الماتىدا كۇندە دە, تۇندە دە جاۋىن

بيىلعى كوكتەم وزگەشە... الماتى اۋا رايىنىڭ بۇل ماۋ­سىمدا مۇندايى جوق ەدى, كۇنارا جاۋىن. تۇنگە قاراي شەلەك­تەپ جاۋعان نوسەردەن تۇرعىندار شوشىناتىندى شىعاردى. ەندى شە, وتكەن جىلى تاۋداعى ءبىر ساعاتتىق جاۋىننان كەيىن وقىس مىنەز تانىتقان ارناسى قىلدىرىقتاي قارعالى وزەنى بيىل مامىر ايىنىڭ باسىندا تاعى ءبىر رەت تاسىپ ۇلگەردى. مامىر مامىر بولعالى الماتىدا كۇن ارالاتىپ كۇندىز دە, تۇندە دە توپەلەپ نوسەر جاۋادى. الماتىنىڭ كونەكوزدەرى بۇرىن-سوڭدى مۇنداي قۇبىلىستى بايقاماعانىن ەسكە الۋدا. تۇسكە دەيىن قاس-قاعىم ساتتە سىركىرەپ, كۇن كۇركىرەپ, نايزاعاي ويناپ, كۇللى قالانى ءبىر شايىپ وتەتىن الماتىنىڭ اق جاۋىنى ساعىنىش بولىپ قالعانداي. تاۋ بوكتەرىنە جايعاسقان الىپ شاھاردىڭ اسفالت كوشەلەرىندە وزەن بولىپ اققان جاڭبىر سۋى, ەڭىس جەردە كول بولىپ تۇرىپ قالاتىندى شىعاردى. مۇنداي نوسەرلى جاڭبىرعا الماتى مەتروسى دا بوي ۇيرەتپەگەنىن بايقاتتى. تاسقىنداپ كەلگەن جاڭبىر سۋىنا نىسانداعى درەناجەرلىك جۇيەنىڭ شاماسى جەتپەي, ستانسا­نىڭ ىشىنە سۋ كەتتى. ول تۋرالى الەۋ­مەتتىك جەلىلەردە جاپپاي جازىلدى. كوپ كەشىكپەي «جىبەك جولى» ستان­ساسىنداعى بۇل توسىن وقيعاعا بايلانىستى «مەتروپوليتەن» كومپانياسى ديرەكتورىنىڭ كومەكشىسى اجار حابيەۆا جاۋىن سۋىنىڭ پويىزدارعا دا, جولاۋشىلارعا دا ەش قولايسىزدىق تۋعىزباعانى تۋرالى, ونىڭ تەز ارادا «ءسۇرتىلىپ» الىنعانى تۋرالى ايتتى. اتاقتى «مەدەۋ» سپورت كەشەنىنە بارار جولدا جاڭبىر مول سىڭگەن جارقاباق وپىرىلىپ, العاش رەت لاي كوشكىنى ءجۇردى. ول دا تەحنيكا مەن ادام كۇشىمەن تەز ارادا تازارتىلدى. قالالىق تجد كۇنى-ءتۇنى ساق وتىر. «جىعىلعانعا جۇدىرىق» دەگەندەي, جاڭبىر ءبىر باسىلعان ساتتە قالداياقوۆ پەن قازىبەك بي كوشەسىنىڭ قيىلىسىندا جەر استىنا كومىلگەن سۋ قۇبىرىنان ىستىق سۋ اتىپ, سۋبۇرقاق ءتورت قابات ءۇيدىڭ بيىكتىگىندەي جەرگە شاپشىدى. اسفالت توسەنىشتىڭ اسپانعا جاڭقاداي ۇشقانىن ءوز كوزىمەن كورگەندەر بار! جۇرگىنشىلەر امان, كوشەدە قاڭتارۋلى تۇرعان ەكى جەڭىل كولىك قاتتى زارداپ شەكتى. ءتيىستى ورىن­دار 1993 جىلى سالىنعان سۋ قۇبىرى­نان سىزات كەتكەنى, سۋدىڭ ىستىقتىعى 45 گرادۋستان جوعارى بولماعانى تۋرالى حابارلاما جاسادى. قۇبىردى قالپىنا كەلتىرۋ جۇمىسى اياقتالىپ كەلەدى... «كازگيدرومەتتىڭ» مالىمەتى بو­يىنشا بۇگىن, ەرتەڭ, ارعى كۇنى... الماتىدا تاعى دا جاۋىن جاۋادى. تالعات ءسۇيىنباي, «ەگەمەن قازاقستان»  الماتى