«National Geographic»-ءتىڭ ۇزدىك 50 سۋرەتى

قازاقستانعا كەلە جاتىر مامىر ايىنىڭ 27-ءسى كۇنى استاناداعى قازاقستان رەسپۋبليكاسىنىڭ ۇلتتىق مۋزەيىندە «National Geographic-ءتىڭ» ۇزدىك 50 سۋرەتى» اتتى فوتوكورمە اشىلماق. شارا «National Geographic قازاقستان» جۋرنالىنىڭ تۇساۋكەسەر ءراسىمى اياسىندا ۇيىمداستىرىلعالى وتىر. كورمەدە تالعامى جوعارى كەلۋشىلەرگە 128 جىلدىق تاريحى بار الەمدىك بەدەلدى باسى­لىمنىڭ ەڭ ۇزدىك فوتولارى ۇسىنىلادى. وندا ستيۆ ماككارريدىڭ دۇنيەنى شارلاعان ايگىلى «اۋعان قىزى» سۋرەتىنەن باستاپ, دجەين گۋدوللدىڭ وزىندىك قولتاڭباسى بار كادرلارى, توماس ابەركرومبيدىڭ قايتالانباس مەككەنىڭ سۋرەتى قويىلىپ, «National Geographic» تاري­حىنداعى باسقا دا تانىمال فوتوتۋىندىلار پاش ەتىلەدى. مۇنىمەن قوسا, كورمەگە كەلۋشىلەر فوتوسۋرەتتەردى تاماشالاپ قانا قويماي, كادر­دان تىس ورىن العان وقيعالار تۋرالى دا ءبىلىپ, ءار سۋرەتتىڭ تاريحىنا تەرەڭ ۇڭىلە الادى. ۇيىمداستىرۋشىلاردىڭ ايتۋىنشا, مۇنداعى ءاربىر فوتو ادامعا تەرەڭ وي سالىپ, دۇنيەگە فيلوسوفيالىق كوزقاراسپەن قاراۋعا ۇندەيدى. ەستەرىڭىزگە سالا كەتەيىك, «National Geographic قازاقستان» جۋرنالى العاش رەت ەلىمىزدە بيىلعى جىلدىڭ اقپان ايىنان باستاپ جارىققا شىعىپ كەلەدى. قازىرگى كۇنى بەدەلدى باسىلىمنىڭ انا تىلىمىزدەگى ءتورتىنشى سانى ءازىز وقىرماننىڭ قولىنا ءتيدى. وسىعان بايلانىستى شارا بارىسىندا جۋرنالدىڭ رەسمي تۇساۋكەسەرىنە ارنالعان بريفينگ وتكىزۋ جوسپارلانىپ وتىر. «National Geographic» جۋرنالى ورتالىق ازيا ايماعى بويىنشا العاش رەت قازاقستاندا جارىق كوردى. قازىرگى تاڭدا الەمنىڭ 38 تىلىندە, 80-نەن استام ەلگە تارالۋدا. ءتىلى جەڭىل, بەزەندىرىلۋى كوركەم جۋرنالدى وقىرمان تەز قابىلدايدى. «National Geographic» تاريح, گەوگرافيا, ارحەولوگيا, عىلىم مەن مادەنيەت سالالارى بويىنشا تەڭدەسسىز فوتوسۋرەتتەر مەن ەكسكليۋزيۆتى ماقالالاردى جاريالاپ تۇرادى. جۋرنال پلانەتانى ايالاۋدى ناسيحاتتاپ, ونى قورعاۋعا ۇندەيدى, جەر شارىنىڭ قايتالانباس تابيعاتىنىڭ ادەمىلىگىن ساقتاۋعا شاقىرادى. «ەگەمەن-اقپارات»