قىرىم تاتارى قىزى

«ەۆروۆيدەنيە» باس جۇلدەسىن جەڭىپ الدى شۆەتسيانىڭ استاناسى – ستوكگولم قالاسىندا مارەگە جەتكەن «ەۆروۆيدەنيە» ءان كونكۋرسىندا ۋكراي­نا­لىق قىرىم تاتارىنىڭ قىزى, ليريكا-درامالىق سوپرانو داۋىستى وپەرا جانە دجاز ءانشىسى جامالا باس بايگەنى جەڭىپ الدى. ول فينالدا قىرىمدىقتار دەپور­تاتسياسىنا ارنالعان «1944» دەگەن ءاندى ورىندادى. جامالانىڭ شىن اتى-ءجونى – سۋسانا اليمقىزى جامالدينوۆا. شاماسى, لاقاپ اتتى دا وسى تەگىنەن السا كەرەك. ول 1983 جىلعى 27 تامىزدا قىرعىزستاننىڭ وش قالا­سىندا تۋعان. كەيىنىرەك اتا-اناسى قىرىمعا كوشە­دى. جاس قىزدىڭ بالالىق شاعى الۋشتا تۇبىندەگى مالورە­چەن­س­كوە سەلوسىندا وتەدى. اكە-شەشەسى – مۋزىكانتتار. انا­سى كەرەمەت ءان سالادى جانە مۋزىكالىق مەكتەپتە مۇ­عا­­­لىم بولىپ جۇمىس جاسايدى. اكەسى – ديريجەر. ولار بولا­­شاق ءانشىنى كىشكەنتايىنان مۋزىكاعا دايىنداعان. سۋسانا مەن ونىڭ ءسىڭلىسى قاتاڭ مۇسىلمان تاربيەسىندە ءتالىم العان. قىزدىڭ وتە جاقسى داۋىسى بار ەكەنى ءۇش جاسىندا بايقالعان. تالانتتى ءبۇلدىرشىن توعىز جاسىندا بالالارعا ارنالعان اندەرى البومىن جازدىرعان. الۋشتاداعى مۋزىكالىق مەكتەپتە ءبىلىم العان. كەيىن سيمفەروپولداعى مۋزىكا ۋچيليششەسىندە وقىپ, وپەرا ۆوكالىنا ماماندانادى. كەيىن كيەۆتە ۇلتتىق مۋزىكا اكادەمياسىن بىتىرەدى. سۋسانا وقىپ جۇرگەن كەزىنەن ءتۇرلى حالىقارالىق فەستيۆالدار مەن كونكۋرستارعا قاتىسا باستايدى. سونىڭ ءبىرى – «قىرىم كوكتەمى» كونكۋرسىندا ءۇشىنشى ورىن الادى. سوندا «دودج-2001» ارنايى سىيلىعىنا دا يە بولادى. بۇدان كەيىن بەلگىلى ساكسوفونشى الەكساندر نوۆوسەلسكيدىڭ سۇيەمەلدەۋىمەن ماسكەۋدە وتكەن حالىقارالىق كونكۋرسقا قاتىسادى. بۇدان بولەك, يتاليادا لاۋرەات اتانادى.  «ەگەمەن-اقپارات»