدايىنان جاقسى حاباردار دەگەن ءسوز. قاعازعا قاراۋدىڭ دا ورنى, ءجونى, جوسىعى بار. ال وبلىس اكىمىنەن كورگەن ورىنباسارلارى دا, اۋدان, قالا اكىمدەرى دە سويتەدى. مىسالى, لەبياجى اۋدانىنىڭ اكىمى سەرىك جانعازينوۆ تە اۋىلداستارىنىڭ الدىندا قولىنداعى قاعازعا جازىلعاندى وقىپ تۇرادى. ءتىپتى, كەيبىر اكىمدەر قازاق تىلىندە ءسويلەمەي-اق قويسا ەكەن دەيتىن بولدىق. ءبۇيتىپ, ءتىلدى بۇراپ قور قىلعانشا, ورىسشا-اق سويلەي بەرگەندەرى جاقسى.
ەكىنشى ءبىر ايتارىمىز, باسشىلاردىڭ, جاۋاپتى لاۋازىمداعىلاردىڭ حالىقتان الىستاماي, ياعني كابينەتتەرىنە تىعىلماي, ەلگە جاقىن جۇرگەندەرى دۇرىس بولار ەدى. كەشە عانا كەڭەس وتكىزگەن مەملەكەت باسشىسى نۇرسۇلتان نازارباەۆ جۋرناليستەردەن, جالپى, قوعامنان قاشاتىن شەنەۋنىكتەر مەن ساياساتكەرلەرگە ەسكەرتۋ جاسادى: «ءبىز ەكونوميكالىق ىنتىماقتاستىق جانە دامۋ ۇيىمىنىڭ ستاندارتتارىنا تالپىنىپ, الەمدەگى ەڭ دامىعان 30 ەلدىڭ قاتارىنا قوسىلامىز دەگەن ماقسات ۇستانىپ وتىرمىز. وسى ۇيىمداعى, جالپى, دامىعان ەلدەردەگى ەڭ ءبىر جاقسى ستاندارت – بۇل ەلدەردىڭ ۇكىمەتى حالىق الدىنا كۇندە شىعادى, ۇكىمەت مۇشەلەرىنىڭ بارلىعى قوعام الدىندا قۇرداي جورعالايدى. ول ەلدەردىڭ مينيسترلەرى ءبىر ماسەلە تۋىنداي قالسا, جەدەل پىكىر بىلدىرەدى. ال بىزدە قالاي؟ مەنىڭ ايتارىم, بريفينگكە كەلىپ, جۋرناليستەردىڭ الدىندا قاعازعا جازىلعان ءماتىندى وقىپ بەرۋ – اقپاراتتىق جۇمىس ەمەس... ءبىزدىڭ مينيسترلەر بريفينگتەردە جۋرناليستەردەن قاشقاندا, الدىنا جان سالمايدى, قاراپايىم سۇراققا جاۋاپ بەرمەيدى», – دەدى پرەزيدەنت.
ءبىزدىڭ دە اكىمدەرگە, باسقا دا باسشى لاۋازىمداعىلارعا «قاعازدان باسىڭدى كوتەر, حالىققا ءتۇزۋ قارا!» دەگىمىز كەلەدى. ەلباسى ايتقانداي, «قوعامنان «تىعىلۋ» ءتيىمسىز جۇمىستىڭ باستى سەبەبى. ساياساتكەر حالىقپەن سويلەسىپ, قوعامنىڭ سەنىمىن جاۋلاپ الۋى كەرەك. حالىقپەن ءجيى-ءجيى كەزدەسكەن دۇرىس...».
فاريدا بىقاي,
«ەگەمەن قازاقستان»
پاۆلودار وبلىسى
سوڭعى جاڭالىقتار
پەداگوگتەردى اتتەستاتسيالاۋ جۇيەسى جاڭارتىلادى
ءبىلىم • كەشە
اتىراۋ وبلىسىندا جەر ۋچاسكەلەرى مەملەكەتكە قايتارىلدى
ايماقتار • كەشە
اتوم ەنەرگەتيكاسى سالاسى: ۇزاق مەرزىمدى باعدار ايقىندالدى
ەنەرگەتيكا • كەشە
جاپونيادا 7,7 بالدىق جەر سىلكىنىسى تىركەلدى
تابيعات • كەشە
