قانات يسلام ەلگە كەلدى

استانا. 17 مامىر. بۇگىن الماتىعا امەريكا قۇراما شتاتتارىنان قانات يسلام كەلدى. بۇل تۋرالى egemen.kz ءتىلشىسى حابارلادى. اتلانت مۇحيتىنىڭ ار جاعىندا شارشى الاڭدا حالقىمىزدىڭ اتاعىن شىعارىپ جۇرگەن بوكسشىنى الماتى اۋەجايىندا 200-گە جۋىق ادام قارسى الدى. ولاردىڭ اراسىندا رەسپۋبليكالىق سپورت كوللەدجىنىڭ ديرەكتورى امالبەك تشانوۆ, قازاقستان بوكس فەدەراتسياسىنىڭ ۆيتسە-پرەزيدەنتى, بەلگىلى كاسىپكەر, مەتسەنات باۋىرجان وسپانوۆ, بوكستان وليمپيادا چەمپيونى ەرماحان ىبىرايىموۆ پەن باسقا دا سپورتتىڭ باسى-قاسىندا جۇرگەن ازاماتتار بولدى. اۋەجايدا بوكسشىنى كوپشىلىك اتىن ايتىپ, دۋ قول شاپالاقپەن قارسى الدى. قانات اۋەجايدا باگاجىن الىپ, جانكۇيەرلەرگە بەتتەگەن كەزدە الدىمەن وزىنە قولداۋ كورسەتىپ جۇرگەن اعالارىمەن قۇشاقتاسا امانداستى. وسى جەردە امالبەك تشانوۆ بارلىق جانكۇيەرلەردىڭ اتىنان بوكسشىنىڭ يىعىنا شاپان جاپتى. اۋەجايدان شىعا بەرە ونى تاعى باسقا جانكۇيەرلەر كۇتىپ الىپ, تاعى دا قوشەمەت كورسەتتى. وسىعان قانات ريزاشىلىعىن ءبىلدىرىپ, كوپشىلىككە العىسىن ايتتى. «اسسالاۋماعالەيكۇم حالقىم! راحمەت سىزدەرگە. مەن نەگىزى مۇنداي توسىن سىيدى ويلاماعان ەدىم. مۇنىڭ ءوزى ءبىزدىڭ ەلدىگىمىزدىڭ, ءبىزدىڭ ەگەمەندىگىمىزدىڭ, تىنىشتىقتىڭ ارقاسى. تىنىشتىق بولماسا ءبىزدىڭ بوكس, ءبىزدىڭ ولەڭ كىمگە كەرەك. سول ءۇشىن وتە قۋانىشتامىن. ءبىز سپورتشى بولعاننان كەيىن قازاقتىڭ كوك تۋىن كوتەرۋ ءبىزدىڭ مىندەت. مەنىڭ بالا كۇنگى ارمانىم قازاقتى, كوك تۋىمىزدى بۇكىل الەمگە تانىتۋ ەدى.  مەن الداعى كەزدە دە ەلىمىزدىڭ ءۇمىتىن اقتاپ جۇرەمىن», دەدى ول. داستان كەنجالين. دەرەك, فوتو: مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتى.