كونگومەن العاشقى رەسمي بايلانىس

جاقىندا قازاقستان رەسپۋبليكاسىنىڭ ارنايى وكىلى, قازاقستان رەسپۋبليكاسى پرەمەر-ءمينيسترىنىڭ كەڭەسشىسى, ەلشى باعدات امىرەەۆ براززاۆيل قالاسىندا بولىپ, وندا ونى كونگو رەسپۋبليكاسىنىڭ پرەزيدەنتى دەني ساسسۋ نگەسسو قابىلدادى. ب.امىرەەۆ كونگو مەملەكەتى باسشىسىنا قازاقستان پرەزيدەنتى نۇرسۇلتان نازارباەۆتىڭ ەلىمىزدىڭ كاندي­داتۋراسىن 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قولداۋ تۋرالى جولداۋىن تابىس ەتتى. ەكىجاقتى اڭگىمە بارىسىندا تاراپتار ەكى ەل ارا­سىن­داعى قارىم-قاتىناستى حالىقارالىق ۇيىمدار اياسىندا دامىتۋدىڭ پەرسپەكتيۆالارىن تالقىلادى. كونگو پرەزيدەنتى قازاقستاننىڭ مەملەكەتتىك قۇرىلىس جۇرگىزۋ, ەكونوميكانى دامىتۋ مەن تەڭدەستىرىلگەن سىرتقى ساياسات تۇزۋدەگى تابىستارىن جوعارى باعالادى. سونداي-اق, ول قازاقستان پرەزيدەنتى نۇرسۇلتان نازارباەۆتىڭ حالىق­ارالىق جانە ءدىني قاۋىپسىزدىكتى قامتاماسىز ەتۋ, قارۋسىزدانۋ مەن وركەنيەتتەردىڭ جاھاندىق ۇنقاتىسۋىن ىلگەرىلەتۋ ىسىنە قوسقان ۇلەسى ۇلكەن ەكەنىن اتاپ ءوتتى. قازاقستاندىق ديپلومات ءوز كەزەگىندە كونگو كوش­باس­شىسىنا قازاقستاننىڭ حالىقارالىق ۇيىمدار شەڭ­بەرىندەگى سىرتقى ساياسي باستامالارىن قولداعانى ءۇشىن ريزا­شىلىعىن ءبىلدىرىپ, قازاقستان مەن كونگو اراسىندا ساۋدا-ەكونوميكالىق بايلانىستار سالاسىندا سىندارلى ىنتىماقتاستىق ورناي­تىنىنا سەنىمدى ەكەنىن كولدەنەڭ تارتتى. ەلشى ب.امىرەەۆ پەن پرەزيدەنت د.نگەسسونىڭ كەزدەسۋى ەكى ەل اراسىنداعى جوعارى دەڭگەيدەگى العاشقى رەسمي كەزدەسۋ بولدى جانە دوستىق راۋىشتە ءوتتى. كەزدەسۋگە قازاقستان رەسپۋبليكاسىنىڭ ەفيوپياداعى ەلشىسى جانە قازاقستان رەسپۋبليكاسىنىڭ افريكا وداعىنداعى تۇراقتى وكىلى ەرلىك ءالي قاتىستى. «ەگەمەن-اقپارات»