فيرمانىڭ 5 ملن. 400 مىڭ تەڭگەسىن ۇتقىزىپ, جازاعا ۇشىرادى

قاراعاندى. 17 مامىر. قاراعاندى وبلىسىنىڭ تۇرعىنى ءوزى جۇمىس ىستەيتىن فيرمانىڭ 5 ملن. 400 مىڭ تەڭگەسىن بۋكمەكەرلىك كەڭسەدە باسكە تىگىپ جىبەرگەنى ءۇشىن جازاعا تارتىلدى. بۇل تۋرالى قاراعاندى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. فارماتسەۆتيكالىق ءونىم ساتۋمەن اينالىساتىن قاراعاندىلىق جاۋاپكەرشىلىگى شەكتەۋلى سەرىكتەستىگىنىڭ جەزقازعان وڭىرىندەگى وكىلى بولىپ جۇمىس ىستەگەن 28 جاستاعى ەر ادام ءدارىحانالاردان كۇندەلىكتى تۇسكەن اقشانى بۋكمەكەرلىك كەڭسەلەردە باسكە تىگىپ كەلگەن. ۇرلانعان اقشانىڭ سوماسى 5 ملن. 400 مىڭ تەڭگەگە جەتكەندە فيرما باسشىلىعى ونىڭ بۇل ارەكەتىن اشكەرە ەتىپ, قۇقىق قورعاۋ ورىندارىنا حابارلاعان. وسى وقيعا بويىنشا قىلمىستىق ءىس قوزعالىپ, ءىس سوتقا جىبەرىلدى. جەزقازعان قالالىق سوتى ايىپتالۋشىنىڭ ۇرلانعان اقشانى يەسىنە قايتارىپ بەرگەندىگىن جانە اسىراۋىندا ءۇش بالاسى مەن كارى اناسى بارىن ەسكەرىپ, جەتى جىلعا شارتتى تۇردە باس بوستاندىعىنان ايىردى. قايرات ءابىلدينوۆ. دەرەك: قاراعاندى وبلىستىق سوتتىڭ ءباسپاسوز قىزمەتى. فوتو: capital.kz.