ماقسارى مايى

قازاقستانداعى جۋالىدان ەۋروپاداعى بريۋسسەلگە جىبەرىلەدى ناعىز بيزنەس جاي باستالىپ, بىرتە-بىرتە قارقىن الادى. جامبىل وبلىسىنىڭ جۋالى اۋدانىنداعى ماي شىعاراتىن زاۋىتتىڭ العاش لەنتاسى قيىلعاندا, كۇنىنە 3-5 توننا عانا ماقسارى وڭدەيتىن. ەندى, مىنە, تىنىمسىز ەڭبەكتىڭ ارقاسىندا كاسىپتەرىن دامىتىپ, قازىر ونىمدەرىن قىتاي, نيدەرلاند جانە بەلگيا ەلدەرىنە شىعارۋعا قول جەتكىزدى. سۇرانىس ارتا تۇسكەندىكتەن, 115 ميلليون تەڭگە نەسيە الىپ, قىتايدان جاڭا قوندىرعىلار ساتىپ الدى. سونىڭ ارقاسىندا ءونىم ساپاسىن ارتتىرىپ, ەكسپورت كولەمىن ۇلعايتپاق. قازىر زاۋىتتىڭ تاۋلىگىنە 30 توننا ماقسارى سىعاتىن مۇمكىندىگى بار. – ءبىز سۇيىق مايمەن بىرگە ونى قۇياتىن پلاستماسسا قۇ­تىنى دا ءوزىمىز شىعارامىز. بىلتىر مۇندا تاۋلىگىنە 7 توننا ماقسارى وڭدەلگەن. ونىڭ ءبىر بولىگى جارتىلاي شيكىزات كۇيىندە ەكسپورتقا جونەلتىلدى. ەندى ءونىم شىعارۋدى 2 ەسەگە كوبەيتكەلى وتىرمىز. بۇل ءۇشىن مايلى داقىلدى ءوزىمىز ەگىپ, شيكىزاتتى ءتيىمدى پايدالانۋىمىز قاجەت. سوندىقتان, بىزگە ەگىن ەگەتىن جەر كەرەك. ءداندى قازىرگىدەي ءار شا­رۋا­نىڭ القابىنان جيناپ, قا­بىلداپ الۋ بىزگە ءتيىمسىز. بۇگىندە وتاندىق ونىمگە دەگەن سۇرانىس جاقسى. ويتكەنى, حالىق قازاقستاندا جاسالعان تاۋاردىڭ ەكولوگيالىق تازا ءارى ساپالى ەكەندىگىن جاقسى بىلەدى, – دەيدى زاۋىت ديرەكتورىنىڭ ءوندىرىس جونىندەگى ورىنباسارى انۋاربەك ساعىندىقوۆ. مىنە, ءبىر كەزدەرى ەسكى اس­تىق قابىلدايتىن مەكەمە بازاسىندا اشىلعان بۇل زاۋىت وسىلايشا قۇلاشىن كەڭگە سەرمەپ, ساتىمەن العا باسىپ كەلەدى. ورالحان ءداۋىت, «ەگەمەن قازاقستان» جامبىل وبلىسى